Revision Lekol Ministere Theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 31 décembre 2007. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 5 novembre ziska 31 décembre 2007.
TECHNIK ORATOIRE
1. Ki bann point nou bizin garde dan nou l’esprit pou nou sur ki nou conclusion efficace? [beF p. 220 § 4–p. 221 § 3] Fodé ki nou conclusion ena enn rapport direct avek theme nou devoir. Nou bizin explik l’auditoire seki zot bizin faire ek encourage zot pou faire sa. Fodé ki nou bann dernier phrase montré ki nou pé arrive a la fin nou devoir ek fodé nou dire sa bann parole-la avek sincerité ek conviction.
2. Couma nou kapav assure-nou ki seki nou dire kan nou preché, li exact? [beF p. 223 § 2-4]Avant nou commence preché, nou bizin bien konn sa sujet lor ki nou envie kozé-la. Mazinn bann question ki bann dimoune kapav posé, ek prepare bann reponse ki basé lor la Bible. Si enn dimoune pose nou enn question ek nou pa’nn preparé pou sa, fodé pa nou essaye devine bann reponse. Nou bizin plutot faire recherche ek retourne guette dimoune-la. (Prov. 15:28)
3. Kan nou ena pou presente enn sujet dan reunion, couma eski nou montré ki nou reconette ki la congregation li couma “enn colonne ek enn support pou la verité”? (1 Tim. 3:15) [beF p. 224 § 1-4] Pou ki nou kapav soutenir la verité, li important ki nou comprend bien sens bann verset ki nou envie servi. Nou bizin prend en consideration zot contexte ek dan ki but finn ecrire zot. Kan nou servi bien bann zouti ki l’esclave fidel ek avisé donne nou pou etudié, nou kapav assure-nou ki nou bann sujet basé lor “model bann bon parole” ki en accord avek tou bann la-verité ki ena dan la Bible. (2 Tim. 1:13)
4. Kifer li important ki nou verifié si bann renseignement ki nou donné, zot exact, ek couma nou kapav faire sa? [beF p. 225 § 1-2] L’auditoire kapav ena doute lor nou l’enseignement si nou dire bann kitsoz ki pa vrai ek si nou exagere bann detail. Zot kapav aussi repete bann renseignement ki fausse ek lerla sa pou encore pli grave. Enn fason pou nou sur ki nou bann renseignement exact, ki li bann chiffre, bann kitsoz ki pé arrivé, ou-soit bann kitsoz ki ena dan l’information, ou-soit bann l’experience, nou bizin prend zot dan bann source ki sur.
5. Kan nou enseigné, couma nou kapav aide lezot pou comprend pli bien seki nou ena pou dire zot? [beF p. 226 § 3–p. 227 § 1] Nou-mem nou bizin bien comprend nou sujet en premier, pou nou kapav faire lezot comprend. Li pli bon ki nou pa noye nou l’auditoire avek bann detail inutile. Fodé aussi ki nou prend le temps pou lire ek explik bann verset important au lieu ki nou zis lire bann verset vite-vite enn derriere lot.
EXPOSÉ NO. 1
6. Ki preuve nou ena ki recit Yona, li vrai? [siF p. 153 § 3] Jésus ti montré ki ena bann vrai prophetie dan livre Yona. Li ti koz lor Yona couma enn dimoune ki’nn existé vrai-mem ek li ti donne l’explication deux l’evenement prophetik ki ena dan livre Yona. (Mat. 12:39-41; 16:4; Luc 11:29-32) Bann Juif inn toujours compte livre Yona parmi zot bann livre inspiré ek zot considere sa livre-la couma enn livre historik. Nou koné ki sa recit-la vrai par fason ki Yona raconte bann kitsoz franc sans cachiette nanyin lor li.
7. Ki prophetie Mika ena enn rapport avek Royaume Bondié ek Jésus? [siF p. 158 § 18] Naissance Jésus dan Bethléhem, pareil couma sa ti annoncé dan Mika 5:2, montré bien ki contexte sa verset-la, li enn prophetie ki ena enn rapport ar Royaume Bondié. Jésus li sa kikenn ki pou sorti dan Bethléhem (Lakaz di-Pain) pou amenn bann bienfait ki donne la vie pou tou bann ki ena la foi dan so sacrifice. C’est Jésus ki “pou agir couma enn berger avek la force Jéhovah” ek c’est li ki pou vinn grand ek ki pou faire la paix regné ziska dan boute la terre. (Mika 5:4; Jean 6:33-40)
8. Ki preuve nou ena ki livre Habaqouq inspiré par Bondié? [siF p. 161 § 4] L’apotre Paul ti montré ki li ti reconette ki sa prophetie-la ti forme partie dan bann l’Ecriture inspiré kan li ti cite Habaqouq 1:5 ek li ti dire ki sa ti “seki finn dire dan bann Prophete.” (Actes 13:40, 41) Dan bann lettre ki li ti ecrire, Paul ti faire reference plusieurs fois ar livre Habaqouq. (Rom. 1:17; Gal. 3:11; Héb. 10:38) En plus, seki Habaqouq ti dire kont Juda ek Babylone ti realisé ek sa vrai-mem montré ki Habaqouq enn vrai prophete Jéhovah ki ti koz lor nom Jéhovah ek pou So la-gloire.
