Revision Lekol Ministere Theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 31 octobre 2005. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 5 septembre ziska 31 octobre 2005. [Note: Kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du ministère, p. 36-7.]
TECHNIK ORATOIRE
1. Couma nou kapav faire sur ki seki nou enseigné lor Parole Bondié, touche leker bann dimoune? (Mat. 13:19) [beF p. 258 § 1-2, l’encadré] Nou bizin faire zeffort pou touche leker bann dimoune, zot bann sentiment ek zot motivation, parski sa kapav faire zot vinn proche ar Bondié. Li pou bon ki nou discerné seki finn deja touche zot leker. Apré sa, nou bizin faire zeffort pou encourage zot cultive bann qualité couma l’amour ek la crainte pou Bondié. Li important nou touche leker bann dimoune dan sa fason-la, parski sa kapav aide zot pou aprann faire Jéhovah plaisir.
2. Ki nou kapav faire pou koné ki ena dan leker enn dimoune, mais ki kitsoz nou bizin veille bien? [beF p. 259 § 2-3] Bann question couma “Ki ou pensé lor . . . ?” ou-soit “Kifer ou sur ki . . . ?,” permette enn etudiant reflechi ek aide enn enseignant discerné ki ena vrai-mem dan so leker. Kan nou pose bann question, nou bizin ena discernement ek faire attention lor seki nou dire; fodé pa ki nou etudiant gagne l’impression ki nou pé faire enn l’enquete avek li. Enn bon enseignant ecoute bien, pou ki li comprend seki so etudiant vrai-mem pensé lor sujet ki zot pé discuté, ek sa pou aide li pou li koné couma pou reponn a travers la Bible, ek sa pou motive etudiant-la. (Prov. 16:23)
3. Kan nou pé enseigné, kifer li important ki nou mette l’accent lor bann qualité extraordinaire ki Jéhovah ena? [beF p. 260 § 1] Kan nou mette l’accent lor bann qualité ki Jéhovah ena, par exemple lor so bonté, so misericorde, ek so faveur ki nou pa merité, sa kapav touche leker bann ki pé ecoute nou ek augmente l’amour ki zot ena pou Bondié. Kan nou prend le temps pou motive zot pou medite lor bann qualité ki Jéhovah ena, sa pou aide zot vinn pli proche ar Bondié ek pou developpe enn l’amitié pli solid avek Li. Bann discussion coumsa, souvent pou touche fond zot leker, parski nou finn crée a l’image de Dieu ek nou aussi nou ena sa bann qualité-la. (Gen. 1:27)
4. Couma nou kapav aide nou bann etudiant pou discerné dan ki domaine zot bizin progressé? [beF p. 260 § 4–p. 261 § 1] Nou bizin faire zot comprend clairement ki zot conduite ena enn l’effet lor zot relation avek Jéhovah. Zot conduite kapav soit faire nou Createur la peine ou-soit faire Li plaisir. (Ps. 78:40-42; Prov. 27:11) Nou kapav aide zot pou trouve bann benediction ki zot gagné kan zot obeir la loi Bondié, ek pou considere l’obeissance couma enn fason pou demontré zot l’attachement pou Bondié, pa couma enn fardeau. (Ps. 19:11; Is. 48:17)
5. Couma nou kapav aide bann dimoune ki etudié la Bible avek nou ou-soit bann ki ecoute nou, pou examine zot mobile kan zot faire kitsoz? [beF p. 262 § 2-3] Kan nou pé enseigne zot, nou bizin encourage nou bann etudiant ou-soit bann dimoune ki ecoute nou, pou demann zot-mem: ‘Kifer mo oulé faire sa? Ki mobile ki pousse moi pou faire sa,—eski c’est parski mo ena reconnaissance pou tou seki Jéhovah finn faire pou moi? C’est vrai, kitfois mo pé suive bann principe biblik, mais ki mo pensé lor sa bann principe-la?’ (Ps. 37:4) Nou bizin encourage nou bann etudiant ou-soit bann ki ecoute nou pou prié Jéhovah pou ki zot kapav gagne la force ek la foi pou ena la crainte pou so grand nom. (Ps. 86:11)
EXPOSÉ NO. 1
6. Ki vedir ‘rod Jéhovah vrai-mem,’ ek couma nou kapav montré ki nou pé faire sa? (Héb. 11:6) [wF 03 15/8 p. 25 § 2; p. 26 § 1-2; p. 27 § 1] ‘Rod Jéhovah vrai-mem’ vedir faire bann grand zeffort touletan, ‘persisté avek courage’ en accord avek volonté Bondié. (Luc 11:8; 1 Jean 5:14) Nou montré ki nou pé rod faveur Jéhovah vrai-mem, kan nou bien devoué pou accompli n’importe ki responsabilité theocratik ki’nn propose nou. Sa kapav par exemple, kan nou prepare bien nou bann reunion, kan nou faire zeffort pou ameliore nou ministere, ek kan nou rann-nou disponible pou faire service a plein temps.
