Revision Lekol ministere theocratik

Nou pou examine bann question ki lor sa feuille-la dan Lekol ministere theocratik pendant semaine ki commence a partir le 27 octobre 2008. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 1er septembre ziska 27 octobre 2008.

TECHNIK ORATOIRE

1. Couma nou kapav koné kifer enn kikenn croire dan tel ou tel kitsoz? [beF p. 259 § 2, 3] Sa prend le temps pou comprend seki ena dan leker enn lot dimoune ek fodé pa nou trop pressé. Bann question kapav aide nou. Nou kapav demandé: “Ki ou pensé lor . . . ?” “Eski ou sur ki . . . ?” ou-soit “Ki ou ti pou faire si . . . ?” Avant ki nou essaye corrige l’opinion enn dimoune, nou bizin faire zeffort pou comprend kifer sa dimoune-la ena sa bann sentiment-la. Si bann ki pé ecoute nou senti ki nou comprend zot, zot pou plus disposé pou reflechi lor seki nou dire zot.

2. Couma nou kapav aide enn dimoune pou retire bann prejugé ou-soit la haine dan so leker? [beF p. 260 § 2] Enn dimoune ki nourri la haine ou-soit prejugé dan so leker bizin aprann pou trouve lezot, ek trouve li aussi, pareil couma Jéhovah Li, Li trouvé. Enn fois ki li comprend ki Jéhovah interessé sincerement ar tou dimoune, n’importe ki so l’origine, so nationalité ou-soit so race, lerla li ena enn base biblik solide ki permette li vive en paix avek lezot. (Actes 10:34, 35)

3. Couma nou kapav aide nou bann etudiant pou examine zot leker pou ki zot kapav contigne grandi lor plan spirituel? [beF p. 261 § 3] Nou bizin encourage nou bann etudiant pou garde bien dan zot l’esprit ki la Bible faire zot koné couma Jéhovah trouve zot. (Prov. 17:3) Nou bizin conseil zot pou considere lecture la Bible couma enn moyen pou koné couma Jéhovah trouve bann “pensée ek bann l’intention” ki ena dan zot leker, pou ki zot kapav coopere avek Bondié ek faire bann changement necessaire. (Héb. 4:12)

4. Ki nou bizin garde bien dan nou l’esprit kan nou pé faire zeffort pou touche leker bann ki pé ecoute nou? [beF p. 262 § 5] Li bon ki nou rappel ki kan nou enseigne lezot nou pé coopere avek Jéhovah. (1 Cor. 3:9) C’est Jéhovah ki estime valeur leker bann dimoune ek attire bann dimoune vers Li. (Prov. 21:2; Jean 6:44) Li pa force personne pou accepté la verité, mais kan nou servi bann l’Ecriture, Bondié kapav pousse sa dimoune-la pou realisé ki seki li pé tendé li enn reponse pou bann question ki li’nn posé ou-soit pou so bann la priere.

5. Kifer nou bizin veille bien ki nou pa depasse le temps dan nou bann participation dan bann reunion? [beF p. 263 § 1, 3, l’encadré] Kan nou veille bien lor nou le temps, nou permette ki “tou kitsoz passe couma bizin ek dan l’ordre.” (1 Cor. 14:40) Li necessaire ki nou ena assez le temps pou developpe chaque point principal dan l’enseignement. En plus, nou bann reunion bizin commence ek termine a ler sans prend compte bann coutume local ou-soit nou preference personnel.

EXPOSÉ NO. 1

6. Ki ti pousse Paul pou ecrire so premier lettre pou bann Corinthien? [siF p. 210 § 3] Congregation Corinthe ti enn nouveau congregation. Apparemment Paul ti gagne enn lettre ki la congregation ti envoye li ek li ti bizin reponn zot. En plus, Paul ti tann bann mauvais rapport ek sa ti fatigue li. (1 Cor. 1:11; 5:1; 11:18) Sa bann rapport-la ti tellement bouleverse Paul ki c’est zis dan premier verset chapitre 7 ki li ti koz lor lettre ki la congregation ti envoye li.

7. Cite certain raison kifer Paul ti ecrire so deuxieme lettre pou bann Corinthien. [siF p. 214 § 1-2] Tite ti’nn sorti Corinthe ek ti raconte Paul couma la congregation ti reagir ar so premier lettre. Sa lettre-la ti pousse bann Corinthien pou repenti. Pourtant, bien-etre spirituel sa congregation-la ti en danger a cause “bann super-apotre,” ki Paul ti appel “bann fausse zapotre” ek “bann fausse zouvrier.” (2 Cor. 11:5, 13, 14) Certain ti mette en doute l’autorité Paul en tant ki enn apotre. Ti ena enn vrai besoin dan sa congregation-la, ek so deuxieme lettre ti tombe bien.

