Revision Lekol Ministere Theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 30 octobre 2006. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 4 septembre ziska 30 octobre 2006. [Note: Kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du Ministère, p. 36-7.]
TECHNIK ORATOIRE
1. Kifer li important ki nou koz avek l’assurance, ek couma eski nou kapav gagne moins trac? [beF p. 135 § 5–p. 137 § 2, bann l’encadré] Si nou ena l’assurance, bann ki ecoute nou pou kapav concentré plus lor seki nou dire plutot ki zot concentré lor nou. Nou kapav gagne moins trac kan nou prepare-nou bien, nou lire nou devoir fort plusieurs fois, nou prié Jéhovah pou aide nou, ek kan nou gagne l’experience a travers bann activité theocratik ki nou faire regulierement.
2. Kan lezot pose nou question lor nou croyance, kifer nou bizin faire zeffort pou servi la Bible pou reponn? [beF p. 143 § 1-3] Raison principal kifer nou servi la Bible, c’est parski li Parole Bondié. En plus, nou croyance, nou fason vive, ek nou l’esperance pou l’avenir, zot basé lor bann promesse inspiré ki ena dan la Bible. (2 Tim. 3:16, 17) Pareil couma Jésus, nou pa dire seki nou, nou pensé, mais plutot nou faire reference souvent ar la Bible pou reponn bann question. (Mat. 4:3-10; Luc 24:27, 44-47)
3. Couma nou kapav vinn pli habile pou servi la Bible? [beF p. 144, l’encadré] Nou kapav vinn pli habile pou servi la Bible kan nou lire li toulé-jour, nou servi bann verset la Bible dan nou bann commentaire dan reunion ek kan nou rodé seki la Bible dire avant nou prend bann decision. Si nou pa koné ki la Bible dire lor enn sujet, nou faire bann recherche au lieu ki nou zis faire bann supposition ou-soit nou donne nou prop l’opinion.
4. Kifer li important ki nou servi la Bible aussi souvent ki nou kapav kan nou enseigné dan predication, ek couma nou kapav encourage lezot pou servi zot la-Bible dan reunion? [beF p. 145- 6, bann l’encadré] La Bible kapav donne bann dimoune sincere enn direction, parski li ena beaucoup plus la-force ki tou seki nou, nou kapav dire. Kan enn dimoune trouve seki la Bible dire avek so prop lizié, sa ena enn pli grand l’influence lor li. Kan nou adresse ar la congregation, nou bizin invite zot dan enn fason direct, pou rod bann verset dan zot la-Bible, ek donne zot assez lé-temps pou faire sa.
5. Ki deux objectif nou ena kan nou introduire enn verset la Bible? [beF p. 147 § 2] Kan nou introduire enn verset, nou l’objectif c’est pou capté l’interet ek pou attire l’attention lor raison pou kifer nou cite sa verset-la.
EXPOSÉ NO. 1
6. Ki message vivant ena dan livre Psaumes? [siF p. 105 § 23] Livre Psaumes donne nou enn connaissance profond lor bann l’enseignement principal ki ena dan la Bible; li koz avant tou lor Jéhovah, ki finn faire ecrire la Bible. Sa livre-la montré bien clair ki Jéhovah Li-mem Createur l’univers ek tou kitsoz ki ena ladan. (Ps. 8:3-9; 90:1, 2; 100:3; 104:1-5, 24; 139:14)
7. Kan eski ti ecrire livre Proverbes ek kan eski ti rassemblé tou bann proverbe pou faire enn sel livre? [siF p. 107 § 5] Pli grand partie livre Proverbes surement ti ecrire pendant règne Salomon (1037-998 a.n.l.), avant ki li detourne-li ar Jéhovah. Nou koné ki ti rassemblé enn partie livre Proverbes pendant règne Hizqiya (745-717 a.n.l.). Alors pa ti kapav rassemblé tou bann proverbe avant règne Hizqiya. Hizqiya ti aussi dirige collection deux dernier partie livre Proverbes. (Prov. 25:1) Ena enn note interessant dan “ La Traduction du monde nouveau—avec références ”,en français pou Proverbes 31:3. Li dire: ‘Dan certain edition text hébreu ena enn trigramme, setadir trois lettre, ‘héth, zayin, qôph’ (חזק) ki represente signature le roi Hizqiya lor copie ki so bann fonctionnaire ti’nn faire pou montré ki sa travail-la ti’nn terminé.’
8. Ki été enn proverbe, ek kifer nom ki sa livre-la ena en hébreu, li approprié? [siF p. 107-8 § 6] Enn proverbe li enn parole courte ki vedir beaucoup kitsoz ek ki souvent compare deux kitsoz ki soit pareil, soit different. So l’objectif c’est pou faire sa dimoune ki tann sa-la, reflechi. Dan bann la-Bible en hébreu, ti appel livre Proverbes par premier mot ki ena ladan, “Mishlé” ki vedir “bann proverbe.” Sa mot-la li pluriel mot hébreu “mashal” ki sorti dan mot ki vedir “ki pareil ar” ou-soit “ki kapav comparé ar.” Sa bann mot-la decrire bien seki ena dan sa livre-la.
