Revision Lekol ministere theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 26 février 2007. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 1er janvier ziska 26 février 2007. [Note: Kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du Ministère, p. 36-7.]
TECHNIK ORATOIRE
1. Pendant enn discours, kan bizin faire bann application pratik, ek dan ki fason bizin faire li? [beF p. 158 § 1-3] Fodé pa ki nou attann zis la fin nou sujet pou faire bann application pratik; au contraire, nou bizin faire sa toute longue nou sujet. Depuis commencement-mem nou bizin capté l’interet nou l’auditoire ek faire tou pou ki zot senti-zot concerné par seki nou pé dire. Kan nou pé faire enn application, nou bizin faire li dan enn fason positif ek montré ki nou pé ‘mette-nou dan place nou camarade.’ (1 Pierre 3:8) Au lieu ki nou faire bann ki pé ecoute nou senti zot coupable, nou l’objectif c’est pousse zot pou montré l’amour ek faire bann bon action ek favorise “l’obeissance par la foi.” (Rom. 16:26)
2. Kifer eski li important ki nou aide lezot pou trouve valeur pratik nou sujet ek couma nou kapav faire sa? [beF p. 159 § 2-3] Si sa dimoune ki pé ecoute nou-la pa senti-li concerné personnellement par seki nou pé dire, bien vite li pou coupe nou conversation. Nou aide bann dimoune pou trouve valeur pratik nou message kan nou mette l’accent lor bann bienfait ki zot kapav gagné kan zot marche dan chemin Jéhovah ek kan zot applik bann principe la Bible dan zot la-vie. Coumsa, nou pou pousse zot pou faire bann changement ki bizin pou faire Jéhovah plaisir. (Is. 48:17, 18)
3. Kifer nou bizin bien choisir nou bann mot? [beF p. 160] Kan nou bien choisir nou bann mot, nou pé montré respé pou message ki nou pé annoncé ek pou bann dimoune avek ki nou pé kozé. (1 Pierre 2:17) Bann mot zot bann zouti ki puissant ki kapav soit ‘blesse’ enn kikenn ou-soit encourage li. (Prov. 12:25; 15:1) Li vrai ki nou bizin faire zeffort pou trouve bann bon parole dan l’heure ki bizin, mais sa zeffort-la vaut la peine, parski nou bann parole kapav influence fason ki lezot reagir. (Eccl. 12:10)
4. Ki pou aide nou pou servi different mot approprié? [beF p. 161 § 5-6; p. 162 § 1, 4] Kan nou trouve bann mot ki nou pa bien comprend, li bon ki nou rod zot signification dan enn dictionnaire, ek nou faire grand zeffort pou servi zot dan bann situation approprié. Sa pou aide nou pou servi mot ki exact ek augmente nou vocabulaire, coumsa nou bann parole pou encourage bann ki pé ecoute nou ek pou pousse zot pou agir. (Prov. 15:2)
5. Ki bann l’avantage nou gagné kan nou faire enn sujet dapré enn plan ki nou’nn preparé dan nou l’esprit ou-soit enn plan lor papier? [beF p. 166 § 1-3] Si nou servi enn plan au lieu ki nou ecrire tou lor nou papier, nou pou concentré plus lor nou l’auditoire, nou pa pou zis concentré lor seki nou finn ecrire. Kan nou servi enn plan pou faire enn discours, nou pli kapav koz avek tou nou leker ek dan enn fason naturel; ek sa pou aide nou pou touche leker bann ki pé ecoute nou. Kan enn orateur servi enn plan ek li adapté so sujet ar so l’auditoire, bann ki pé ecoute li, zot senti ki li pé koz avek zot personnellement.
