Revision Lekol ministere theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 28 août 2006. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 3 juillet ziska 28 août 2006. [Note: Kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du Ministère, p. 36-7.]
TECHNIK ORATOIRE
1. Couma eski enn bon contact visuel aide nou pou vinn bann pli bon enseignant? (Mat. 19:25, 26; Actes 14:9, 10) [beF p. 124 § 3–p. 125 § 2] Enn bon contact visuel montré ki nou interessé ar bann dimoune, ek ki nou ena enn kitsoz important pou dire zot. Si nou montré-nou amical ek nou faire enn sourire, bann dimoune ki pé ecoute nou pou pli a l’aise pou kozé. Kan nou essaye lire bann expression dan lizié sa dimoune avek ki nou pé kozé-la, nou pou kapav koné ki nou bizin faire.
2. Kifer li important ki nou reste naturel, ek ki kapav aide nou pou faire sa dan predication? [beF p. 128 § 1-5, l’encadré] Nou kapav gagne confiance lezot kan nou koz avek respé ek dan enn fason naturel. Si nou gagne trac ou-soit nou mal-a-l’aise kan nou kozé, bann dimoune pa pou concentré lor seki nou pé dire. Ena plusieurs kitsoz ki kapav aide nou pou arrete gagne trac ek koz dan enn fason pli naturel dan predication. Nou bizin (1) prepare nou bien, (2) prié sincerement, (3) medite lor misericorde ki Jéhovah inn manifesté kan Li’nn donne tou dimoune possibilité pou vive pou touletan, (4) rappel ki bann dimoune ena liberté pou prend zot prop decision ek ki zot kapav soit accepté nou message ou-soit rejette li, ek (5) pa blié ki nou mission c’est zis preché.
3. Kifer nou bizin reste prop? [beF p. 131 § 1-3] Kan nou reste prop, sa donne Jéhovah la gloire ek sa rann enn bon temoignage lor so l’organisation. (1 Cor. 10:31) Bann dimoune pou pli envie ecoute nou si zot trouvé ki nou prop ek ki nou linge aussi prop, parski sa reflecté dignité.
4. Couma eski “modestie ek bon jugement” bizin in fluence nou l’habillement ek nou coiffure? (1 Tim. 2:9) [beF p. 131 § 4– p. 132 § 1] Enn dimoune ki modeste pou faire attention pou pa offense lezot pou nanyin. Bon jugement pou aide nou pou faire attention lor nou l’apparence ek evite bann l’habillement ek bann coiffure extravagant. Ki nou dan lekol, dan travail, ou-soit dan nou service sacré, fodé ki nou l’apparence montré ki nou respecté bann principe Bondié.
5. Ki bann principe biblik nou bizin mette en pratik pou ki nou l’apparence pa montré ki nou content le monde? [beF p. 133 § 1-2] Premier Jean 2:15-17 averti nou pou pa content le monde ou-soit bann kitsoz ki dan le monde. En tant ki bann serviteur Jéhovah, nou rejette bann style ki reflecté le monde Satan ek ki pa en accord avek seki la Bible dire. Éphésiens 2:2 attire nou l’attention lor l’esprit rebellion ki existé dan sa mauvais lé-monde-la. Kan bann dimoune mette enn linge ki provokan, sale ou-soit debraillé, sa montré ki zot pa envie soumette ar l’autorité. Concernant l’habillement ek coiffure, au lieu ki nou imite le monde, anou prend l’exemple lor bann chrétien mur. (1 Tim. 4:12; 1 Pierre 5:2, 3)
EXPOSÉ NO. 1
6. Ki pli grand bienfait nou gagné kan nou lire? [beF p. 21 § 3] Kan enn dimoune lire, sa kapav aide li pou “trouve connaissance Bondié.” (Prov. 2:5) Ena plusieurs l’aspect dan nou service ki nou rann Bondié kot li important ki nou konn lire. Resultat ki nou pou gagné dan predication depann beaucoup lor fason ki nou lire. Nou bizin lire pou nou prepare tou nou bann activité spirituel.
7. Ki kitsoz montré si enn dimoune li sage ou-soit li bet? (Prov. 14:2) [wF 04 15/11 p. 26 § 5] Enn dimoune ki droite ena la crainte pou vrai Bondié, ek “la crainte Jéhovah li commencement la sagesse.” (Ps. 111:10) Enn dimoune ki vrai-mem sage koné ki li bizin “ena la crainte pou vrai Bondié ek garde so bann commandement.” (Eccl. 12:13) Enn kikenn ki bet faire bann kitsoz ki pa en accord avek bann principe droite ki Bondié inn etabli. Li faire seki pa bon.
8. Kifer eski ‘la connaissance li enn kitsoz ki facile pou enn dimoune intelligent’? (Prov. 14:6) [wF 04 15/11 p. 28 § 4-5] L’intelligence c’est capacité pou associé plusieurs aspect enn sujet ek trouve li en gros, pa couma bann point ki separé. Li pli facile pou enn kikenn ki intelligent aprann ek rappel bann nouveau detail parski li trouvé ki lien ena entre sa bann detail-la ek projet ki Jéhovah ena pou bann dimoune ek la terre.
