Revision Lekol Ministere Theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 25 décembre 2006. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 6 novembre ziska 25 décembre 2006. [Note: kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du Ministère, p. 36-7.]
TECHNIK ORATOIRE
1. Ki pou aide nou pou bien choisir bann commentaire ki nou faire pou introduire enn verset? [beF p. 148 § 4–p. 149 § 2] C’est Jéhovah ki finn faire ecrire la Bible, alors li bien important ki nou montré Li nou respé. Pou nou kapav bien introduire enn verset, nou bizin comprend contexte verset-la, koné ar kisannla ecrivain-la pé kozé, ek lor ki sujet zot pé kozé.
2. Ki bann method nou kapav servi pou bien mette l’accent lor nou bann mot ek nou bann expression clé? [beF p. 151 § 4–p. 152 § 3](1) Avek nou la-voix: Enn changement dan nou la-voix aide nou pou mette l’accent lor bann mot clé ek faire zot ressorti dan phrase-la. (2) Bann pause: Kan nou faire enn pause avant nou lire enn partie important dan enn verset, l’assistance pou attann ki nou pou dire kitsoz; ek enn pause apré, pou renforce sa l’impression-la. (3) Repetition: Apré ki nou finn lire enn verset, si nou repete bann mot ou-soit bann l’expression clé, sa permette nou pou mette bien l’accent lor enn point precis. (4) Bann geste: Souvent, par bann mouvement nou lekor ek l’expression nou figure, nou kapav ajoute bann sentiment dan enn mot ou-soit enn group mot.
3. Parski li enn kitsoz bien serieux pou enseigne bann dimoune Parole Bondié, ki nou bizin faire pou ki nou ‘servi parole la verité couma bizin’? (2 Tim. 2:15) [beF p. 153 § 1-3, l’encadré; p. 154 § 1-2] Nou bizin faire sur ki l’explication ki nou donné lor enn verset, li en accord avek so contexte, avek seki la Bible enseigné, ek avek seki “l’esclave fidel et avisé” inn ecrire. (Mat. 24:45) Nou pa pou ajoute nou bann l’idée personnel ou-soit nou pa pou faire enn verset dire seki nou envie. (Jér. 23:16) En plus, nou pou faire tou pou imite Jésus Christ ki ti servi Parole Bondié pou fortifié bann dimoune, pa pou intimide zot. (Mat. 11:28)
4. Couma nou kapav faire enn application clair ar bann verset ki nou lire? [beF p. 154 § 4–p. 155 § 3] Enn fason ki nou kapav faire enn application bien clair ar bann verset c’est kan nou mette l’accent lor bann mot ki en rapport avek sujet ki nou pé discuté. Jésus ti mette l’accent lor l’expression “enn sel la-chair” kan li ti explik Genèse 2:24. (Mat. 19:3-6) Nou kapav aussi pose bann question ki pou faire ressorti bann mot clé ki ena dan verset ki nou envie lire. Nou but c’est pou montré ki partie dan sa verset-la ki concerne nou sujet pou ki l’assistance kapav bien comprend ki rapport ena entre sujet ki nou pé kozé ek verset ki nou pé servi.
5. Kifer li bien important ki nou montré valeur pratik nou sujet, ek couma nou kapav faire sa? [beF page 157 § 1-5, l’encadré] Si bann dimoune pa comprend couma pou mette en pratik seki nou pé dire, zot kapav arrete ecoute nou ek zot pa pou profite l’enseignement ki nou pé donné. Nou encourage zot pou comprend couma pou mette en pratik seki nou pé enseigné kan nou aide zot pou trouvé couma la crainte pou Jéhovah ena enn l’influence lor zot la-vie. (Ps. 111:10; 1 Tim. 4:8) Nou faire nou bann sujet vinn pratik kan nou prend compte bann dimoune ki pé ecoute nou. Nou kapav demann nou-mem: ‘Couma bann ki pé ecoute moi pou kapav tire profit ar bann l’idée ki mo pou presenté’?
EXPOSÉ NO. 1
6. Dan ki sens eski Salomon ti enn rassembleur? [siF p. 112 § 1-3] Salomon ti guide enn peuple ki ti voué ar Jéhovah. Ek a cause sa, li ti faire tou pou rempli so responsabilité pou ki sa peuple-la reste fidel ar so voeu. A travers bann bon conseil ki li’nn donné dan Ecclésiaste, Salomon ti rod rassemblé le peuple pou zot faire bann bon action ek pou detourne-zot ar bann kitsoz ki pa servi nanyin ki ti ena dan le monde. (Eccl. 12:8-10)
7. Couma livre Ecclésiaste en accord avek bann l’enseignement Jésus? [siF p. 114 § 16] Ena beaucoup kitsoz dan livre Ecclésiaste ki pareil avek seki Jésus ti enseigné. Par exemple, Jésus ti dire ki Bondié inn faire beaucoup kitsoz, li ti dire: “Mo Papa inn contigne travail ziska asterla, ek moi aussi, mo pé contigne travail.” (Jean 5:17) Salomon aussi ti koz lor seki Bondié inn faire, li ti dire: “Mo’nn trouve tou travail vrai Bondié, ek mo’nn trouvé ki bann dimoune pa kapav konn travail ki finn faire lor sa la-terre-la; mem ki quantité bann dimoune contigne travail dur pou rodé, zot pa trouvé. Ek mem si zot dire ki zot assez sage pou koné, zot pa pou kapav trouvé.” (Eccl. 8:17)
8. Ki preuve nou ena ki livre Chant de Salomon finn inspiré par Bondié? [siF p. 115- 6 § 3-4] Livre Chant de Salomon ti forme partie dan la “Septante” ek Josèph ti mette li dan la liste so bann livre sacré. Sa montré ki tou dimoune dan sa lepok-la ti reconette sa livre-la couma sacré. En plus, sa livre-la decrire enn grand l’amour ki deux dimoune ti ena pou zot camarade, pareil couma l’amour ki ena dan enn sens spirituel, entre Jésus Christ ek so “femme.” Sa montré ki livre Chant de Salomon, li ena so place dan la Bible ek ki li inspiré par Bondié. (Rév. 19:7, 8; 21:9)
9. Couma Rouleau livre Isaïe ki ti decouvert pré kot la mer Morte prouvé ki la Bible ki nou ena zordi, ena message ki Bondié ti’nn inspiré au commencement? [siF p. 118 § 6] Rouleau livre Isaïe ki ti decouvert pré kot la mer Morte, li mille an pli vié ki pli vié manuscrit text massoretik ki ena zordi. Li bien exact avek sa text massoretik-la lor bann doctrine. Kan nou compare sa deux text-la, nou trouve zis bann ti difference dan fason ecrire bann mot ek dan bann verbe.
