Revision lekol ministere theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 28 avril 2008. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 3 mars ziska 28 avril 2008.
TECHNIK ORATOIRE
1. Kifer li important ki nou servi bann reference ki’nn donne nou pou prepare nou bann sujet, ek couma nou kapav faire sa? [3 mars, beF p. 234 § 1–p. 235 § 1] Kan nou servi bann reference ki’nn donne nou pou prepare nou bann sujet, nou montré respé pou “nourriture dan l’heure ki bizin” ki nou gagné a travers “l’esclave fidele ek avisé.” (Mat. 24:45) Pou nou kapav servi bien sa bann reference-la, nou bizin analyse sa bien ek examine aussi bann verset ki ena ladan. Apré sa, nou bizin choisir deux ou-soit trois point important kot nou l’auditoire pou kapav aprann kitsoz ek essaye developpe ek explik sa bann point-la bien.
2. Kan nou pé enseigné, kifer bann question zot bien utile? [10 mars, beF p. 236 § 1-5] Bann question pousse bann dimoune pou partage seki zot pensé. Zot aide bann dimoune pou reflechi ek exprime zot prop l’opinion. Sa kapav donne nou l’occasion pou explik enn l’enseignement ki trouve dan la Bible. (Actes 8:30, 31)
3. Couma nou pou servi bann question pou raisonne avek bann ki pé ecoute nou? [24 mars, beF p. 237 § 3–p. 238 § 1] Nou kapav imite Jéhovah kan nou servi bann question pou aide bann dimoune pou trouve logik ki ena dan bann l’enseignement ki nou montré zot. (Mal. 1:2-10) Par exemple, kan nou pé faire enn l’etude la Bible, nou kapav pose bann question coumsa: “Couma seki nou pé examiné li en accord avek enn lot point ki nou’nn etudié avant? Kifer li important? Ki l’effet li bizin ena lor nou la-vie?” Sa bann qualité question-la aide nou bann etudiant pou servi zot “capacité pou raisonné.” (Rom. 12:1)
4. Kan nou pé enseigné, kifer li important ki nou bien konn servi bann question pou faire dimoune ki pé ecoute nou dire seki li pensé? (Prov. 20:5; Mat. 16:13-16; Jean 11:26) [31 mars, beF p. 238 § 3-5] Kan bann dimoune reponn bann question, zot kapav zis dire seki zot pensé nou envie tendé. Mais pou nou kapav aide zot vrai-mem, nou bizin essaye koné ki zot pensé vrai-mem. Nou kapav faire sa kan nou servi bann mem qualité question ki Jésus ti posé ki trouve dan Matthieu 16:13-16 ek Jean 11:26.
5. Kan nou pé enseigné, kifer li important ki nou servi bann comparaison? (Gen. 22:17; Jér. 13:11) [21 avril, beF p. 240 § 1-3] Avek zis dé-trois mot, nou kapav crée dan l’esprit bann dimoune bann zimage ki capté zot l’attention, ki pousse zot pou reflechi ek ki touche zot bann sentiment. Dan la Bible ena beaucoup comparaison. Par exemple, enn dimoune ki lire Parole Bondié regulierement li “pareil couma enn pié ki’nn planté dan bord bann canal de l’eau,” ek enn mauvais dimoune li “pareil couma enn lion” ki contigne veillé pou li kapav attrape so victime. (Ps. 1:3; 10:9) Defois, li bon ki nou augmente valeur sa comparaison-la kan nou donne enn ti l’explication.
EXPOSÉ NO. 1
6. Cite certain principe ki kapav guide nou ki trouve dan livre Marc ek ki pou aide nou gagne la-vie kan Royaume Bondié pou regné? [10 mars, siF p. 186 § 32] L’Evangile Marc mette l’accent lor l’importance pou ena enn l’esprit sacrifice, pou prend bann decision bien ferme si necessaire pou ki nou pa tombé, ek pou reste humble ek laisse nou enseigné pareil couma enn zenfant. (Marc 8:35; 9:43-48; 10:13-15) Li attire l’attention aussi lor ki quantité li difficile pou bann ki ena l’argent “pou rente dan royaume Bondié.” (Marc 10:23-25) Li montré nou aussi ki, garde deux pli grand commandement ki existé, ena pli valeur ki offert enn quantité sacrifice. (Marc 12:28-34)
7. Couma l’esprit saint aide bann serviteur Bondié zordi? (Jean 14:25, 26) [24 mars, beF p. 19 § 2-3] L’esprit saint pa faire nou konn bann kitsoz ki jamais nou’nn aprann, mais li aide nou kan li faire nou rappel bann kitsoz important ki nou’nn aprann avant.
8. Ki pli grand bienfait nou gagné kan nou lire? [31 mars, beF p. 21 § 3] Kan nou lire sa kapav aide nou pou “trouve connaissance Bondié.” (Prov. 2:5) Si nou envie grandi lor plan spirituel, sa pou depann beaucoup lor nou lecture Parole Bondié. Dan beaucoup l’aspect nou service pou Bondié, nou bizin lire. Nou lire la Bible ek bann publication ki basé lor la Bible dan nou bann reunion ek dan predication.
9. Ki vedir etudié? [14 avril, beF p. 27 § 3–p. 28 § 1] Etudié vedir plus ki zis lire la-haut la-haut. Kan nou etudié nou examine enn sujet en detail ek avek beaucoup l’attention. Sa vedir ki nou bizin analyse seki nou pé lire ek comprend bann raison kifer finn dire tel ou tel kitsoz. Etudié vedir aussi medité lor signification seki nou pé lire, ki sa aprann nou lor Jéhovah ek lor so projet, ek couma sa kapav aide nou pou discerné entre seki bon ek mauvais. Ek aussi couma nou kapav applik seki nou aprann, ek servi sa pou aide lezot.