9. Ki vedir etudié? [beF p. 27 § 3] Etudié pa vedir zis lire la haut-la haut. Kan nou etudié nou bizin servi nou bann capacité mental pou examine enn sujet bien ek en detail. Sa vedir ki nou bizin analyse seki nou pé lire, compare li avek seki nou deja koné, ek prend compte bann raison kifer finn dire tel ou tel kitsoz.
10. Kan nou medite lor creation Jéhovah, ki l’effet sa bizin ena lor nou? [wF 04 15/11 p. 8 § 4] Kan nou medité, sa bizin ena au moins trois l’effet lor nou. Li kapav (1) rappel nou kifer li important ki nou apprecié nou la-vie, (2) pousse nou pou aide lezot pou aprann lor creation Jéhovah, ek (3) motive nou pou aprann plus lor nou Createur ek ena plus reconnaissance pou Li.
LECTURE LA BIBLE TOULÉ-SEMAINE
11. Dan le passé, dan ki sens, apré ki Jéhovah ‘ti dire enn parole,’ enn grand l’armée “bann femme ti annonce la bonne nouvelle,” ek couma nou kapav applik sa zordi? (Ps. 68:11) Jéhovah ti dire, ou-soit ti donne l’ordre bann Israélite pou al laguerre kont bann nation ki ti reste dan la Terre promise ek pou prend zot pays. Kan zot ti gagne victoire lor zot bann l’ennemi, bann femme ti chanté pou annonce sa bon nouvel-la. Zordi, bann soeur annonce la bonne nouvelle lor bann victoire ki ena rapport avek vrai l’adoration. Par exemple, zot annoncé ki Jésus finn jette Satan lor la terre, pareil couma Jéhovah ti dire. En accord avek Parole Bondié, bann femme chrétienne faire bann nation koné ki bientot zot pou bizin soumette-zot ar Jésus Christ, le Roi messianik. [3 juillet, wF 86 15/10 p. 30]
12. Ki ti mank é faire Asaph arrete faire seki bon, ek couma li finn corrige so pensée? (Ps. 73:2, 3, 17) Dan lepok Asaph, bann mauvais dimoune ti vante-zot a cause zot prosperité materiel. Mem si Asaph ti reconette ki Jéhovah Li bon, li ti tellement envié zot prosperité ki li ti demann li-mem si li vaut la peine amenn enn la-vie droite. (Ps. 73:1, 13) Mais li finn corrige so pensée kan li finn al dan “temple Bondié” ek kan li finn medite ensam avek lezot serviteur Jéhovah. Zordi, si prosperité bann mauvais dimoune troublé nou, nou kapav rod reponse pou nou bann question kan nou adore Bondié ensam avek so peuple. [10 juillet, wF 93 15/7 p. 28 § 3, 5 ; p. 29 § 6]
13. Kifer ti appel la manne ki bann Israélite ti gagné, ‘la grain ki sorti dan le ciel’ ek ‘di-pain bann ki puissant’? (Ps. 78:24, 25) La manne ti sorti dan le ciel ek c’est Jéhovah ki ti donne l’ordre pou donne sa. (Ps. 105:40) Li possible ki ‘bann puissant’ c’est bann ange ki kitfois Jéhovah ti servi pou donne la manne. (Ps 103:20) [17 juillet, wCE 06 1/9 “Parole Jéhovah vivant—Point biblik interessant dan troisieme ek quatrieme partie livre Psaumes”]
14. Ki été “l’endroit secret le Très-Haut,” ek couma nou kapav ‘reste’ dan sa l’endroit-la? (Ps. 91:1, 2) “L’endroit secret” represente enn l’endroit kot nou en securité, enn condition kot nou gagne protection kont tou bann kitsoz ki kapav faire nou di-tort lor plan spirituel, enn paradi spirituel. Sa l’endroit-la li secret parski bann dimoune ki pa mette zot confiance en Bondié pa konn sa l’endroit-la. Nou faire le Très-Haut vinn l’endroit kot nou resté kan nou considere Li couma nou refuge ek nou forteresse, kan nou loué Li en tant ki Souverain l’univers, ek kan nou preche bon nouvel lor so Royaume. [31 juillet, wCE 06 1/9 “Parole Jéhovah vivant—Point biblik interessant dan troisieme ek quatrieme partie livre Psaumes”]
15. En ki sens la mort so bann fidel serviteur ena valeur devant lizié Jéhovah? (Ps. 116:15) La mort tou so bann serviteur ena tellement valeur pou Jéhovah—li coute Li tellement cher—ki jamais Li pa pou permette ki sa arrivé. (Ps 116:8) Si Li laisse sa arrivé, Li pou perdi so reputation en tant ki Tout-Puissant ki kapav sauve so bann fidel. En plus, si sa arrivé pa pou reste personne lor la terre pou forme fondation nouveau lé-monde. [28 août, wCE 06 1/10 “Parole Jéhovah vivant—Point biblik interessant dan cinquieme partie livre Psaumes”]