EXPOSÉ NO. 1
6. Ki nou bizin faire kan nou pé prepare enn lecture? [beF p. 43 § 2, 4] Kan nou pé prepare enn lecture, nou bizin lire fort kan nou pratik portion ki nou ena pou lire ek faire enn zeffort pou comprend seki nou pé lire. Sa vedir essaye comprend signification chaque phrase ek l’idée ki developpé dan chaque paragraphe. Coumsa nou pou kapav exprime bann pensée ki exact, avek bann sentiment ki approprié. Si li possible, li bon aussi ki nou verifié dan enn dictionnaire couma bien prononce bann mot ki nou pa trop koné.
7. Ki kitsoz ki bien important si nou envie developpe mem l’amour ki Jéhovah ena pou seki bon ek la haine pou seki mauvais? (Héb. 5:14) [wCE 05 1/1 p. 21 § 11] Nou bizin bien comprend fason ki Jéhovah considere seki bon ek seki mauvais. Nou comprend sa zis kan nou etudié Parole Bondié, la Bible. Prié, medite bien lor seki nou aprann, ek suive bien bann conseil ki “l’esclave fidel et avisé” donne nou, sa aussi pou aide nou pou gagne la maturité. (Mat. 24:45-47)
8. Ki nou bizin rappel, si nou arrivé lire enn kitsoz dan la Bible ki faire nou douté si vrai-mem Bondié finn agir avek la justice? [wCE 05 1/2 p. 29 § 7] Jéhovah finn faire pli grand sacrifice ki kapav ena, en accord avek so bann principe ki droite ek juste: Li finn accepté ki so prop Garson konn enn la-mort terrible. Alors, nou ena assez raison ki convaink nou ki Jéhovah faire toujours seki droite ek jamais Li pa al kont so bann principe ki juste. (Job 37:23)
9. Ki nou bizin faire si la loi bann zom al kont la loi Bondié? [wCE 05 1/5 p. 5 § 9] Nou l’amour pou Parole Bondié pou aide nou reste fidel ar Jéhovah. (Ps. 119:18, 20, 24) Pareil couma bann zapotre Jésus Christ ki ti gagne persecution, nou aussi nou pou dire: “Nou bizin obeir Bondié couma enn chef plutot ki bann zom.” (Actes 5:29)
10. Couma eski Isaïe ti attire l’attention lor Royaume ki pou dirigé par Messie ek lor Jean le Baptiste, sa kikenn ki pou vinn avant-la? [siF p. 123 § 35] Enn vierge ti donne naissance Jésus ek li ti gagne nom “Emmanuel,” seki ti realise prophetie Isaïe 7:14. (Mat. 1:22, 23) Isaïe 9:6, 7 ti realisé kan Jésus ti gagne trone David, pareil couma sa ange-la ti dire Marie. (Luc 1:32, 33) Toulé-quatre ecrivain l’Evangile ti cite Isaïe 40:3 pou montré ki Jean le Baptiste, li-mem sa kikenn ki ‘pé criyé dan desert-la.’ (Mat. 3:1-3; Marc 1:2-4; Luc 3:3-6; Jean 1:23) Kan Jésus ti baptisé, li ti vinn le Messie—sa Kikenn ki Jéhovah inn choisir-la, li-mem ti-branche ou-soit racine Jessé. Li ti pou règne lor bann nation. Pou realise Isaïe 11:1, 10, zot bizin mette zot l’espoir en li. (Rom. 15:8, 12)
LECTURE LA BIBLE TOULÉ-SEMAINE
11. Ki été “couverture” ek “la-toile” ki mentionné dan Isaïe 25:7? Dan prochain verset, Isaïe dire ki Jéhovah ‘vrai-mem pou faire la mort disparette pou touletan.’ Pareil couma enn molton bien lourd, peché ek la mort finn couvert ek finn touffe tou dimoune. Kan, bann dimoune obeissant ek fidel pou profite dan enn fason complet bann bienfait sacrifice Jésus, lerla sa poids-la pou enlevé. Isaïe 25:8 dire: “Souverain Seigneur Jéhovah pou souye larme lor tou bann figure.” [1er janv., wF 06 1/12 “ La Parole de Jéhovah est vivante : Points marquants du livre d’Isaïe—I ”]