10. Couma eski l’Evangile Luc faire nou gagne plus confiance ki bann l’Écritures hébraïques zot inspiré par Bondié? [21 avril, siF p. 192 § 30-1] L’Evangile Luc cite beaucoup l’exemple concernant realisation exact bann prophetie ki trouve dan bann l’Écritures hébraïques. Nou kapav trouve sa kan nou compare Luc 4:17-19 avek Isaïe 61:1, 2; ek kan nou compare Luc 18:32, 33 avek Psaumes 22:7; Isaïe 50:6; 53:5-7; ek Yona 1:17. Bann parole Jésus ki trouve dan Luc 24:44, 45 confirmé ki bann l’Écritures hébraïques zot inspiré par Bondié.
LECTURE LA BIBLE TOULÉ-SEMAINE
11. Kifer Jésus ti corrige enn missié kan li ti appel li “Bon Enseignant”? (Marc 10:17, 18) [3 mars, wCE 08 1/2 “Parole Jéhovah vivant—Point biblik interessant dan livre Marc”] Kan li’nn refuse accepté sa titre ki ti flatte li-la, Jésus ti donne la gloire Jéhovah ek li ti montré ki vrai Bondié Li-mem ki la source tou bann bon kitsoz. En plus, Jésus ti attire l’attention lor enn verité bien important: Zis nou Createur tousel ki ena droit pou decidé ki kitsoz ki bon ek kitsoz ki mauvais.
12. Concernant nation Israël, ki kitsoz Jésus ti montré kan li ti servi enn pié figue? (Marc 11:12-14, 20, 21) [3 mars, wF 03 15/5 p. 26 § 2-3] Bann premier figue apparette ensam avek bann feuille—ek defois mem avant ki bann feuille developpé. Parski sa pié-la ti ena feuille mais pa ti ena okenn fruit, sa ti montré ki li pa ti vaut nanyin. Pareil couma sa pié figue ki pa ti rapporte nanyin mais ki ti parette bien joli-la, bann Juif en tant ki nation ti pé donne enn fausse l’apparence. Mais zot pa ti’nn produire bann fruit ki en accord avek volonté Bondié, ek finalement zot ti rejette prop Garson Jéhovah. Jésus ti maudit sa pié figue ki pa ti rapporté-la, ek lendemain bann disciple ti remarké ki li ti’nn fini sec. Sa pié ki’nn sec-la ti represente bien couma dan enn tigit lé-temps encore Bondié ti pou rejette bann Juif en tant ki so peuple ki li ti choisir.
13. Kan l’ange Gabriel ti dire ki Marie pou ‘tombe enceinte’ grace a l’esprit saint ki pou vinn lor li ek puissance Bondié ki pou couvert li avek so l’ombrage, ki sa bann parole-la ti montré? (Luc 1:30, 31, 34, 35) [17 mars, wCE 08 1/3 “Parole Jéhovah vivant—Point biblik interessant dan livre Luc”; itF-2 p. 20 § 3] Marie ti tombe enceinte. Alors sa montré ki Jéhovah ti faire en sorte ki enn ovule ti fecondé dan ventre Marie. Li ti faire sa kan li ti transfere la vie so Garson premier-né depuis dan le ciel lor la terre. (Gal. 4:4) C’est zis dan sa fason-la ki sa zenfant-la ti pou kapav reste sa mem dimoune ki li ti été kan li ti dan le ciel en tant ki la Parole-la. C’est zis dan sa fason-la aussi ki li ti pou kapav vinn prop garson Marie ek coumsa vinn enn vrai descendant so bann ancetre Abraham, Isaac, Jacob, Juda ek le roi David ek vinn heritier legal sa bann promesse ki Bondié ti faire zot-la. (Gen. 22:15-18; 26:24; 28:10-14; 49:10; 2 Sam. 7:8, 11-16; Luc 3:23-34)
14. Eski bann disciple Jésus vrai-mem ti pé faire ‘seki pa gagne droit faire pendant sabbat’? (Luc 6:1, 2) [24 mars, gtF 31] Non, zot pa ti pé al kont la loi Jéhovah lor sabbat. Bann Pharisien ti pretann ki kan zot ti pé casse la grain cereale ek frotte sa dan zot la-main pou zot mangé apré, coumadir zot ti pé recolté ek batte bann cereale-la. Mais zot l’interpretation strict lor seki travail vedir, ti faire sabbat vinn enn kitsoz ki lourd, alors ki li ti bizin enn l’occasion kot zot ti dan la joie ek enn l’occasion pou fortifié zot lor plan spirituel. Alors Jésus ti dementi zot bann accusation kan li ti cite bann l’exemple biblik pou montré ki Jéhovah jamais ti ena l’intention pou applik So la-loi lor sabbat dan enn fason severe coumsa. (Mat. 12:3-5)
15. Ki leson nou kapav tiré ar conseil ki Jésus ti donne Marthe? (Luc 10:40-42) [7 avril, wF 99 1/9 p. 31] Nou tou nou bizin ‘choisir pli bon part’ kan nou donne priorité bann kitsoz spirituel. Si nou verifié bann kitsoz ki pli important, nou pou gagne faveur Jéhovah ek so benediction. (Phil. 1:9-11)