Revision Lekol Ministere Theocratik

Nou pou examine bann question ki lor sa feuille-la dan Lekol ministere theocratik pendant semaine ki commence a partir le 25 août 2008. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 7 juillet ziska 25 août 2008.

TECHNIK ORATOIRE

1. Couma nou kapav montré ki nou bann dimoune raisonnable kan nou pé partage la verité avek lezot? (Phil. 4:5) [7 juillet, beF p. 251 § 3] Nou bizin prend compte l’origine, situation, ek sentiment bann dimoune avek ki nou pé kozé ek nou bizin disposé pou cedé kan nou trouvé li approprié. Si nou ena sa l’attitude-la, li pou pli facile pou zot accepté seki nou dire kan nou raisonne avek zot a partir bann l’Ecriture.

2. Couma fason ki Paul ti koz avek bann Grec dan l’Aréopage kapav aide nou kan nou pé rann temoignage avek bann ki pa accepté la Bible couma enn l’autorité? (Actes 17:22, 23) [14 juillet, beF p. 252 § 1-2] Kan Paul ti preche avek bann Grec dan l’Aréopage, li pa ti commence so conversation par bann verset ki trouve dan bann l’Ecriture. Au contraire, li ti commence avek bann kitsoz ki bann Grec ti koné ek ti accepté, ek li ti servi sa bann kitsoz-la pou amenn zot pou reflechi lor nou Createur ek So bann projet. Nou koné ki la plupart dimoune pé attann avek impatience bann pli bon condition dan la vie, alors nou kapav montré ki nou interessé avek seki tracasse zot ek apré sa, nou montré zot bann solution ki ena dan la Bible.

3. Mem si nou sur ki dimoune avek ki nou pé kozé ena tort, couma nou kapav montré ki nou bann dimoune raisonnable? [21 juillet, beF p. 253 § 1-2] Parfois, li vaut mieux ki nou zis remercié dimoune-la pou so l’opinion ek nou concentré nou conversation lor enn point ki kapav donne enn pli bon resultat. Nou bizin rappel ki nou mission c’est pou rann “enn temoignage,” pa pou force lezot pou pense pareil couma nou. (Mat. 24:14) Bann dimoune bizin choisir par zot-mem seki zot pou croire, ek nou bizin accepté ki zot ena sa droit-la.

4. Ki kitsoz nou bizin garde bien dan nou l’esprit kan nou pé faire zeffort pou koz dan enn fason pou convaink lezot? [4 août, beF p. 255 § 3, l’encadré] Bann dimoune pa pou croire ni zot pou mette en pratik seki nou dire si zot pa sur ki seki nou pé dire li la verité. Pou ki nou bann argument zot solide, fodé ki zot basé lor Parole Createur le ciel ek la terre. Bann publication ki l’esclave fidele et avisé donné, aide nou beaucoup pou nou kapav donne lezot bann preuve ki appuye nou bann croyance ek ki basé lor la Bible.

5. Couma nou kapav servi discernement pou touche leker bann dimoune avek ki nou pé kozé? (Prov. 20:5) [25 août, beF p. 258 § 1–p. 259 § 1] Enn kikenn ki ena discernement prend compte seki influence bann pensée ek sentiment sa dimoune ki pé ecoute li-la. Si nou developpe nou capacité pou observé, sa aussi pou kapav aide nou. Kan nou pé koz lor enn sujet, nou bizin prend compte si ena kit changement lor figure ou-soit dan ton la voix sa dimoune ki pé ecoute nou-la.

EXPOSÉ NO. 1

6. Ki bann soeur bizin rappel kan zot pé developpe enn cadre? [7 juillet, beF p. 44 § 5-6] Kan zot pé developpe enn cadre, bann soeur bizin prend compte sujet ki zot ena pou developpé, dimoune avek ki zot pou kozé, ek point ki zot ena pou travail dan lekol.

7. Ki l’objectif bann frere bizin ena kan zot pé presente bann point biblik interessant? (Neh. 8:8) [14 juillet, beF p. 47 § 2-3] L’objectif sa partie-la c’est pou explik Parole Bondié, explik so sens, ek aide lezot pou comprend seki la Bible dire. Bann frere bizin montré couma portion ki ti ena pou lire, li con­cerne nou zordi. Kan zot pé preparé, zot bizin prend compte bann besoin ki la congregation ena dan la priere ek traite sa bann besoin-la kan zot attire l’attention lor bann principe biblik ki trouve dan bann chapitre ki ti ena pou lire.

8. Ki enn frere bizin faire si li ena enn sujet dan reunion service kot ena enn demonstration ou-soit enn interview? [21 juillet, beF p. 49 § 5] Bann demonstration zot bann modele pou la congregation, alors bizin prepare zot bien a l’avance. Bann frere ki ena bann participation kot ena bann demonstration ou-soit bann interview, bizin faire zeffort pou repete sa avek zot bann participant avant jour reunion.