9. Kifer nou kapav dire ki en 520 a.n.l, bann Juif pa ti encore fini travail ki zot ti supposé faire apré ki zot ti’nn sorti en exil? (Hag. 1:4) [siF p. 166 § 3] Pendant apepré 17 an apré ki zot ti’nn sorti en exil dan Babylone, bann Juif pa ti reussi fini bann travail reparation ki ti ena pou faire dan temple. Pendant tou sa bann l’année-la, zot ti laisse l’opposition, zot prop l’indifference ek materialisme empeche zot reconstruire temple, seki faire ki sa ti empeche zot fini travail ki zot ti supposé faire apré ki zot ti’nn sorti en exil.
10. Zekaria koz plusieurs fois lor enn jour extraordinaire. Ki sa jour-la sa? [siF p. 172 § 26] En rapport avek Jour Jéhovah, Zekaria repete l’expression, “sa jour-la,” 20 fois. Kan nou examine fason ki li servi sa l’expression-la, sa montré nou ki sa jour-la, c’est jour kan Jéhovah pou efface nom tou bann zidole ek pou detruire tou bann fausse prophete. (Zek. 13:2, 4) C’est jour kan Jéhovah pou combatte kont bann nation ki rod laguerre ek Li pou jette confusion dan zot camp letan Li pou detruire zot ek faire ‘bann l’endroit ki trouve entre so bann montagne’ vinn enn refuge pou so peuple. (Zek. 12:8, 9; 14:1-5, 13)
LECTURE LA BIBLE TOULÉ-SEMAINE
11. Couma prophetie Yoël concernant bann insecte ki rente partout ti realisé dan premier siecle, ek couma sa pé realisé zordi? (Yoël 2:1-10, 28) [wCE 07 1/11 “Parole Jéhovah vivant—Point biblik interessant dan livre Yoël ek Amos”] Jour la Pentecôte l’an 33 n.l., l’apotre Pierre ti cite prophetie Yoël ek ti faire so l’application ar bann chrétien oint ki ti commence koz en langue concernant bann kitsoz extraordinaire lor Bondié. (Actes 2:11, 16-20) Zot travail predication dan premier siecle ti troublé bann chef fausse religion. (Actes 5:17, 27-29) Zordi aussi pareil. Nou travail predication aussi demaské la fausse religion, ek so bann membre finn considere nou predication couma enn invasion.
12. Ki sa ‘panier fruit l’été-la’ vedir? (Amos 8:1, 2) [wCE 07 1/11 “Parole Jéhovah vivant—Point biblik interessant dan livre Yoël ek Amos”] Sa ‘panier fruit l’été-la’ ti vedir ki la fin ti pré pou royaume dix tribu Israël ki pa ti fidel, parski c’est kan recolte pé al fini ki ramasse bann fruit l’été. La fin ti vini vrai-mem en 740 a.n.l., kan bann Assyrien ti prend la ville Samarie, moins ki 100 an apré ki Amos ti inspiré pou ecrire so prophetie.
13. Dan ki fason Jéhovah ti ‘regrette malheur ki Li ti dire Li pou amenn lor bann habitant Ninive,’ ek ki l’effet sa bizin ena lor nou? (Yona 3:10) [wCE 03 1/8 p. 17-18] Jéhovah ‘ti regretté’ dan sens ki Li ti change so fason agir envers bann habitant Ninive parski zot ti’nn quitte zot mauvais conduite. Bondié pa ti change so bann principe, mais plutot so decision, kan Li ti trouve bann habitant Ninive repenti. (Yona 4:11) Jéhovah encore toujours interessé avek bann ki pankor commence servi Li ek Li donne zot le temps pou repenti ek coumsa evite malheur kan Li pou amenn so jugement. Fodé ki nou conscient ki nou bizin averti zot, pareil couma Yona ti averti bann habitant Ninive.
14. Ki sa vedir marche au nom Jéhovah? (Mika 4:5) [wCE 03 1/9 p. 14 § 19] Marche au nom Jéhovah pa vedir zis dire ki Li nou Bondié. Sa demann nou aussi plus ki zis participe dan bann reunion ek dan predication, mem si c’est bann activité ki bien important. Marche au nom Jéhovah vedir ki nou voué-nou ar Li ek ki nou faire tou seki nou kapav pou servi Li avek fidelité parski nou content Li avek tou nou leker.
15. Dan nou lepok, kan ek couma Jéhovah inn vinn dan so “temple” pou faire so jugement? (Mal. 3:1-3) [reF p. 32 l’encadré; jdF p. 179 § 3–p. 181 § 6] Trois an et demi apré ki Jéhovah ti’nn choisir li couma le Roi, Jésus ti vinn dan temple Jérusalem en 33 n.l. ek li ti mette dehors bann ki ti pé faire temple vinn enn caverne voleur. Pareil coumsa-mem, trois an et demi apré ki li’nn prend pouvoir dan so Royaume dan le ciel, li ti vinn dan temple spirituel en 1918 en tant ki representant Jéhovah. Li ti rejette bann chef religieux la chrétienté, ki ti forme partie dan enn system religieux ki ti ena enn dette di-sang ek ti coupable l’adultere spirituel. En mem temps, Jéhovah ti commence purifié bann vrai chrétien couma ti bizin; li ti purifié zot l’adoration, zot bann pratik ek zot bann l’enseignement.