Revision Lekol Ministere Theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 30 avril 2007. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 5 mars ziska 30 avril 2007. [Note: Kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du Ministère, p. 36-7.]
TECHNIK ORATOIRE
1. Ki nou kapav faire pou ki plan nou discours reste simple? [beF p. 168 § 3] Fodé ki sa dé-trois point principal ki nou pou developpé-la li bien visible lor nou plan. Apré chaque point principal, nou bizin ecrire bann l’idée ek bann verset ki nou envie servi kan nou pé developpe sa point-la. Nou l’objectif c’est pou rappel bann l’idée, pa zis bann mot.
2. Cite quatre fason pou presente nou sujet dan enn fason logik. [beF p. 170 § 3–p. 172 § 4] (1) Organise nou bann l’idée en different section; (2) la cause enn kitsoz ek so consequence; (3) problem ek solution; ek (4) donne bann detail dan l’ordre ki zot inn arrivé.
3. Ki nou bizin garde bien dan nou l’esprit kan nou pé bizin decidé ki kitsoz nou pou ajouté dan nou discours? [beF p. 173 § 1-2] Theme nou discours, kisannla ki dan l’assistance, ek avek ki l’objectif nou pé presente nou sujet, sa c’est bann kitsoz ki bizin determiné ki bann detail nou pou choisir. Mem si nou kapav ajoute certain l’idée interessant ki moins important, li pou bon ki nou rappel ki li pli facile pou mazinn dé-trois point important ki bien developpé, ki enn quantité l’idée ki presenté enn derriere lot.
4. Ki bann bienfait kapav gagné kan faire enn discours dan enn fason improvisé? [beF p. 175 § 2-4] En principe enn dimoune ki faire enn discours improvisé, ena tendance pou koz avek so leker, ek discours-la ena plus sentiment. A cause sa, bann ki pé ecouté, pou trouve discours-la pli interessant. Sa method-la aide nou aussi pou garde enn bon contact visuel avek bann dimoune ar ki nou pé kozé. Bann ki pé ecoute nou pou senti ki nou konn bien nou sujet ek ki nou sur seki nou pé dire. Kan enn orateur faire enn discours dan enn fason improvisé, sa permette li faire bann ti changement ek ajoute bann detail kan bizin.
5. Kifer li important ki nou kozé coumadir nou pé faire enn conversation, ek couma nou kapav developpe sa qualité-la? [beF p. 179 § 4, l’encadré; p. 180, l’encadré] Kan nou kozé coumadir nou pé faire enn conversation, sa mette bann dimoune a l’aise ek aide zot pou accepté seki nou dire. Nou kapav developpe sa qualité-la kan nou evite faire bann phrase compliké, ek kan nou pa servi bann mot exact pou exact couma ena lor papier kan nou pé faire enn discours. Kan nou koz avek nou leker ek nou pa concentré lor nou-mem mais plutot lor valeur ki nou message ena, nou pou pli kapav kozé coumadir nou pé faire enn conversation.
EXPOSÉ NO. 1
6. Kan enn frere ena point biblik interessant pou faire, couma li bizin prepare-li? [beF p. 47 § 3-4] Si possible, li bizin lire portion la Bible ki finn prevoir, au moins enn semaine avant. Apré sa li bizin reflechi lor la congregation ek lor bann besoin ki la congregation ena ek koz sa dan la priere. Kan li pé faire bann recherche lor bann verset ki li’nn choisir, li kapav trouve bann renseignement ki aide li pou comprend contexte sa verset-la, bann explication lor realisation bann prophetie, bann analyse ki montré seki certain verset revelé lor Jéhovah, ou-soit bann lartik kot inn examine bann principe.
7. Grace a ranson Jésus Christ nou gagne beaucoup bienfait, mais ki kitsoz ki beaucoup pli important ki sa bann bienfait-la? [wF 05 1/11 p. 14 § 1] Kitsoz pli important concernant la ranson, c’est pa bann bienfait ki bann dimoune gagné grace a sa, mais plutot seki sa aprann nou lor Jéhovah. Li prouvé ki Jéhovah Li enn Bondié ki ena enn la-justice parfait, ki kapav traite avek bann dimoune imparfait ek en mem temps reste pur ek saint.
8. Couma eski enn frere bizin servi bann reference biblik ki trouve lor plan enn discours? [beF p. 53 § 1-2] Dan enn discours publik, pa necessaire lire ou-soit faire enn commentaire lor tou bann verset ki mentionné. Kan li pé faire so preparation, orateur-la bizin examine chaque verse ki cité ek choisir bann ki approprié pou so l’auditoire. Kan li pé invite l’assistance pou prend enn verset, li bizin expliké kifer li pé servi sa verset-la. Apré ki li’nn lire enn verset, li bizin garde so la-Bible ouvert, explik sa verset-la, servi bann l’exemple ek faire enn application.
