Revision Lekol Ministere Theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 27 février 2006. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 2 janvier ziska 27 février 2006. [Note: Kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du ministère, p. 36-7.]
TECHNIK ORATOIRE
1. Kan nou pé enseigné, kifer nou bizin faire bann pause chaque fois ki nou aborde enn nouveau l’idée, mais ki kitsoz kapav empeche nou faire sa? [beF p. 98 § 2-3] Kan nou faire bann pause, sa donne nou l’auditoire l’occasion pou reflechi, pou adapté zot l’esprit, ek pou comprend ki nou pé al developpe enn lot l’idée. Bann pause attire l’attention lor bann l’idée principal, ek sa reste gravé dan l’esprit nou l’auditoire. Enn raison kifer certain orateur developpe bann point enn derriere lot, sans faire okenn pause, c’est parski zot ena trop beaucoup l’idée pou developpé.
2. Kifer li important pou faire bann pause kan nou pé preché? [beF p. 99 § 5–p. 100 § 4] Bann pause permette nou communik pli bien ek vinn pli efficace dan nou ministere. Sa donne dimoune avek ki nou pé kozé, l’occasion pou dire seki li pensé, ek sa pousse li pou reflechi encore plus. Si nou servi bien bann pause, kitfois sa pou pousse li pou dire seki ena dan so leker, ek sa pou permette nou aide li dan enn fason pli efficace. (Prov. 20:5)
3. Kifer li important accentué bann mot clé kan nou pé faire enn sujet, ek couma eski nou kapav faire sa? [beF p. 101 § 1-5, l’encadré] Kan nou accentué bann expression ek bann mot clé, nou capté l’attention nou l’auditoire, ek aussi nou convaink ek motive zot. Nou accentué bann mot kan nou augmente volume nou la-voix, kan nou mette plus sentiment dan nou parole, kan nou diminué vitesse ki nou kozé, ek kan nou faire bann pause. Nou kapav faire sa aussi par bann geste ek bann expression lor nou figure, ek kan nou change ton nou la-voix. Pou accentué bann mot couma bizin, li important ki nou comprend nou sujet ek ki nou ena desir sincere ki nou l’auditoire rappel seki nou dire ek ki zot mette sa en pratik. (Neh. 8:8)
4. Kan nou pé faire enn lecture publik, couma eski nou kapav mette l’accent lor bann l’idée principal? [beF p. 105 § 1-6] Nou bizin fini konn bann l’idée principal dan nou sujet a l’avance. Zot bizin bien clair dan nou l’esprit. Sa pou aide nou pou koné ki bann point nou bizin faire ressorti. Kan nou lire fort enn publication pendant enn l’etude la Bible ou-soit pendant enn reunion, nou bizin mette l’accent lor reponse bann question ki’nn imprimé. Nou bizin aussi mette l’accent lor bann point ki ena enn rapport avek bann sous-titre.
5. Kifer nou bizin ena enn bon volume la voix kan nou enseigné, ek couma eski nou kapav koné ki quantité fort nou bizin kozé? [beF p. 107-8] Si lezot pa tann nou bien, li pou difficile pou zot concentré ek apprecié valeur seki nou pé dire. Lerla kitfois nou pa pou reussi encourage nou l’auditoire pou agir dapré seki finn dire. Reaction nou l’auditoire pou faire nou koné si nou ena enn bon volume la voix ou non. Si nou remarké ki certain pé gagne difficulté pou tann nou, alors nou bizin augmente nou volume. Nou volume la voix pou depann lor (1) quantité dimoune ki pé ecoute nou, (2) kisannla ki ena dan nou l’auditoire, ek (3) si ena kit tapaz autour nou.
EXPOSÉ NO. 1
6. Couma eski bann chrétien zordi apepré dan mem situation ki Esther ek Mordekaï, ek couma eski nou kapav imite l’exemple sa deux-la? [siF p. 94 § 17] Pareil couma Esther ek Mordekaï, bann chrétien zordi bizin soumette avek “bann l’autorité superieur” dan enn lé-monde ki eloigné ar Bondié. Zot faire tou pou vinn bann citoyen ki obeir la loi, zot rann “César seki pou César, mais zot donne Bondié seki pou Bondié.” (Rom. 13:1; Luc 20:25; Esther 1:1; 2:5, 7, 8, 21-23) Pou bann chrétien, volonté Bondié pli important ki obeir sa bann l’autorité-la. L’exemple Mordekaï aide nou pou comprend sa. Li pa ti obeir commandement ki le roi ti donné pou prosterne devant Hamân, ki ti enn Agaguite. (Esther 3:1-4; 5:9) Bann chrétien kapav aussi servi bann moyen legal pou defann-zot si necessaire. (Esther 4:6-8; Actes 25:11)
7. Ki kitsoz Salomon ti pé decrire kan li ti dire ki ‘tou kitsoz ti vanité, coumadir bann dimoune pé galope derriere la brise’? (Eccl. 2:11) [wF 04 15/10 p. 4 § 3-4] Dan sa contexte-la, Salomon ti pé decrire enn la-vie ki centré lor bann plaisir, ek kot enn kikenn envie gagne tou seki sa lé-monde-la kapav offert lor plan materiel ek physik. Salomon ti faire arrange bann lakaz, li ti ena bann jardin, bann verger, bann serviteur, bann zanimo, beaucoup di-bien ek l’argent. Salomon ti aussi interesse-li dan bann kitsoz artistik. Et pourtant, tou sa pa ti ena okenn valeur permanent ek sa pa ti donne li okenn satisfaction durable. (Eccl. 2:1-10) Li ti trouvé ki c’est zis kan nou developpe bann valeur spirituel ki nou kapav gagne vrai satisfaction. (Eccl. 12:13)
