Revision Lekol Ministere Theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 26 décembre 2005. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 7 novembre ziska 26 décembre 2005. [Note: Kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du ministère, p. 36-7.]
TECHNIK ORATOIRE
1. Couma nou kapav faire sur ki kan nou donne bann conseil, c’est ‘parski nou ena l’amour pou lezot’? (Philém. 9) [beF p. 266] Nou envie ki tou seki nou dire, basé lor Parole Bondié ek ki montré enn l’interet sincere pou bann ki pé ecoute nou. Nou bann parole bizin reflete l’amour ek tact, lerla sa pou touche leker bann dimoune ki nou pé rod motivé au lieu ki nou eloigne zot. Li important felicite sincerement bann frere pou bann bon kitsoz ki zot faire dan service Bondié; sa pou rassure zot ki zot ena valeur, ek zot pou pli disposé pou accepté nou l’encouragement. (1 Thess. 1:2-8; 2 Thess. 1:3-5)
2. Couma nou kapav ‘encourage lezot par l’enseignement ki faire gagne la vie’? (Tite 1:9) [beF p. 266 § 5–p. 267 § 1] Nou l’encouragement bizin basé lor Parole Bondié, pa lor nou prop l’opinion ni lor bann la-loi ki dimoune inn inventé. Li important ki nou cite bann bienfait ki nou gagné kan nou mette en pratik bann conseil ki trouve dan la Bible, ek ki so consequence kan nou neglige sa bann conseil-la. Avek enn raisonnement solid ki basé lor la Bible, nou pou kapav explik bien nou l’auditoire seki zot bizin faire ek comment zot kapav faire sa.
3. Kifer li important ki nou bann sujet, zot encourageant ek ki nou kapav faire pou sa? [beF p. 268 § 1-3, l’encadré] Le monde mette beaucoup pression lor nou zordi, ek beaucoup dimoune decouragé a cause sa. La congregation bizin couma enn refuge pou zot ek enn place kot zot kapav gagne l’encouragement. (Is. 32:2) Alors, nou bizin koz dan enn fason ki pou encourage zot ek donne zot la force. Nou envie ki nou parole fortifié zot ek aide zot pou ki grace a Jéhovah ek bann disposition ki Li’nn prend, zot kapav gagne l’espoir ek la force. (Job 16:5; Rom. 15:13)
4. Pareil couma Moïse ti faire, si nou aide nou bann frere ek soeur pou rappel seki Jéhovah finn faire pou so peuple, couma sa kapav encourage zot? (Deut. 3:28; 31:1-8) [beF p. 268 § 5–p. 269 § 2] Pareil couma Moïse ti faire, si nou aide nou bann frere pou rappel tou seki Jéhovah finn faire pou so peuple, sa kapav aide zot pou gagne la force spirituel ek zot pou faire confiance bann promesse ki Jéhovah finn faire. (Jos. 2:14) Nou kapav encourage zot par bann recit ki ena dan la Bible ki montré ki Jéhovah veille lor so bann serviteur ek ki Li protege zot. (Actes 4:1–5:42)
5. Kifer kan nou koz avek la joie lor bann kitsoz ki Jéhovah pé faire dan nou lepok ek seki Li pou faire dan l’avenir, sa kapav encourage nou l’auditoire? [beF p. 270-1] Kan nou koz avek la joie lor bann disposition spirituel ki Jéhovah pé prend dan nou lepok, lor nou fraternité chrétien ki ena so benediction, ek aussi lor grand privilege ki nou ena pou vinn so bann Temoin, sa encourage nou l’auditoire. Kan nou koz lor bann promesse ki Jéhovah finn faire pou l’avenir, ou-soit kan nou faire la priere lor so bann promesse, nou bizin koz avek tou nou leker; sa pou rann sa bann promesse-la vivant ek pou convaink lezot ki sa pou realisé.
EXPOSÉ NO. 1
6. Ki été la Septante, ek kifer bann chrétien interessé ar sa? [siF p. 307 § 12–p. 310 § 14] La “Septante” c’est premier traduction bann l’Écritures hébraïques en grec; li finn terminé dan deuxieme siecle a.n.l. Dan bann l’Écritures grecques chrétiennes, plusieurs centaine citation ek reference lor bann text hébreu, basé lor la “Septante.” En plus, nou trouve nom Bondié dan bann fragment la “Septante” ki finn existé depuis lepok bann premier chrétien.
7. Kisannla bann Massorète ti été, ek couma zot finn aidé dan traduction la Bible? [siF p. 310 § 18; p. 311 § 20-1] Pendant plusieurs siecle apré Jésus, bann Massorète ti copié bann l’Écritures hébraïques ek zot ti faire enn travail exact. Zot ti ecrire bann note dan la marge kan zot ti pé copié bann l’Écritures hébraïques; zot ti note tou bann changement ki ti’nn faire par rapport ar text original par bann dimoune ki ti’nn copié avant. Dan deuxieme moitié premier millenaire nou lepok, bann Massorète ti crée enn system pou kapav lire ek prononce avek plus facilité bann mot hébreux ki ti ecrire sans voyelle. Beaucoup la Bible en hébreu basé lor text massoretik; bann note dan “Traduction du monde nouveau” souvent faire reference ar text massoretik.