9. Ki l’objectif Jésus ti ena en tant ki enn enseignant, ek couma nou kapav imite li? [beF p. 57 § 1] L’objectif ki Jésus ti ena c’est pou donne Jéhovah l’honneur, pa pou attire l’attention lor li-mem. (Jean 7:16-18) Guette l’encouragement ki li ti donne so bann disciple: “Pareil pou zot aussi, faire ki zot la-lumiere brillé devant bann dimoune, pou ki bannla trouve zot bann bon travail ek donne la gloire zot Papa ki dan le ciel.” (Mat. 5:16) Alors, kan nou pé reflechi lor seki nou pou dire ou-soit lor fason ki nou pou dire sa, li bon ki nou demann nou-mem: ‘Eski sa pou aide bann ki pé ecoute moi pou augmente zot reconnaissance pou Jéhovah ou-soit li pou attire l’attention lor moi?’
10. Kan nou pé enseigné, kifer li bon ki nou faire bann contraste? [beF p. 57 § 3-4] Pou ki enn dimoune vrai-mem vinn enn disciple Jésus, li bizin bien comprend seki pé enseigne li. Li bizin tann la verité ek trouvé couma li different avek bann lezot croyance. Nou kapav faire sa kan nou montré bann contraste ki ena entre deux l’idée. Plusieurs fois, Jéhovah ti encourage so peuple pou “faire enn difference” entre seki pur ek seki impur. (Lév. 10:9-11) Li ti dire ki bann ki ti pou servi Li dan so grand temple spirituel ti pou enseigne bann dimoune “difference entre enn kitsoz ki saint ek enn kitsoz ki ordinaire.” (Ézék. 44:23) Alors, grace a sa method-la nou l’auditoire kapav aprann beaucoup kitsoz.
LECTURE LA BIBLE TOULÉ-SEMAINE
11. Couma nou kapav faire zeffort pou applik conseil ki trouve dan Jérémie 6:16 ki encourage nou marche lor “bann chemin ki ti ena avant”? Nou kapav faire sa kan nou reste bien attaché ar “model bann bon parole” ki ti etabli par Jésus ek ki “l’esclave fidel ek avisé” pé contigne respecté. (2 Tim. 1:13; Mat. 24:45-47) Nou marche avek Bondié dan “bann chemin ki ti ena avant,” kan nou applik avek humilité, conseil ki ena dan la Bible ek dan bann publication ki basé lor la Bible. [12 mars, wCE 05 1/11 p. 29-30]
12. Kifer eski Jéhovah choisir pou cite l’exemple la cigogne ar bann Juif infidel, ek ki nou kapav aprann dan sa l’exemple-la? (Jér. 8:7) Nom hébreu sa zoiseau-la vedir “ki fidel; ki ena l’amour fidel.” Sa zoiseau-la li pa couma la plupart bann zoiseau. Male ek femelle reste ensam toute longue zot la-vie. Zot mem couve zot bann dizef ek nourri bann tipti, sakenn so tour. Leson ki bann Israélite rebelle ti bizin tiré, bizin rappel bann chrétien zordi ki zot bizin reste fidel ar zot famille ek ar Jéhovah toulé-deux. [19 mars, wF 02 1/8 p. 32]
13. Couma eski nou kapav applik Jérémie 15:17 ar fason ki nou considere bann divertissement zordi? Jérémie ti bien conscient dan ki lepok critik li ti vive ek li ti comprend ki li ti bizin rempli so mission serieux-serieux. Lepok ki li ti vive, pa ti enn lepok pou passe le temps dan bann distraction. Bann chrétien zordi proclame enn jugement lor sa lé-monde-la ek enn message ki donne l’espoir. (Mat. 24:14; 2 Pierre 3:13) Li pa l’heure pou laisse bann divertissement vinn enn priorité dan nou la-vie. [26 mars, wF 92 15/8 p. 17 § 8-9]
14. Couma eski bann dimoune zot couma l’argile dan la main nou Grand Potier, Jéhovah? (Jér. 18:5-11) Pareil couma enn potier ena pouvoir lor l’argile ek li donne li forme ki li envie, Jéhovah ena l’autorité lor bann dimoune ki finn faire ar la poussiere. (v. 6) Jéhovah kapav change fason ki Li agir avek bann dimoune, mais tou depann si zot accepté ou-soit non So parole ek So direction. (v. 7-10) Alors, nou bizin soumette-nou avek humilité ek avek tou nou leker ar direction Jéhovah pou ki Li travail nou ek servi nou dan enn bon fason. Fodé pa nou resisté ar volonté nou Grand Potier, sinon, Li pou rejette nou couma l’argile ki’nn vinn dur. (v. 11) [2 avril, wF 99 1/4 p. 22; wF 79 15/11 p. 20-1]
15. Jérémie 25:17-26 cite nou plusieurs nation dan enn certain l’ordre, kifer eski sa li important pou nou zordi? Jérémie 25:17-26 al dan mem direction ki Révélation chapitre 18 ziska 20, ek li explik bien couma bann l’evenement deroulé kan coupe colere Jéhovah passe parmi So bann l’ennemi. Pareil couma Juda, l’Égypte, ek “le roi Shéshak,” ki ti infidel, ti boire dan coupe la colere Jéhovah, bientot Babylone la Grande (parmi ena la chrétienté), ek apré bann puissance politik sa lé-monde-la, ek finalement Satan, pou konn jugement Jéhovah ki juste. [16 avril, wF 94 1/3 p. 20 § 13-14]