8. Couma bann chretien bizin considere zot ministere? [siF p. 217 § 18] Bann chretien bizin mem l’attitude ki mentionné dan deuxieme lettre ki Paul ti ecrire bann Corinthien. Zot ministere bizin ena enn grand valeur pou zot. Enn ministre chretien ki’nn qualifié couma bizin par Bondié, li pa representant enn religion ki zis al devant la porte bann dimoune pou partage la parole. Mais, li faire sa avek tou so leker. Bann fruit ki li manifesté c’est sa ki recommande li, pa kit certificat. Li vrai ki nou ministere c’est enn grand l’honneur, mais jamais nou considere sa couma enn raison pou faire vantard. Au contraire, si nou pé reussi accompli nou ministere c’est zis grace a la force Jéhovah. (2 Cor. 2:16, 17; 3:1-5; 4:7)

9. Couma nou kapav gagne faveur Bondié ek vinn enn la joie pou nou bann frere zordi, pareil couma bann Philippien? [siF p. 226 § 12] Nou kapav imite bann Philippien si nou manifesté generosité ek nou aide nou bann frere ki dan difficulté. (Phil. 1:3-6) Nou gagne faveur Bondié kan nou contigne ‘tini ferme dan mem l’esprit, nou faire zeffort pou lutte cote a cote pou la foi dan la bonne nouvelle, kan nou brillé couma bann la lumiere ki eclaire lezot’ dan sa mauvais le monde-la. Kan nou faire tou sa bann kitsoz-la, nou kapav vinn enn la joie pou nou bann frere. (Phil. 1:27; 2:15; 4:1)

10. Ki bon l’effet Paul ek so bann compagnon ti ena lor congregation Thessalonique? [siF p. 231 § 13] Paul ti koz lor li-mem ek lor bann ki ti avek li couma bann ki pa ti zis partage la bonne nouvelle lor Bondié mais ti donne aussi zot prop nâme pou zot bann frere Thessalonique ki zot ti bien content. Paul ti prié pou ki bann Thessalonicien ena ‘beaucoup l’amour sakenn pou so camarade.’ Enn l’amour ki nou manifesté sans hesité, vrai-mem faire di-bien ek li separe bann chretien ar enn le monde ki pena l’amour, kot ena corruption ek ki immoral. (1 Thess. 2:8; 3:12; 4:1-9)

LECTURE LA BIBLE TOULÉ-SEMAINE

11. Ki sa vedir ‘livré enn mauvais zom ar Satan pou destruction la chair, pou kapav sauve l’esprit’? (1 Cor. 5:5) [wCE 08 1/7 “Parole Jéhovah vivant—Point biblik interessant dan premier ek deuxieme livre Corinthiens”] Kan enn kikenn li exclu dan congregation, li reforme partie dan sa le monde Satan-la. (1 Jean 5:19) Alors, c’est coumadir inn livré li ar Satan. Kan exclu sa dimoune-la, congregation detruire ou-soit tire sa mauvais l’influence ki li ena dan congregation-la ek preserve “l’esprit” congregation, setadir l’attitude ki ena dan congregation. (2 Tim. 4:22)

12. Comié “fois” eski bizin celebré la mort Jésus, ek “ziska” kan? (1 Cor. 11:26) [wCE 08 1/7 “Parole Jéhovah vivant—Point biblik interessant dan premier ek deuxieme livre Corinthiens”] Paul pa ti pé dire ki ti pou celebré la mort Jésus souvent. Plutot, li ti pé dire ki chaque fois ki bann chretien oint prend bann l’embleme Mémorial, enn fois par an, zot pé “annonce la mort nou Seigneur.” Zot faire sa “ziska ki li vini,” setadir ziska li accueil zot dan le ciel grace a enn resurrection pendant so “presence.” (1 Thess. 4:14-17)

13. Lor ki vision 2 Cor. 12:2-4 kozé, ek kisannla ki ti’nn gagne sa vision-la? [wCE 04 1/11 p. 8 § 4; p. 10 § 9] Sa vision-la montré couma vrai l’adoration pou elevé ek li koz lor paradi spirituel ki peuple Jéhovah pou profité dan “lepok la fin.” (Dan. 12:4) Sa verset-la vinn zis apré ki Paul ti defann so position en tant ki apotre, alors li parette ki li ti pé raconte so prop l’experience.

14. Kifer Paul ti compare la Loi mosaïk ar enn “tuteur ki amenn vers Christ”? (Gal. 3:24) [wF 08 1/3 p. 18-21] Paul ti pé mette l’accent lor protection ki la Loi ti donné ek li ti montré ki la Loi ti temporaire. Souvent enn tuteur ti enn esclave ki ti kapav faire confiance, ek so devoir ti pou protege enn zenfant ek faire li comprend l’importance pou ena enn bon conduite. Pareil, la Loi mosaïk ti etabli pou protege bann Israélite ar bann pratik religieux ek immoral bann nation ki ti autour zot. En plus, kan enn zenfant ti’nn arrive l’adolescence, li ti nepli enba la loi so tuteur. Pareil, la Loi ti temporaire dan sens ki enn fois ki li ti amenn bann Juif ki ti ena la crainte pou Bondié vers Christ, so role en tant ki tuteur ti’nn fini.

15. Ki Paul ti pé rod dire kan li ti prié ki ‘preserve l’esprit ek nâme ek lekor so bann frere’? (1 Thess. 5:23) [wCE 08 1/9 “Parole Jéhovah vivant—Point biblik interessant dan premier ek deuxieme livre Thessaloniciens ek Timothée”] Paul ti pé koz lor l’esprit, nâme ek lekor congregation chretien en tant ki enn groupe. Li ti prié pou ki preserve so “l’esprit,” setadir so l’etat d’esprit. Li ti aussi prié pou “nâme” congregation, setadir so la vie, ou-soit so l’existence, ek pou so “lekor,” setadir pou congregation bann chretien oint en tant ki groupe. (1 Cor. 12:12, 13) Sa la priere-la montré bien ziska ki point Paul ti interessé ar la congregation. Nou aussi pareil, nou la priere bizin montré ki nou ena enn l’interet sincere pou tou nou bann frere lor la terre.