12. Couma bann dimoune kapav “trouve” ek “tann” Jéhovah? (Is. 30:20, 21) Jéhovah faire bann dimoune konn Li a travers so bann prophete, couma Isaïe ek lezot encore, ek nou trouve seki sa bann prophete-la finn ecrire dan la Bible. Zordi, Jéhovah koz ar nou par so Parole, la Bible, ki finn ecrire bien longtemps ek ki couma enn la voix ‘derriere nou,’ ou-soit dan enn certain sens, dan le passé. Li faire sa aussi a travers so “esclave fidel et avisé” ki finn donne nou la nourriture spirituel “dan l’heure ki bizin” pendant tou sa bann l’année-la. (Mat. 24:45) Kan nou agir en accord avek sa connaissance-la, nou “marche” dan enn chemin ki faire nou gagne faveur Jéhovah. [8 janv., ipF-1 p. 310 § 18]
13. Vrai ou-soit fausse: Hizqiya ti faire enn la-priere sincere, ki nou kapav trouve dan Isaïe 38:3, surtout parski li ti envie vive pli longtemps. Fausse. Kan bann Assyrien ti menace pou prend Jérusalem, seki surtout ti tracasse Hizqiya, c’est deshonneur ki sa destruction-la ti pou jetté lor nom Jéhovah. Letan li’nn aprann ki li pou mort a cause so maladie, Hizqiya ti tracassé. Li ti demann li-mem ki si arrivé li mort sans li laisse enn heritier, ki ti pou arrive descendance royal David, ek kisannla ki ti pou faire la guerre kont bann Assyrien. (Is. 37:20; 39:7) Alors, Jéhovah ti jugé ki li bon ki Li delivré Hizqiya ek Jérusalem dan la-main bann Assyrien, ek ajoute 15 an dan la vie Hizqiya, seki finn donne li l’occasion pou grandi enn heritier trone David. (Is. 38:5, 6) [22 janv., wF 07 15/1 “ La Parole de Jéhovah est vivante : Points marquants du livre d’Isaïe—II ”]
14. Couma bann Israélite ti kapav servi couma bann temoin pou Jéhovah, ek couma nou kapav imite zot? (Is. 43:10) Bann Israélite ti kapav servi couma bann temoin kan zot ti ‘raconte louange’ Jéhovah. (Is. 43:21) Kan zot ti fini liberé dan Babylone, zot ti kapav loué Jéhovah ek prouvé ki Li-mem Bondié vrai prophetie ek ki bann bondié Babylonien, zot pa bann bondié. (Is. 43:14) Zordi, nou kapav attire l’attention lor realisation bann prophetie la Bible, ek sa li enn base solid pou ena confiance dan seki Jéhovah inn annoncé pou l’avenir. [29 janv., wF 95 1/9 p. 12 § 17-18]
15. En accord avek model prophetik ki nou trouvé dan Isaïe 52:11, 12, ki bizin faire pou kapav ‘sarié bann kitsoz ki servi dan temple Jéhovah’? Bann Israélite ti bizin quitte tou dan Babylone ek reste pur lor plan spirituel ek moral pou ki zot kapav sarié bann kitsoz ki ti sorti dan temple Jérusalem. Bann chrétien zordi aussi pareil. Zot bizin quitte “Babylone la Grande,” l’empire mondial fausse religion. (Rév. 18:2-4) Li bien important ki zot ena la foi, zot repenti avek tou zot leker ek zot reste pur lor plan spirituel ek moral, tousala basé lor enn connaissance exact lor Parole Bondié. Enn kikenn ki rempli sa bann condition-la kapav sarié “bann kitsoz ki ti servi dan temple Jéhovah,” setadir tou bann different aspect ki concerne so service sacré, ek li kapav ena enn confiance total ki Jéhovah pou soutenir li ek pou beni li. [12 févr., ipF-2 p. 191 § 21–p. 193 par. 24]