Revision lekol ministere theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 26 juin 2006. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 1er mai ziska 26 juin 2006. [Note: Kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du Ministere, p. 36-7.]
TECHNIK ORATOIRE
1. Ki été modulation, ek kifer li important? [beF p. 111, bann l’encadré] Modulation vedir varié volume nou la-voix, vitesse ki nou kozé ek aussi ton nou la-voix. Modulation bien important parski li touche sentiment bann ki pé ecoute nou ek sa motive zot pou agir. Si nou servi sa method-la couma bizin, sa pou encourage nou l’auditoire pou adopté mem l’attitude ek sentiment ki ena derriere sa sujet-la.
2. Kan nou pé faire enn sujet, couma nou kapav varié vitesse ki nou kozé? [beF p. 112 § 3–p. 113 § 1, l’encadré] Vitesse ki nou kozé depann lor seki nou ena pou dire. Alors, pou nou reussi varié vitesse ki nou kozé, sa pa vedir enn coup koz vite ek enn coup diminué nou vitesse. Souvent li bon ki nou koz pli vite lor bann point ki pa trop important ou-soit pou exprime nou la-joie. Mais, nou bizin ralenti kan nou pé developpe bann argument solid, bann point principal, ek bann point kot nou envie motive lezot.
3. Couma nou kapav developpe l’enthousiasme pou nou sujet, ek kifer sa li important? [beF p. 115 § 1–p. 116 § 2, bann l’encadré] Nou manifesté l’enthousiasme kan nou prepare nou leker ek pa zis bann l’idée, sa vedir ki nou bizin mette tou nou bann sentiment dan nou sujet. (Ezra 7:10) Nou pou enthousiaste pou presente nou sujet si nou sur ki seki nou pou dire, li vaut la peine ek ki nou l’auditoire pou kapav tire profit. Sa li important parski l’enthousiasme aide nou pou capté l’attention nou l’auditoire ek pousse zot pou agir.
4. Kan nou pé enseigne lezot, kifer nou bizin koz avek sentiment, ek ki kapav aide nou pou faire sa? [beF p. 118 § 2–p. 119 § 5] Kan nou koz avek sentiment sa rann nou sujet pli vivant ek pli attirant. Li bien important ki nou faire sa si nou envie touche leker bann ki pé ecoute nou ek motive zot pou agir. Si pareil couma Jésus, nou developpe compassion pou lezot ek nou vrai-mem envie aide zot, li pou pli facile pou nou koz avek sentiment. (Marc 1:40, 41; Luc 8:48)
5. Kan nou pé kozé, kifer bann geste ek bann expression lor nou figure li important? (Mat. 12:48, 49) [beF p. 121 § 1-4, bann l’encadré] Li important nou comprend ki nou pa transmette bann l’idée ek sentiment zis a travers nou la-voix mais aussi a travers bann geste ek bann expression lor nou figure. Souvent nou servi nou lizié, nou la-bouche, ou-soit nou bouge nou la-tête pou exprime bann sentiment ek bann l’attitude. Kan nou faire bann geste, nou parole ena plus la-force ek nou l’auditoire kapav trouve bann sentiment ki ena derriere sa. Si enn orateur pa servi bann geste couma bizin, l’auditoire kapav gagne l’impression ki li pa interessé avek so sujet.
EXPOSÉ NO. 1
6. Couma livre Job glorifié Jéhovah ek mette l’accent lor so bann principe droite? [siF p. 100 § 39, 41] Livre Job koz lor Jéhovah couma Tout-Puissant pli souvent ki tou lezot livre dan la Bible; li mentionne sa 31 fois. Livre Job glorifié Jéhovah plusieurs fois pou so grand position, so sagesse, so puissance, so justice, so l’amour fidel, so misericorde, ek aussi parski li enn Bondié eternel. (Job 10:12; 36:26; 37:23) Sa livre-la faire nou comprend ki justification Jéhovah pli important ki delivrance bann dimoune. (Job 33:12) Li condamne materialisme, l’idolatrie, l’adultere, faire vantard, l’injustice, faire preference, faire malhonnete, ek koz menti; tou sa bann kitsoz-la faire nou perdi faveur Bondié. (Job 31:5, 9, 13, 17, 24-28)
7. Ki kitsoz prouvé ki livre Psaumes li inspiré par Bondié? [siF p. 103 § 10-11] Apré so resurrection, Jésus ti dire so bann disciple ki tou seki ti ecrire lor li dan bann Psaume, ti pou bizin realisé. (Luc 24:44) Alors, li ti’nn montré ki bann Psaume ti annonce bann prophetie. En plus, livre Psaumes, en entier, li en accord avek lé-reste livre la Bible ek beaucoup ki ti ecrire bann l’Écritures grecques chrétiennes souvent finn faire reference ar bann parole ki trouve dan Psaumes. (Actes 13:33; Rom. 3:13)
8. Kan Proverbes 13:16 koz lor enn kikenn ki malin, eski li pé decrire enn kikenn ki rod piege nou? [wF 04 15/7 p. 28 § 3-4] Dan sa verset-la, mot ‘malin’ pa vedir enn kikenn ki rod piege nou. Enn kikenn ki malin ici vedir enn kikenn ki koné ki li pé faire, parski avant, li finn examine la Bible ek li finn analyse tou bann fait; li pa faire bann kitsoz par hasard ek li pa nek suive tou seki lezot pé faire. Enn kikenn ki bet, li servi so la-langue pou koz n’importe, parkont enn kikenn ki malin, li kozé ek agir avek sagesse. Alors, enn kikenn ki malin veille lor so la-langue ek li evite bann difficulté ki kapav gagné si li koz brite ek sans reflechi.
