Contigne attann Jéhovah
1. Ki theme l’assemblée, ek kifer sa theme-la approprié?
1 Isaïe ti ecrire: “Jéhovah, Li enn Bondié ki amenn jugement. Bann ki contigne attann Li, zot heureux.” (Is. 30:18b) Dan la Bible ena plusieurs place kot nou kapav lire couma Jéhovah finn amenn so jugement lor so bann l’ennemi ek couma Li finn sauve so bann fidel serviteur. Ki leson bann adorateur Jéhovah kapav tiré dan sa bann recit-la, zordi? Ki nou bizin faire asterla pou prepare-nou pou “grand jour Jéhovah ki faire peur”? (Yoël 2:31, 32) Nou prochain l’assemblée district “Delivrance pé approché” pou pousse nou pou reflechi lor sa bann question-la ek pou examine nou-mem. Li pou aide nou pou contigne attann Jéhovah.
2. Couma nou kapav montré nou reconnaissance pou l’assemblée district?
2 Eski ou’nn fini prend ou bann disposition pou ki ou kapav assisté ek profite toulé-trois jour l’assemblée? Par exemple, eski ou’nn fini al guette ou patron pou ou demann congé? Fodé pa ou trop sur ki ou pou gagne congé sans okenn problem. Prié Jéhovah. Apré al guette ou patron pou demann li congé. (Neh. 2:4, 5) Li pareil pou bann disposition pou transport, logement ou-soit lezot kitsoz ki necessaire. Nou bizin pa renvoye sa pou plitar. Kan nou organise tou kitsoz coumsa, nou montré ki nou ena enn grand reconnaissance pou la nourriture spirituel ki Jéhovah preparé pou nou. Certain bizin l’aide kan zot pé prend bann disposition pou assisté l’assemblée. Bann ancien bizin prend compte sa bann dimoune-la, surtout bann ki pli agé.—Gal. 6:10.
3. Couma eski nou kapav honore Jéhovah par nou l’apparence?
3 Kan nou modeste dan nou l’habillement ek nou l’apparence: Sakenn parmi nou kapav faire so part pou honore Jéhovah pendant l’assemblée. Fodé pa nou mette bann linge ki trop dernier la mode, ki faire gagne choc, ki indecent, ou-soit ki trop decontracté. Sa applik aussi kan nou pé al l’assemblée, kan nou pé retourne kot nou, kan nou pé donne coup de main pou prepare l’assemblée, ek pendant bann session. En tant ki bann serviteur Bondié, nou mette nom Jéhovah ek so reputation en premier, avant nou bann preference personnel ek nou confort. Bann chef de famille ena responsabilité pou assuré ki zot famille habille dan enn fason ki touletan reflete modestie ek bon jugement.—1 Tim. 2:9.
4. Kifer nou bizin garde enn l’apparence approprié pendant bann moment detente apré session?
4 Li important ki nou garde enn l’apparence approprié mem apré l’assemblée. Li bon ki nou reste ar nou linge l’assemblée si nou al mangé restaurant apré bann session. Si nou garde nou badge, nou pou crée bann l’occasion pou donne temoignage informel.—2 Cor. 6:3, 4.
5. Couma nou montré ki nou veille bien fason ki nou ecouté?
5 “Veille bien fason ki zot ecouté”: Li bon ki bann ki assisté l’assemblée suive conseil ki nou trouvé dan Luc 8:18. Sakenn bizin amenn so la-Bible, so cantik ek enn carnet pou prend note. Nou bizin ecoute bien bann l’idée principal ki presenté dan chaque sujet ek prend bann note courte. Nou bizin demann-nou couma nou kapav mette seki nou pé tendé en pratik dan nou la-vie. A-soir apré chaque journée l’assemblée, avant nou al dormi, kifer nou pa relire nou bann note? Lerla nou kapav examine-nou ek guetté si nou pé contigne attann Jéhovah.
6. (a) Couma certain montré ki zot pa veille bien fason ki zot ecouté, ek kifer sa li enn danger pou zot? (b) Kifer li bien important ki ‘donne enn l’attention special bann kitsoz ki nou pou tendé’ pendant l’assemblée?
6 Nou finn remarké ki pendant bann session, certain quitte la Salle l’assemblée ek zot al assizé dan zot l’auto, ek lerla zot rate program l’assemblée. Certain al marche-marché dan la cour alors ki zot ti bizin pé assizé dan zot place ek ecouté. Bann group jeune quitte l’assemblée ek al marché dehors. Dan le passé, certain serviteur Jéhovah ti faire bann peché grave parski zot pa ti ecoute bien bann rappel Jéhovah. Surement nou pa envie faire pareil couma zot. (2 Rois 17: 13-15) “L’esclave fidel ek avisé” inn prepare enn l’enseignement ki nou tou bizin. Li bien important ki nou ‘donne enn l’attention special bann kitsoz ki nou pou tendé’ pendant chaque session sa trois jour l’assemblée-la. Toulé-jour pou presente enn kitsoz ki concerne nou personnellement, surtout pou presente bann pensée ki pou ena enn bon l’influence lor nou fason vive dan l’avenir. Si nou bien ecouté ek si nou servi bien seki Jéhovah pou donne nou lor plan spirituel pendant sa bann l’assemblée ki pé vini-la, nou l’esperance pou ena enn fondement solid. Sa pou empeche nou “al a la derive,” ek contigne attann Jéhovah.—Mat. 24:45; Héb. 2:1.