10. Ki kapav aide enn orateur pou ki li pa bizin bann note trop detaillé? [beF p. 42 § 2] Enn orateur bizin classe bann l’idée ki pou ena dan so discours enba dé-trois point principal, li bizin tire bann l’idée ki pa vrai-mem appuye so bann point principal ek mette so bann l’idée dan enn l’ordre logik.
LECTURE LA BIBLE TOULÉ-SEMAINE
11. Dan ki sens “bann ki rod Jéhovah kapav comprend tou”? (Prov. 28:5) “Tou” vedir tou seki necessaire pou servi Jéhovah dan enn fason acceptable ek konn so bann principe moral. Bann ki rod Jéhovah par la priere ek par l’etude la Bible, comprend seki zot bizin faire pou ki Jéhovah accepté zot service. Par kont, bann dimoune ki pratik seki mauvais, pa comprend seki juste; Bondié pa accepté zot couma so bann serviteur. [6 nov., wCE 06 01/11 “Parole Jéhovah vivant—Point biblik interessant dan livre Proverbes”; wF 87 15/5 p. 30]
12. Couma eski ‘travail dur bann dimoune ki bet kapav fatigue zot’? (Eccl. 10:15) Souvent, bann “dimoune bet” dire ek faire bann kitsoz bet, zot base-zot lor bann fausse supposition pou persisté faire kitsoz. (Eccl. 10:12-14) Finalement, zot fatigue-zot ek zot rinté sans ki zot gagne beaucoup satisfaction ar zot zeffort. Zot-mem zot rann zot la-vie difficile. [20 nov., wCE 06 01/12 “Parole Jéhovah vivant—Point biblik interessant dan livre Ecclésiaste”; wF 78 1/3 p. 6-7]
13. Couma sa jeune fille Shoulammite-la ti pareil couma “enn jardin ki fermé a-clé” ek couma eski li enn bon l’exemple pou bann chrétienne ki pa marié? (Chant de S. 4:12) L’affection sa jeune fille Shoulammite-la ti pareil couma enn joli jardin ki ti entouré ar enn barrage ou-soit ar enn muraille. Pou enn kikenn kapav rente ladan, li ti bizin passe par enn la-porte ki ti fermé a-clé, ek n’importe ki dimoune pa ti kapav rente ladan. Li pa ti donne so l’affection n’importe ki zom, mais li ti reserve sa zis pou so futur mari. C’est vrai-mem enn bon l’exemple lor moralité pou bann chrétienne ki pa marié! [27 nov., wCE 07 01/02 “Parole Jéhovah vivant—Point biblik interessant dan livre Chant de Salomon”]
14. Kan Jéhovah ti demann bann Israélite pou “remette bann kitsoz en ordre,” eski sa montré ki Li ti pré pou negocié avek so peuple pou faire enn l’accord raisonnable? (Is. 1:18a) Non. Sa verset-la pa pé koz lor enn discussion entre deux partie egal kot toulé-deux bizin cedé pou tombe enn l’accorité. Mais c’est plutot enn l’invitation pou al devant enn tribunal pou montré la justice Jéhovah. Jéhovah ti pé invite bann Israélite pou repenti ek pou purifié zot-mem ek arrete faire peché lor plan moral ek spirituel. (Is. 1:16, 17) Li ti promette pou pardonne zot si zot ti “remette bann kitsoz en ordre.” (Is. 1:18b, 19) [4 déc., ipF-1 p. 26-9 § 9-18]
15. Couma Isaïe 11:6-9 ti realisé dan le passé, ek couma sa text-la pou ena enn pli grand realisation? En accord avek seki Jéhovah ti dire, kan bann Israélite ti voyagé pou quitte Babylone ek kan zot ti dan zot pays a partir 537 a.n.l., zot pa ti bizin peur bann zanimo sauvage ek bann dimoune ki ti mauvais couma bann zanimo sauvage. Mem zaffaire finn arrivé depuis 1919, kan bann dimoune finn gagne “connaissance Jéhovah” ek so Parole, zot finn change zot personnalité. (Col. 3:9, 10) Par exemple, bann dimoune ki ti violent finn vinn bann dimoune ki favorise la paix, ek asterla zot pé profite enn paradi spirituel. Dan le monde nouveau ki pé vini, bann serviteur Bondié pa pou senti-zot menacé par okenn dimoune ni okenn zanimo. [18 déc., ipF-1 p. 163-4 § 12-15]