Enn Lettre College Central
PAREIL couma Jésus inn donne nou l’exemple, nou prié Bondié avek sincerité ek demann Li: “Ki to nom sanctifié.” Nou montré ki nou bien envie vive en harmonie avek sa la-priere-la par fason ki nou vive nou la-vie en tant ki Témoins de Jéhovah. Bien-sur, li pa assez ki nou zis konn nom Bondié. Nou bizin saisi tou l’occasion ki nou ena pou glorifié sa nom-la. Oui, nou ena pli grand privilege ki kapav ena, privilege pou porte nom Témoin de Jéhovah.—Mat. 6:9; Is. 43:10.
En accord avek Psaume 110:3, bann serviteur Jéhovah pé participe avek tou zot leker dan sa travail ki Jéhovah inn donne l’ordre pou faire-la. Kifer eski bann dimoune, n’importe ki l’age zot ena ek n’importe ki culture zot sorti, pé faire sa quantité zeffort-la—sa quantité-la dan travail predication? Premierement, c’est parski zot ena l’amour pou Bondié ek zot attaché personnellement avek Li. Deutéronome 6:5, 6 donne nou l’ordre pou content Jéhovah avek ‘tou nou leker, tou nou nâme, ek tou nou la-force.’ Sa l’amour sincere-la pousse nou pou servi nou lé-temps, nou l’energie, ek seki nou ena pou favorise bann l’interet Royaume Bondié. Ek enn fason pou nou faire sa c’est kan nou participe dan ministere autant ki nou situation permette nou.
C’est parski Jéhovah content bann dimoune ki Li donne nou l’instruction pou preche la bonne nouvelle lor so Royaume partout lor la terre. Li pa’lé ki personne perdi la vie mais Li envie ki tou dimoune repenti ar zot mauvais conduite ek tourne-zot vers zot Createur pou gagne la vie. (2 Pierre 3:9) Jéhovah dire: “Seki faire moi plaisir, c’est pa ki enn mauvais dimoune mort, mais ki li quitte so mauvais chemin ek ki li reste en vie.” (Ézék. 33:11) Kan nou pé participe dan predication, bann dimoune trouve enn preuve ki Jéhovah content nou tou. Pena doute ki c’est a cause sa-mem ki nou gagne la joie ek satisfaction kan nou participe dan sa travail important-la.
Nou aussi montré nou l’amour pou Jéhovah par fason ki nou considere la Bible, so parole ki Li’nn faire ecrire. Sans la Bible, nou pa ti pou reussi konn Bondié ek vinn proche avek Li, couma Jacques 4:8 invite nou pou faire. Nou pa ti pou koné kifer nou lor la terre ek ki l’avenir reservé pou nou. Nou pa ti pou koné ki c’est a cause Adam—nou tou nou ancetre—ki nou gagne problem. (Rom. 5:12) Nou pa ti pou konn aussi grand l’amour ki Jéhovah inn montré pou nou kan Li’nn envoye so sel garson ki Li’nn crée direct couma enn ranson pou nou. Jéhovah pé partage inpé so connaissance, so sagesse ek so l’intelligence avek nou dan beaucoup lezot fason encore. Nou considere sa cadeau ki Li’nn donne nou-la, setadir so Parole ki’nn inspiré, couma enn tresor, pa vrai? Nou reconnaissance pou sa cadeau extraordinaire-la pousse nou pou “ré-acheté le temps” pou lire, pou etudié, ek pou medite lor seki Li dire nou dan so Parole. (Éph. 5:15, 16; Ps. 1:1-3) Fodé jamais nou regrette sa lé-temps ki nou bizin prend pou lire la Bible toulé-jour. Au contraire, nou l’amour pou Jéhovah bizin attire nou vers so Parole; sa pou permette nou augmente nou connaissance lor Li ek augmente nou l’amour pou Li.
Nou finn aprann dan la Bible ki ler Adam ti faire peché kont Jéhovah, li ti’nn mette tou so bann futur descendant, [nou aussi ladan] dan enn situation bien triste ek desesperé. Mais, Bondié ti kapav ek Li’nn reussi trouve enn fason pou bann dimoune sorti dan sa situation-la kan Li’nn prend bann disposition pou assuré ki so volonté concernant la terre, realisé.—Gen. 3:15.
Pena doute ki sakenn parmi nou, nou ena enn grand desir pou sanctifié nom extraordinaire nou Bondié. A mesure ki nou aprann plus lor Jéhovah ek ki nou rann-nou compte ki Li enn Bondié extraordinaire, sa pousse nou pou coopere avek Li ek avek so l’organisation pou faire konn so grand nom ek so projet. Nou sur ki nou ena so faveur ek so benediction asterla, ek ki enn l’avenir eternel dan le monde nouveau pé attann nou.
Nou, bann membre College central, nou assure zot nou bann frere ek soeur, ki nou bien content zot. Nou ti pou content aussi faire zot koné ki nou bien apprecié bann grand zeffort ki zot pé faire pou aide maximum dimoune possible konn la bonne nouvelle pendant sa tigit lé-temps ki resté avant “la grande tribulation.” (Rév. 7:14) Kan ou faire sa, ou donne sa bann dimoune-la l’occasion ki ou-mem ou’nn gagné, setadir pou aprann konn Bondié ek Jésus—enn connaissance ki amenn vers la vie eternel.—Jean 17:3.
Zot bann frere,
College central bann Témoins de Jéhovah