7. Couma nou bizin considere bann cantik ki nou chanté ek bann la priere ki nou faire pendant l’assemblée, ek kifer?
7 Bann cantik ek bann la-priere sincere: Bann cantik ki nou chanté pou Jéhovah ek bann la-priere ki nou faire avek grand respé, zot forme partie dan nou l’adoration. (2 Chron. 30:21, 27) Bann cantik ek bann la-priere, zot bann partie important dan program l’assemblée kot nou tou nou kapav participé. Pendant sa trois jour l’assemblée-la, nou pou chante 18 cantik pou loué Jéhovah ek ensam dan l’unité, nou pou adresse huit la-priere nou Papa ki dan le ciel. C’est vrai-mem enn grand privilege, pa vrai? Pendant plus ki 12 heure-temps, Jéhovah pou donne nou enn l’enseignement ek enn formation. Pendant bann cantik ek bann la-priere nou remercié Jéhovah pou tou so bann don ki Li faire nou avek generosité, ek nou loué Li. Nou pa envie ki Jéhovah considere nou couma bann egoïste ek couma bann ki pena reconnaissance, pa vrai? Mais sa kapav arrivé si nou pa chante cantik ek faire la priere ensam avek bann lezot pendant l’assemblée, zis parski nou pa finn organise-nou couma bizin.
8. Couma eski nou kapav faire nou part pou ki ena l’ordre ek la joie pendant l’assemblée? (Guette “Bann rappel pou l’assemblée district.”)
8 Isaïe ti annoncé: “Jéhovah pou contigne attann pou montré zot so faveur, ek a cause sa Li pou levé pou montré so misericorde envers zot.” (Is. 30:18a) La reconnaissance pou misericorde Jéhovah ek pou so faveur ki nou pa merité, bizin pousse nou pou honore Li par nou conduite ek nou l’apparence kan nou reuni pou bann l’assemblée. Nou kapav aussi honore Li kan nou ecoute bien ek nou participe dan cantik ek la priere ki faire pendant l’assemblée. Nou souhaité ki l’assemblée district “Delivrance pé approché!” pou glorifié nou Bondié ek aide nou pou contigne attann Li.
[L’encadré page 5]
Bann rappel pou l’assemblée district
◼ Program: Toulé-trois jour program pou commencé 9:30 a.m. Pou ouvert la porte la Salle l’assemblée 8:00 a.m. Dé-trois minute avant program commencé, president session pou prend place lor l’estrade pendant ki la musik pé joué. Là, nou tou bizin prend nou place pou ki program kapav commencé dan enn fason ordonné. Program pou terminé 5:15 p.m. vendredi, 5:05 p.m. samedi ek 4:10 p.m. dimanche.
◼ Parking: Parski bann place parking limité, nou encourage bann frere pou organise-zot pou voyage ensam pou evité ki enn l’auto amenn zis enn ou deux dimoune.
◼ Reserve bann place: Ou kapav reserve bann place zis pou ou famille, ou-soit pou bann dimoune ki pé voyage ensam avek ou.
◼ Repas pou midi: Amenn ou repas pou midi au lieu ou al acheté mangé en-dehors pendant pause. Ou kapav servi enn ti cooler-bag ki kapav rente enba ou chaise. Fodé pa amenn bann grand cooler-bag, ni bann kitsoz en verre. Bann boisson alkolik interdit dan l’assemblée.
◼ Bann donation: Ena beaucoup depense kan organise enn l’assemblée district. Nou kapav montré nou reconnaissance kan nou faire bann contribution volontaire soit dan la Salle du Royaume ou-soit dan la Salle l’assemblée. Bann donation ki faire par cheque dan bann l’assemblée district, bizin faire lor nom “Association les Témoins de Jéhovah.”
◼ Bann accident ek urgence: Si ena enn urgence medical, ou bizin appel enn kikenn dan service l’accueil, ek c’est li ki pou contacté service premier secours.
◼ Enregistré program: Pa gagne droit branche okenn l’appareil lor la ligne electrik ou-soit lor system sonorisation la Salle l’assemblée. Si ou enregistré program, fodé pa ki sa derange lezot.
◼ Photo: Si ou tire photo, pa servi flash pendant bann session.
◼ Pager ek portable: Ou bizin reglé zot pou ki sa pa derange lezot.
◼ Bann forme pou suive l’interet: Bizin servi forme Veuillez suivre l’intérêt (S-43) pou donne bann renseignement lor n’importe ki dimoune ki manifesté l’interet kan nou donne temoignage informel pendant l’assemblée. Bann proclamateur bizin amenn dé-trois sa bann forme-la avek zot kan zot vinn l’assemblée. Apré, zot kapav donne sa forme-la secretaire zot congregation.—Guette Ministère du Royaume février 2005, p. 6.