9. Couma eski livre Actes attire l’attention lor ­fason ki la bonne nouvelle pou preché ek ziska ki point li pou preché? (Actes 20:20, 21; 28:23) [28 juillet, siF p. 204 § 35] Paul finn donne nou l’exemple kan li pa “finn hesité” pou “enseigne . . . en publik ek lakaz par lakaz.” Toute longue livre Actes nou trouve bien sa l’idée pou rann “temoignage a fond[-la].”

10. Ki enn orateur kapav faire, pou faire sur ki so discours basé lor la Bible? (Actes 17:2, 3) [11 août, beF p. 52 § 6–p. 53 § 2] Enn frere ki invité pou faire enn discours publik, ­bizin pa pensé ki so discours c’est zis donne bann detail ek explik bann phrase ki trouve dan so schema. Au contraire, li bizin guetté couma sa bann l’idée-la basé lor bann l’Ecriture. Li bizin prend le temps pou lire, expliké, donne bann l’exemple, ek faire ­application bann verset ki li decide pou servi au lieu ki li concentré zis lor so plan.

LECTURE LA BIBLE TOULÉ-SEMAINE

11. Kifer eski gardien prison dan la ville ­Philippes ti envie “touye li-mem”? (Actes 16:25-27) [7 ­juillet, wF 90 15/5 p. 25, l’encadré] Apré enn tremblement de terre, bann la porte prison ti ouvert ek la chaine bann pri­sonnier ti largué. Dapré la loi romain, si enn pri­sonnier ti sauvé, gardien prison ti bizin paye sentence sa prisonnier-la. Ici, li parette ki gardien-la ti prefere suicide-li ki lezot torture li ziska li mort. Kitfois sa c’est condamnation ki certain sa bann pri­sonnier-la ti gagné.

12. Couma Aristarque ek Gaïus ti reagir kan zot ti gagne persecution? (Actes 19:29; 20:4, 5) [14 juillet, wCE 08 1/2 p. 14 § 16-17] Kan enn la foule plusieurs millier dimoune ki ti en colere ti traine zot dan enn theatre dan Éphèse, Aristarque ek Gaïus kitfois ti ­attann ki zot pou mort. Pourtant, nanyin pa montré ki zot ti perdi courage. Deux-trois mois plitar toulé-deux ti accompagne Paul lor so troisieme voyage missionnaire malgré bann danger ki ti ena.

13. Dan ki sens Saul ti ‘resisté kan ti pik-pik li’? (Actes 26:14) [28 juillet, wF 03 1/10 p. 32] Sa l’expression-la decrire seki enn zanimo faire kan pik-pik li ar enn baton ki en realité inn faire pou guide li. Dan boute sa baton-la ti ena enn metal pointe ek kan sa zanimo-la ti resisté, li ti blesse li-mem. Saul ti pou faire li-mem di-tort si li ti persecute bann chretien, parski kan li ti faire sa en realité li ti pé laguerre kont Bondié. Saul ti prend compte bann parole Jésus, li ti change so chemin ek li ti vinn l’apotre Paul, enn zapotre ki bann chretien ti bien content. Ecclésiaste 12:11 compare bann conseil ki sorti kot Bondié ar bann ­baton ki servi pou dirige bann zanimo parski zot ­kapav motive nou ek guide nou couma bizin si nou permette li.

14. Couma ‘peché finn trouve enn l’occasion’ grace a commandement ki Bondié ti donne Israël? (Rom. 7:8, 11) [11 août, wCE 08 1/6 ­“Parole Jéhovah vivant—Point biblik inte­ressant dan livre Romains”] La Loi ti aide bann Israélite pou comprend tou seki peché vedir vrai-mem, ek lerla sa ti faire zot pli conscient ki zot ti bann dimoune ki faire peché. Resultat: grace a la Loi, zot ti kapav plus reconette bann action ki zot ti’nn faire en tant ki bann dimoune imparfait, ek pli beaucoup dimoune ti rann-zot compte ki zot ti bann dimoune ki faire peché.

15. Couma eski nou “mette enn tas la braise difé” lor la tête enn l’ennemi? (Rom. 12:20) [18 août, wCE 08 1/6 “Parole Jéhovah vivant—Point biblik interessant dan livre Romains”] Dan ­lepok biblik, pou fonn bann metal ki ti trouve dan bann roche, ti bizin mette sa bann ­roche-la entre deux couche charbon dan enn four, enn couche la-haut ek enn enba. Sa gros chaleur ki ti ena la-haut-la ti aidé pou fonn sa metal-la ek separe li ar so bann saleté. Li pareil pou nou. Nou mette charbon lor la tête enn l’ennemi kan nou faire bann bon action envers li, lerla nou pou faire so mauvais l’attitude fonn ek so bann bon qualité ressorti.