8. Ki text finn servi pou traduire bann l’Écritures hébraïque en anglais pou Traduction du monde nouveau, ek kifer nou kapav dire ki c’est enn traduction ki nou kapav faire confiance ek ki ena l’autorité? [siF p. 312 § 28, 30] Finn servi text “Biblia Hebraica” par Rudolf Kittel, pou traduire Traduction du monde nouveau edition anglais. Apré, finn servi nouveau edition, “Biblia Hebraica Stuttgartensia,” pou mette a jour bann note dan “Traduction du monde nouveau” ki ti parette en anglais, en 1984. Couma mentionné dan sa bann note-la, finn servi beaucoup lezot text encore, parmi ena la “Septante” ek lezot codex populaire, pou traduire “Traduction du monde nouveau;” ek tou sa montré ki c’est enn travail extraordinaire ki finn demann bann grand l’etude ek kot finn faire bann recherche bien profond.
9. Couma bann chrétien dan premier siecle ti montré enn grand desir pou annonce Parole Bondié? [siF p. 315 § 1-5] A partir la Pentecôte 33 n.l., bann chrétien ti donne enn temoignage a fond en accord avek l’ordre ki Jésus ti donné en Actes 1:8. Zot ti faire bann dimoune partout dan le monde dan zot lepok, konn bann l’enseignement ki Christ ti enseigné. (Col. 1:23) Alors ki certain ti inspiré pou ecrire “la bonne nouvelle concernant Jésus Christ,” lezot ti vinn bann copiste. (Marc 1:1; Mat. 1:1) Bann premier chrétien ti servi codex, ki pareil couma bann livre modern, pou rassemblé bann livre inspiré ki ti existé sa lepok-la, pou ki zot kapav etudié, faire reference, ek distribué.
10. Kan nou etudié bann manuscrit ek bann ancien text ki existé zordi, ki sa montré nou lor la Bible? [siF p 320 § 32] Sa montré ki bann text l’Écritures hébraïques ek grecques chrétienne ki nou ena zordi, zot pareil couma bann text original ki ti inspiré par Bondié. (2 Pierre 1:20, 21) Mem si bann copiste pa ti inspiré, nou ena beaucoup preuve ki montré, ki la Bible li exact ek vrai.
LECTURE LA BIBLE TOULÉ-SEMAINE
11. Kan Jéhovah pa ti laisse David construire temple, eski sa vedir ki Li pa ti d’accord avek bann la-guerre ki David ti faire? (1 Chron. 22:6-10) Non. Bann la-guerre ki David ti faire c’etait pou retire mechanceté ek pou elimine bann ki ti opposé kont souveraineté Jéhovah, pou agrandi territoire bann Israélite ziska limite ki Jéhovah ti’nn fixé, ek pou etabli la justice ek la paix. Mais, parski l’objectif final Royaume Jéhovah c’est surtout pou etablir la paix, temple Jéhovah ti pou bizin construire dan la paix, par enn dimoune ki ti reste en paix, Salomon. [1, itF-2 p. 869 § 11]
12. Dan la priere ki li ti faire pou l’inauguration temple, couma Salomon ti montré ki Jéhovah pa zis prend compte besoin so bann serviteur en tant ki group, mais ki Li conscient situation chaque dimoune ki ena la crainte pou Li? (2 Chron. 6:29, 30) Salomon ti montré ki chaque dimoune ki ena la crainte pou Bondié ena so prop difficulté pou enduré. Kitfois pou enn dimoune c’est la maladie. Pou enn lot c’est bann problem affectif. Certain kitfois pé souffert a cause la mort enn kikenn ki zot ti content. Ena aussi bann problem couma chomage, bann difficulté economik, ek bann problem familial ki faire partie dan bann lé-temps difficile. [4, wF 97 15/4 p. 4]
13. Ki été ‘bann demon ki ena forme enn bouc’ ki mentionné dan 2 Chroniques 11:15? Li clair, ki dan sa contexte-la, terme hébreu pou ‘demon ki ena forme enn bouc,’ finn servi en rapport avek bann kitsoz ki zot ti pé prié ek avek ki zot ti pé offert bann sacrifice, dan la fausse religion. Kitfois pou bann ki ti pé adore sa, zot ti pensé ki sa bann demon-la ti ena bann poil ek zot ti dan forme enn bouc. [5, itF-1 p. 618; Rbi8 note]
14. Si Baasha ti commence regné “dan troisieme l’année règne Asa” ek ki li finn regné zis 24 an, alors couma nou kapav expliké ki Baasha ti al laguerre “kont Juda” “dan trente-sixieme l’année règne Asa”? (1 Rois 15:33; 2 Chron. 16:1) Certain pensé ki enn scribe finn mal copié ek zot croire en fait c’est soit 16eme ou-soit 26eme l’année règne Asa; mais li pa necessaire pensé ki c’est enn erreur pou trouve enn l’explication. Bann commentateur juif cite “Seder Olam” ek dapré sa livre-la, finn compte “trente sixieme l’année” a partir naissance royaume Juda (997 a.n.l.) alors sa ti corresponn, en realité, ar 16eme l’année règne Asa. [6, itF-1 p. 195 par. 3]
15. Couma 2 Chroniques 20:22, 23 montré nou clairement seki bientot pou arrive le monde Satan? Pareil couma Révélation 17:16, 17 montré, Jéhovah ena enn “pensée” concernant Babylone la Grande, ek la chrétienté li-mem pli pire ladan. Li pou pousse bann nation ki ena l’armée, ek ki membre Nations unies, pou ena sa mem ‘pensée-la,’ setadir pou tourne kont la fausse religion ek detruire li completement. Pareil couma bann Édomite dan montagne Seïr, system grand l’apostasie la chrétienté pou disparette. [7, wF 84 1/10 p. 18 § 17]