Nou ministere—Enn travail ki nou faire avek compassion
1 Jésus ti remarké ki bann dimoune ki ti pé ecoute so message ti “gagne maltraité ek zot ti senti-zot perdi pareil couma bann mouton ki pena berger.” (Mat. 9:36) Avek tendresse ek amour, li ti enseigne zot bann principe Jéhovah. Li ti reconforte zot ek avek compassion, li ti nourri zot lor plan spirituel. Kan nou medite lor seki Jésus inn faire, tigit-tigit nou aprann pense pareil couma li ek ena bann mem sentiment ki li, ek lerla nou pli kapav manifesté la compassion dan nou ministere.
2 Reflechi couma Jésus ti reagir kan bann dimoune ki ti bien bizin l’aide, ti vinn vers li. (Luc 5:12, 13; 8:43-48) Li ti montré consideration pou bann ki ti dan enn situation difficile. (Marc 7:31-35) Li ti montré ki li prend compte sentiment lezot. Li ti guette seki ena derriere zot l’apparence. (Luc 7:36-40) Oui, nou kapav dire ki Jésus ti imite dan enn fason parfait, compassion ki nou Bondié ena.
3 “Li finn ena pitié pou zot”: Jésus pa ti faire so ministere zis parski li ti bizin faire li. Non, li ‘ti ena pitié’ pou bann dimoune. (Marc 6:34) Zordi aussi pareil. Nou pa pé zis annonce enn message mais nou pé essaye sauve la vie bann dimoune. Nou essaye comprend kifer bann dimoune reagir coumsa. Kifer zot tracassé? Eski bann fausse berger religieux finn neglige zot ou-soit finn embete zot? Nou l’interet sincere kapav pousse zot pou ecoute la bonne nouvelle.—2 Cor. 6:4, 6.
4 Kan nou manifesté compassion envers enn dimoune, sa touche so leker. Guette sa l’exemple-la: Enn madame ti bien-bien chagrin kan li ti perdi so tifi trois mois. Kan deux Témoins finn tape so la-porte, li finn invite zot pou rentré. Li’nn faire sa zis parski li ti envie prouvé ki tou bann point ki zot ti pou servi pou expliké kifer Bondié permette souffrance, li fausse. Mais, guette ki sa madame-la inn dire plitar: “Zot finn ecoute moi avek beaucoup compassion, ek kan zot ti pé allé, mo ti senti-moi tellement pli bien ki mo finn accepté enn lot visite.” Eski ou faire zeffort pou montré compassion envers tou dimoune ki ou joinde dan ou ministere?
5 Si nou faire zeffort pou developpe compassion, sa pou aide nou pou reconforte lezot. Si nou faire sa, nou pou rann gloire Jéhovah, nou “Papa ki ena beaucoup misericorde.”—2 Cor. 1:3.