Anou presente enn Réveillez-vous ! special en septembre
1 Preské tou dimoune content kan zot tann bann zoiseau chanté ek kan zot admire enn coucher soleil. Pourtant, beaucoup pa reconette ki ena enn Bondié dan le ciel ki ena l’amour ki finn crée tou sa bann kitsoz-la. Nou pou gagne enn grand l’occasion pou rann temoignage lor nou Createur Jéhovah kan nou pou distribué enn Réveillez-vous ! special en septembre. (Is. 40:28; 43:10) Sa Réveillez-vous !-la koz zis lor sa sujet-la: “Eski ena enn Createur?”
2 Dan territoire: Si possible, organise-ou pou preché porte-en-porte ar ou congregation chaque samedi. Bien-sur, ou kapav presente bann magazine enn lot jour pendant la semaine. Surement ki sa magazine-la pou interesse bann professeur ek bann lezot dimoune ki travail dan domaine l’education. Alors, prend bann disposition pou visite sa bann dimoune-la dan ou territoire.
3 Si dimoune-la montré l’interet, zis avant ou quitte li, pose li enn question ki ou pou reponn prochaine fois ki ou visite li. Par exemple, ou kapav demann li kifer enn Createur ki content nou kapav permette sa quantité souffrance-la. Apré, kan ou revisite li, ou kapav attire so l’attention lor chapitre 1 ou-soit chapitre 11 dan livre Ki la Bible enseigné? Ou-soit si ou envie, ou kapav demann li kifer Bondié finn crée la terre, ek apré kan ou revisite li, ou kapav examine chapitre 3.
4 Avek ou bann camarade: Surement ou pou envie donne sa Réveillez-vous ! special-la ou bann camarade. Si ou professeur demann ou pou expliké kifer ou croire dan la creation, ou kapav donne li enn copie apré ki ou’nn donne li enn explication. Sa Réveillez-vous !-la kapav aide ou kan ou ena pou presente enn sujet devant classe, ek li kapav aide ou pou reponn bann question ki ou bann camarade kapav posé lor ou la-foi. Lartik “ Les jeunes s’interrogent... ” “ Comment défendre ma croyance en la création ? ” ki trouve dan sa Réveillez-vous !-la, kapav aide ou dan sa domaine-la.
5 Jéhovah merite l’honneur ek la gloire pou tou seki Li finn crée. (Rév. 4:11) Nou kapav honore nou Createur ek aide lezot aussi pou faire pareil kan nou presente sa Réveillez-vous ! septembre-la avek zèle.