9. Proverbes 2:1-5 encourage nou pou contigne rod la connaissance, l’intelligence ek discernement ‘coumadir nou pé rod l’argent, ek bann tresor ki finn cachiette.’ Ki sa impliké? [beF p. 38 § 4] Sa comparaison-la implik enn travail ek bann benediction ki ena grand valeur. Li vrai ki nou bizin faire zeffort pou faire bann recherche, mais kan nou faire sa, nou decouvert seki Bondié pensé lor different question, nou corrige nou bann mauvais fason pensé, ek nou comprend la verité pli bien encore. Nou kapav aussi mette bann point interessant ki nou’nn aprann dan nou sujet ek rann li pli vivant. Lerla, li pou enn plaisir pou nou presente nou sujet ek li pou aussi enn plaisir pou lezot ecoute nou.
10. Couma livre Proverbes li-mem faire konn so l’utilité? [siF p. 110 § 19] Dan bann verset au commencement-mem, nou trouve l’utilité sa livre-la kan li faire ressorti ki la connaissance, la sagesse, ek l’intelligence, zot bann qualité ki bien important pou nou servi Jéhovah couma bizin. (Prov. 1:2-4)
LECTURE LA BIBLE TOULÉ-SEMAINE
11. Couma eski David ti ‘calmé so nâme pareil couma enn zenfant ki lor so mama mais ki’nn arrete boire avek li,’ ek couma nou kapav imite li? (Ps. 131:1-3)David ti aprann pou calmé so nâme pareil couma enn zenfant ki’nn arrete boire avek so mama, aprann trouve reconfort ek satisfaction dan lé-bras so mama. Li ti reconette so bann limite ek li ti montré ki li ti ena l’humilité. Li pa ti rod gagne grandeur, ni li ti servi so pouvoir pou li vinn le roi. Avek humilité ek patience, li ti attann Jéhovah. Au lieu nou mette-nou en avant, nou bizin attann Jéhovah. [11 sept., wCE 06 1/10 “Parole Jéhovah vivant—Point biblik interessant dan cinquieme partie livre Psaumes”; wF 77 1/11 p. 669]
12. Ki reconfort nou gagné kan nou lire bann parole ki trouve dan Psaume 139:7-12?Pena okenn place lor la terre ki trop loin pou Jéhovah. N’importe kot nou été, nou kapav gagne so l’esprit saint. Pena okenn situation ki kapav empeche Jéhovah aide nou. Si nou faire zeffort pou servi Jéhovah, Li kapav mem redonne nou la vie. Bann fidel serviteur Jéhovah kapav toujours compte lor so soutien. [18 sept., wCE 06 1/10 “Parole Jéhovah vivant—Point biblik interessant dan cinquieme partie livre Psaumes”; wF 93 1/10 p. 12-13]
13. Dan Psaume 145 nou trouve bann l’exemple ki montré nou grandeur Jéhovah ek ki pousse nou pou loué Li dan nou la-priere ek dan nou ministere. Cite certain ladan. (Ps. 145:3)Parmi bann l’exemple ki demontré grandeur Jéhovah ki depasse nou l’imagination ek ki pousse nou pou loué Li, ena bann kitsoz extraordinaire ki Li’nn crée (v. 9, 10), bann action puissant ki Li’nn faire pou sape so bann serviteur fidel (v. 4, 6, 14, 18-20), so bonté kan Li’nn donne nou tou seki necessaire pou nou gagne la vie eternel (v. 7, 15, 16) ek so personnalité (v. 7-9, 17). [25 sept., wCE 04 1/2 p. 3 -7 ; wF 90 15/9 p. 11-15]
14. Dan ki fason la crainte pou Jéhovah li “commencement la connaissance ek la sagesse”? (Prov. 1:7; 9:10)Sans la crainte pou Jéhovah, pa kapav ena okenn connaissance, parski Jéhovah, Li-mem Createur tou kitsoz ek Li-mem ki finn faire ecrire la Bible. (Rom. 1:20; 2 Tim. 3:16, 17) Li-mem la source tou vrai connaissance. Alors nou kapav dire ki la connaissance commence par la crainte pou Jéhovah, enn la-crainte ki rempli ar respé. La crainte pou Bondié, li aussi commencement la sagesse, parski pa kapav ena la sagesse sans la connaissance. En plus, enn dimoune ki pena la crainte pou Jéhovah pa pou servi connaissance ki li ena pou honore so Createur. [2 oct., wCE 06 1/11 “Parole Jéhovah vivant—Point biblik interessant dan livre Proverbes”; rsF p. 282-3]
15. Dan Proverbes 7:1, 2, ki vedir “mo bann parole” ek “mo bann commandement”?Dan sa bann parole ek sa bann commandement-la, ena bann l’enseignement la Bible, mais aussi bann la-loi ki bann parent etabli dan lakaz. (Deut. 6:6, 7; Éph. 6:4) Tant ki sa bann la-loi-la pa al kont la loi Bondié, bann zenfant bizin suive zot parski c’est par amour ek pou bien-etre la famille ki finn etabli sa bann la-loi-la. (Prov. 6:20-22) [9 oct. wCE 06 1/11 “Parole Jéhovah vivant—Point biblik interessant dan livre Proverbes”; wF 00 15/11 p. 28-9]