Adore Jéhovah en famille
1 Dan lepok biblik, bann membre dan enn famille ti faire beaucoup kitsoz ensam. Zot ti faire bann l’ouvrage ensam ek pli important, zot ti adore Jéhovah en famille. (Lév. 10:12-14; Deut. 31:12) Zordi, dan beaucoup l’endroit, bann membre dan la famille faire bien tigit kitsoz ensam. Selman, bann chrétien koné ki valeur bann l’activité ki faire en famille ena, surtout en rapport avek nou l’adoration. Pena doute ki sa Kikenn ki’nn crée la famille-la content pou trouve bann famille adore Li dan l’unité!
2 Preche ensam: Kan bann membre enn famille preche la bonne nouvelle ensam, sa faire zot vinn pli uni. A cause sa-mem, mem si li pou preche avek lezot dan congregation, enn ancien pou preche souvent aussi avek so madame ek so bann zenfant. (1 Tim. 3:4, 5) Malgré ki bann surveillant itinerant ena enn program bien rempli, pourtant zot reserve le temps pou preche avek zot madame.
3 Bann parent ki preche avek zot zenfant kapav aide zot pou progressé pou vinn bann proclamateur. Bann zenfant pa pou zis trouve la joie ek satisfaction ki zot parent gagné dan predication, mais zot pou trouve aussi zot parent manifesté zot l’amour pou Jéhovah ek pou bann dimoune. (Deut. 6:5-7) Preche avek bann zenfant pa pou perdi so valeur, mem kan bann zenfant grandi. Enn couple ki ena trois garson ki ena entre 15-21 an contigne preche avek zot regulierement. Papa-la dire: “Chaque fois nou montré zot enn nouveau kitsoz. Ek nou faire sur ki sa encourage zot ek zot apprecié sa moment-la.”
4 Faire preparation ensam: Bann famille finn trouve sa utile pou prepare predication ensam. Souvent bann zenfant content faire bann ti demonstration avek lezot membre la famille, ek sakenn so tour, zot amenn role enn proclamateur ou-soit dimoune avek ki enn proclamateur pou kozé. Certain prend dé-trois minute apré zot l’etude familial pou faire sa.
5 Nou la-joie augmenté kan nou participe avek bann dimoune ki nou content dan bann l’activité important ki donne nou satisfaction. Bann famille vrai-mem gagne beaucoup la-joie kan zot travail ensam dan predication porte-en-porte, pou faire bann visite ek pou faire bann l’etude! Alors ki ou pé adore Jéhovah ensam avek ou famille, ou kapav dire avek la joie: “Moi ek mo famille, nou pou servi Jéhovah.”—Jos. 24:15.