Eski ou pé prepare ou famille pou li survive?

¹ Bann prophetie biblik ki’nn realisé donne bann preuve solide ki la fin sa le monde mauvais-la pé vini bien vite. Asterla nou pé vive bann lepok critik ki ressemblé beaucoup lepok avant deluge. (Mat. 24:37-39) Kan sa ancien le monde-la ti detruire, Noé ti survive parski li “ti marche avek vrai Bondié.” (Gen. 6:9) Surement Noé ti enseigne so famille lor seki Jéhovah ti demandé parski zot aussi zot ti sapé pendant deluge. Dan ki fason nou kapav imite Noé ek prepare nou famille pou survive la fin sa systeme mauvais-la?

² Predicateur la justice: Noé ti “enn predicateur la justice” ek li ti contigne preché pendant environ 40 a 50 an. (2 Pierre 2:5) So bann voisin—ki zot ti influencé ou-soit non par bann ange rebelle ki ti prend forme bann dimoune—finn surement sikann li a cause seki li ti pé preché. Souvent dan nou ministere nou joinde bann dimoune indifferent ou-soit ki bouffonne nou. Sa montré ki sa systeme-la pré pou al fini. (2 Pierre 3:3, 4) Selman, difference ki ena entre bann dimoune dan nou lepok ek dan lepok Noé, c’est ki zordi ena beaucoup ki reagir bien ar zeffort ki nou faire. Tou sa bann dimoune-la pé vinn adore Jéhovah. (Is. 2:2) Nou pou sauve ‘nou-mem ek bann ki ecoute nou’ selman si nou perseveré. (1 Tim. 4:16) Li necessaire ki bann parent enseigne zot zenfant par zot parole ek par zot l’exemple ki travail predication li urgent!—2 Tim. 4:2.

³ Li ti faire “exactement seki ti’nn dire li faire”: Pou ki Noé ek so famille gagne la vie sauve, sa ti depann lor enn kitsoz: zot ti bizin suive bien bann instruction Jéhovah. (Gen. 6:22) Li important aussi pou nou zordi ki nou “disposé pou obeir” direction ki la Bible ek l’esclave fidele donné. (Jacq. 3:17) Dan enn famille, bann zenfant ki’nn vinn bann adulte zordi rappel couma zot papa ti applik bann suggestion ki l’organisation Jéhovah donné. Par exemple, li ti conduire l’etude familial chaque semaine ek li ti amenn so famille dan predication toulé-week-end couma l’organisation encourage nou. Li ti faire tou so possible pou ki chaque semaine, enn zenfant accompagne li dan ministere. So determination pou faire “exactement seki ti’nn dire li faire” ti bien touche so bann zenfant, ek toulé-six inn grandi ek inn vinn bann fidele serviteur Jéhovah.

⁴ La fin sa systeme-la pou vini sans ki nou attann. (Luc 12:40) Nou ek nou famille pou montré ki nou’nn paré si nou imite Noé ek ki nou ena la foi ki nou pou sapé!—Héb. 11:7.