8. Couma eski nou kapav developpe l’amour pou Bondié? (Marc 12:30) [wF 04 1/3 p. 19-21] Nou kapav developpe l’amour pou Bondié kan nou augmente nou connaissance lor Li ek lor so bann projet, a travers enn l’etude la Bible. Nou kapav aussi medite lor bann kitsoz ki Li finn faire ek reflechi lor signification bann kitsoz ki nou aprann. (Ps. 77:6, 11, 12) Si nou mazinn bann bon moment ki nou’nn passé pou servi Jéhovah ek bann bienfait ki nou finn gagné kan nou’nn mette en pratik seki Jéhovah dire, sa aussi kapav faire nou l’amour pou Li vinn pli solid. (Prov. 3:5, 6)
9. Ki difference nou kapav faire entre bann valeur spirituel ek enn la-vie materialiste? [wF 04 15/10 p. 5-7] Si nou poursuive bann valeur spirituel, sa pou faire nou konn le bonheur ek gagne bann benediction eternel. Parkont enn la-vie materialiste pou zis faire nou gagne enn satisfaction temporaire ek apré, li al vers la mort. (Prov. 11:4; Mat. 5:3; 2 Cor. 4:18) Enn la-vie materialiste souvent pousse bann dimoune pou faire fraude ek bann kitsoz malhonette pou gagne la richesse, enn position, ek pouvoir. Mais bann valeur spirituel pousse enn dimoune pou donné, au lieu ki zis recevoir. (Is. 48:18; 1 Tim. 6:9, 10)
10. Ki kapav aide nou pou ecoute bien pendant bann l’assemblée, sans ki nou perdi concentration? [beF p. 15-16] Enn kitsoz ki pou permette nou ecoute bien c’est enn bon repos a-soir. Nou kapav aussi grave theme la journée dan nou l’esprit, reflechi lor titre chaque discours ki ena lor program, ek essaye prevoir bann l’idée ki pou developpé. Prend bann note, sa aussi kapav aide nou pou suive bien enn discours ek pou concentré lor seki dire.
LECTURE LA BIBLE TOULÉ-SEMAINE
11. Kifer figure Hamân ti couvert? (Esther 7:8) Hamân pa ti couvert so figure parski li ti ena la honte ou-soit kit regret. Apparemment, c’est bann fonctionnaire la cours ki ti’nn couvert so figure, kitfois sa ti represente la honte ek malheur ki ti pé vinn lor Hamân. Li parette ki c’est seki zot ti habitué faire kan enn kikenn ti condamné a mort, ek kan ti pré pou al touye li. [1, wF 86 15/3 p. 25]
12. Ki qualité creature spirituel ti influence pensée Éliphaz? (Job 4:15, 16) [wF 05 15/9 p. 26 § 2] Kan nou guette lor ton ki Éliphaz ti kozé, nou sur ki sa creature spirituel-la pa ti enn bon ange ki ti sorti kot Bondié. (Job 4:17, 18) Éliphaz ti influencé par enn mauvais l’esprit. So bann parole pa ti reflete bann pensée Bondié. Sinon, kifer eski Jéhovah ti reproche Éliphaz ek so deux camarade parski zot ti koz menti? (Job 42:7)
13. Eski bann parole ki Job inn dire en Job 7:9, 10 ek Job 10:21 montré ki li pa ti croire dan la resurrection? Non. Kan Job ti dire sa bann parole-la, li ti pé pense seki ti pou arrive li dé-suite. Li possible ki li ti pé dire ki si li mort, bann dimoune ki ti pé vive dan so lepok ti nepli pou trouve li. Zot pa ti pou trouve li retourne dan so lakaz ek personne pa ti pou prend li compte ziska le temps ki Bondié inn fixé arrivé. Kitfois Job ti pé aussi rod dire ki personne pa kapav sorti dan shéol ek retourné par li-mem. Kan nou lire Job 14:13-15, li clair ki Job ti croire dan la resurrection. [3, wCE 06 1/4 “Parole Jéhovah vivant—Point biblik interessant dan livre Job”]
14. Ki Job ti oulé dire kan li ti servi l’expression, “Mo sapé avek la peau mo lé-dent”? (Job 19:20) Li pa parette necessaire ki nou al rod bann explication lor la, a travers bann decouverte ki bann scientifik finn faire grace a bann microscope. (itF-2 p. 509) Kan li ti dire ki li ti sapé avek la peau enn kitsoz ki parette pena la peau, kitfois Job ti pé rod dire ki li ti sapé avek preské nanyin. [5, wCE 06 1/4 “Parole Jéhovah vivant—Point biblik interessant dan livre Job”]
15. Ki Job ti oulé dire kan li ti dire: “Mo pa pou abandonne mo l’integrité,” ek ki nou kapav aprann avek sa? (Job 27:5) Job tousel ti ena pouvoir pou garde so prop l’integrité, parski l’integrité depann lor l’amour ki enn dimoune ena pou Bondié. Alors nou bizin developpe enn l’amour profond pou Jéhovah pou nou kapav garde nou l’integrité. [6, wCE 06 1/4 “Parole Jéhovah vivant—Point biblik interessant dan livre Job”]