Enn lekol ki aide nou pou faire bann application pratik
1 A mesure ki nou etudié bann sujet ki ena dan program Lekol Ministère Theocratik pou l’année 2006, nou pou faire zeffort pou tire profit ar bann l’enseignement ki sorti dan la Bible, kan nou applik zot dan nou service sacré ek dan nou la-vie toulé-jour. Nou faire-nou enn devoir pou mette en pratik sa bann kitsoz ki nou aprann-la.—Jean 13:17; Phil. 4:9.
2 Faire commentaire: Dan program pou sa l’année-la, ena enn minute en plus dan le temps ki l’assistance gagné pou participe dan bann point biblik. Sa vedir ki sa frere ki faire point biblik-la bizin faire attention pou ki li termine so participation dan cinq au lieu six minute. Bann ki faire commentaire dan l’assistance bizin, zot aussi, faire attention le temps. Si zot inn bien prepare-li d’avance, bann ki faire commentaire kapav partage bann renseignement utile dan 30 seconde ou-soit mem moins. Apepré dix dimoune bizin kapav faire bann bon commentaire dan sa cinq minute ki donné pou participation l’assistance-la.
3 Bann discours ki instructif: Point biblik interessant ek discours instruction bizin attire l’attention lor valeur bann l’idée, couma zot appliké dan predication ek lezot domaine nou la-vie toulé-jour. Enn orateur bizin pa zis donne bann ki pé ecoute li, desir pou agir. Li bizin precisé ki kitsoz zot bizin faire, montré couma zot kapav faire sa, ek attire l’attention lor bann l’avantage ki zot pou gagné si zot agir dan sa fason-la. Li kapav dire: “C’est coumsa ki sa text-la kapav guide nou,” ou-soit: “C’est coumsa ki nou kapav servi sa bann verset-la dan predication.” Bann ancien ek bann assistant ministeriel ki konn situation dan zot congregation ek dan zot territoire, bizin faire tou seki zot kapav pou faire enn application aussi precis ki possible.
4 Bann l’exemple ki sorti dan la Bible, bien efficace pou faire bann application pratik. Apré ki li’nn cite enn l’exemple dan la Bible, enn orateur kapav dire: “Ou aussi, ou kapav trouve-ou dan mem situation.” Li bizin faire sur ki n’importe ki l’application ki li faire pou enn l’exemple cité dan la Bible, sa li en harmonie avek contexte bann verset-la, avek seki la Bible dire, ek avek seki “l’esclave fidel et avisé” dire dan bann publication.—Mat. 24:45.
5 La sagesse, c’est capacité pou bien servi connaissance ek l’intelligence. “La sagesse, c’est sa ki pli important.” (Prov. 4:7) Nou souhaité ki sa sagesse pratik ki nou pou gagné a travers program Lekol Ministère Theocratik-la, pou ameliore nou capacité pou partage sa avek lezot.