Nou tou kapav participé pou faire bann nouveau disciple
1 Pou ki enn nouveau disciple vinn dan la verité, sa pa depann zis lor zeffort enn sel dimoune. Jéhovah kapav servi tou “bann ki travail ensam” avek Li pou aide bann etudiant la Bible grandi lor plan spirituel. (1 Cor. 3:6-9) Sakenn parmi nou, aide bann nouveau, pa zis par nou bann reponse sincere dan reunion, mais aussi par nou bon conduite. Oui, nou conduite montré dan enn fason bien clair ki l’esprit saint Jéhovah pé agir vrai-mem dan nou la-vie. (Jean 13:35; Gal. 5:22, 23; Éph. 4:22, 23) Ki nou kapav faire encore pou aide bann nouveau?
2 La congregation: Nou tou kapav manifesté enn l’interet pou bann ki commence vinn reunion kan nou prend l’initiative pou accueil zot bien ek pou koz avek zot avant ek apré bann reunion. Guette seki enn missié rappel premier fois li ti vinn la salle: “Dan enn sel jour, mo finn joinde plus dimoune ki ena enn l’amour sincere pou zot prochain, ki seki mo ti habitué joinde dan l’eglise kot mo ti allé depuis mo tipti. Pourtant mo pa konn zot ditou. Li ti clair ki mo ti’nn trouve la verité.” Sa missié-la ti baptisé sept mois apré so premier reunion.
3 Felicite sincerement enn etudiant a mesure ki li faire bann progré spirituel. Eski li pé faire face ar l’opposition? Eski li pé vinn reunion regulierement? Eski li’nn reussi gagne courage pou rann enn reponse dan reunion? Eski li’nn donne so nom pou participe dan Lekol ministere theocratik ou-soit eski li’nn commence preché? Felicite li pou progré ki li’nn faire. Sa pou encourage li.—Prov. 25:11.
4 Proclamateur ki conduire l’etude: Certain proclamateur finn kapav aide zot bann etudiant pou faire plus connaissance avek lezot membre la congregation kan zot finn invite bann proclamateur pou accompagne zot dan l’etude. Invite etudiant-la pou assisté reunion pli vite possible. Faire ou enn devoir pou presente li avek lezot kan li commence vinn reunion. Eski li pé combatte enn mauvais l’habitude, couma par exemple fumé? Eski ena dimoune dan so famille ki pa d’accord ki li etudié? Li kapav gagne l’encouragement si li koz avek enn proclamateur ki’nn passe dan mem situation ki li ek ki’nn reussi faire face ar sa l’epreuve-la.—1 Pierre 5:9.
5 Bann nouveau bizin enn l’aide spirituel avek la congregation. Nou tou kapav aide zot pou progressé kan nou montré enn l’interet sincere pou zot.