9. Couma eski l’esprit saint agir couma enn assistant, ek ki sa bizin encourage nou pou faire? (Jean 14:25, 26) [beF p. 19 § 2-3] L’esprit saint kapav aide nou pou rappel bann kitsoz important ki nou’nn etudié avant. Li pa faire nou rappel bann kitsoz ki jamais nou’nn etudié. Li ti permette bann ki ti ecrire l’Evangile pou rappel en detail seki Jésus ti dire ek ti faire kan li ti avek zot—dan certain cas plusieurs dizaine l’année pli tard. Sa bizin encourage nou pou aprann konn plus possible lor Jéhovah ek lor so projet, ek pou aide lezot pou faire pareil.
10. Dan ki sens Jésus pé vini, ek lor ki ‘venue’ Jésus ti pé kozé en Matthieu 16:28? [wCE 04 1/3 p. 29 l’encadré] Kan la Bible dire ki Jésus ‘pé vini,’ sa vedir ki li pé tourne so l’attention vers l’humanité ou-soit vers so bann disciple, bien souvent pou faire enn jugement. (Mat. 24:46, 50; 25:19, 31) Dan Matthieu 16:28, Jésus pé koz lor commencement so presence en tant ki le Roi dan Royaume messianik en 1914.
LECTURE LA BIBLE TOULÉ-SEMAINE
11. Ki nou kapav aprann lor reponse ki Job ti donne Jéhovah en Job 42:1-6? Kan Jéhovah ti koz avek Job ek ti rappel li couma Li montré so puissance, sa ti aide Job pou “trouve Bondié,” ou-soit pou konn la verité concernant Bondié. (Job 19:26) Sa ti faire li corrige so fason pensé. Kan nou gagne correction a travers la Bible, nou bizin paré pou reconette nou erreur ek faire bann changement ki bizin. [wCE 06 1/4 “Parole Jéhovah vivant—Point biblik interessant dan livre Job”]
12. Ki “kitsoz inutile” bann nation pé contigne comploté? (Ps. 2:1, 2) “Kitsoz inutile” ici, c’est desir ki bann gouvernement ena pou garde zot l’autorité. Li inutile parski jamais zot pa pou reussi faire sa. Eski bann nation kapav vrai-mem attann ki zot pou reussi kan zot pé prend position “kont Jéhovah ek kont [le roi] ki Li’nn choisir”? [wCE 06 1/6 “Parole Jéhovah vivant—Point biblik interessant dan premier partie livre Psaumes”]
13. Ki bann fondation ki’nn demoli? (Ps. 11:3) La societé ki dirigé par bann dimoune, tini lor bann fondation couma—la loi, l’ordre ek la justice. Kan sa trois fondation-la tombé, ena desordre social ek pena la justice. Dan bann situation coumsa, enn ‘dimoune ki droite’ bizin mette tou so confiance en Jéhovah. (Ps. 11:4-7) [wCE 06 1/6 “Parole Jéhovah vivant—Point biblik interessant dan premier partie livre Psaumes”]
14. Couma eski Jéhovah ‘bien recompense’ enn dimoune ki ena l’orgueil? (Ps. 31:23) Sa recompense-la, c’est enn punition. Si enn dimoune juste faire bann peché, mais pa par expré, recompense ki li gagné, c’est kan Jéhovah discipline li. Mais kan enn dimoune ki ena l’orgueil pa quitte so mauvais chemin, so recompense c’est enn punition severe ar Jéhovah. (Prov. 11:31; 1 Pierre 4:18) [wCE 06 1/6 “Parole Jéhovah vivant—Point biblik interessant dan premier partie livre Psaumes”]
15. Ki l’encouragement nou gagné en Psaume 40 ki kapav aide nou pou faire face avek nou l’imperfection ek bann malheur ki nou gagné a cause sa lé-monde-la? (Ps. 40:1, 2, 5, 12) Si nou mette nou l’espoir en Jéhovah, sa kapav aide nou pou faire face avek depression ek pou “sorti dan enn trou kot ena beaucoup tapage, ek dan la boue ki dan fond trou-la.” Ni bann malheur, ni bann tracas ki nou gagné a cause nou bann defaut, pa pou faire nou abatte, si nou rappel ki bann benediction ki nou gagné zot ‘pli beaucoup ki nou kapav raconté.’ [wCE 06 1/6 “Parole Jéhovah vivant—Point biblik interessant dan premier partie livre Psaumes”]