7. Ki été “model bann parole salutaire,” ek couma bann ancien kapav montré ki zot pé reste attaché ar sa? (2 Tim. 1:13, 14) [wF 03 1/1 p. 29 § 2–p. 30 § 1] Dan 1 Timothée 6:3, Paul expliké ki bann “parole salutaire” c’est “bann parole nou Seigneur Jésus Christ.” Parski bann parole Jésus en harmonie avek tou bann ‘l’Écriture ki inspiré par Bondié ek ki utile pou enseigné,’ sa vedir ki “bann parole salutaire” represente tou bann l’enseignement biblik. (2 Tim. 3:16, 17) Bann ancien bizin reste attaché ar Parole Bondié kan zot pé enseigné dan la congregation ek fodé pa zot enseigne philosophie ki le monde enseigné ni zot l’idée personnel. (2 Tim. 4:2) Zot bizin suive mem principe kan zot pé preché en-dehors la congregation. (2 Tim. 4:5)
8. Ki sa vedir l’expression “canon de la Bible,” ek cite certain facteur ki montré si enn livre la Bible vrai-mem faire partie dan ‘canon de la Bible’? [siF p. 299 § 5-6] L’expression “canon de la Bible” c’est enn collection ou-soit enn la-liste bann livre la Bible ki finn reconette couma vrai ek inspiré. Parmi bann facteur ki montré si enn livre la Bible vrai-mem faire partie dan ‘canon de la Bible’ c’est: li bizin koz lor bann fason ki Jéhovah finn agir par rapport avek la terre, li bizin dirige bann dimoune vers l’adoration Bondié, ek pousse zot pou ena enn grand respé pou so nom, pou tou seki Li’nn faire ek pou so bann projet concernant la terre. Livre-la bizin prouvé ki li inspiré par Bondié. Fodé pa li encourage superstition ou-soit l’adoration bann lezot creature, mais li bizin encourage lezot pou content ek servi Bondié.
9. Kifer Canon Muratori, ki daté depuis deuxieme moitié deuxieme siecle nou lepok, li bien important pou confirmé ki bann Écritures grecques chrétiennes forme partie dan ‘canon de la Bible’? [siF p. 302 § 19] Sa document en latin-la koz lor Luc couma troisieme Evangile, seki montré ki avant, li ti mentionne aussi Matthieu ek Marc. Li aussi dire ki Jean c’est “quatrieme livre parmi bann Evangile.” Sa document-la mentionne bann lettre ki l’apotre Paul ti ecrire bann congregation ek aussi bann lettre personnel ki li ti ecrire certain frere. Li mentionne aussi lezot livre la Bible ki ziska zordi finn accepté couma bann livre ki forme partie dan ‘canon de la Bible.’
10. Couma nou koné ki la Bible autorise pou traduire so text dan lezot langue, ek ki bann ancien traduction la Bible finn montré? [siF p. 307 § 9] Oui. Parole ki Bondié ti dire Israël “Rejouir zot, bann nation, avek so peuple” ek prophetie ki Jésus ti annoncé ki la bonne nouvelle lor Royaume pou preché partout kot dimoune resté lor la terre couma enn temoignage pou tou bann nation, montré ki bann Écriture autorise traduction la Bible. (Deut. 32:43; Mat. 24:14) Traduction bann ancien manuscrit confirmé ki text original en hébreu finn traduire avek enn grand exactitude.
LECTURE LA BIBLE TOULÉ-SEMAINE
11. Eski 2 Rois 13:21 soutenir l’idée ki bizin adore bann lezo enn dimoune mort ou-soit bann kitsoz ki’nn enterré avek li? Sa recit-la koz lor enn mirak concernant bann lezo sans vie enn prophete Bondié. Élisha ti’nn mort ek li “pa ti konn nanyin ditou” kan sa mirak-la ti arrivé. Alors, sa resurrection-la finn arrivé grace a puissance Jéhovah ki ena pouvoir pou faire bann mirak par so l’esprit saint, setadir so la-force active. (Eccl. 9:5, 10) Li important noté ki la Bible pa dire ki bann Israélite ti adore bann lezo Élisha. [1, wCE 05 1/10 “Parole Jéhovah vivant—Point biblik interessant dan deuxieme livre Rois”]
12. Eski Hizqiya ti faire enn l’alliance avek l’Égypte? (2 Rois 18:19-21, 25) Non. L’accusation Rabshaqé ti fausse, ek kan li ti dire ki li ti’nn vini avek “l’autorisation Jéhovah,” sa aussi ti fausse. Le roi Hizqiya, ki ti fidel, ti depann zis lor Jéhovah. [2, wCE 05 1/10 “Parole Jéhovah vivant—Point biblik interessant dan deuxieme livre Rois”]
13. Mem si bann archive assyrien pa mentionné ki Jéhovah finn faire Sennakérib konn enn grand defaite, ki ou trouve interessant dan sa bann document-la? (2 Rois 19:35, 36) Bann archive Sennakérib, ki gravé lor Prisme l’Institut oriental ek aussi lor Prisme Taylor, dire: “En seki concerne [Hizqiya], enn Juif, li pa ti soumette ar mo joug; mo ti entoure so 46 grand la-ville, zot bann forteresse, ek enn quantité ti village ki ti tout autour, ek mo ti prend (zot) tou . . . Ek [Hizqiya] li-mem, mo ti laisse-li enfermé dan Jérusalem, so residence royal, couma enn zoiseau dan enn lakaz.” Sennakérib ti dire: “[Hizqiya] ti . . . peur kan li trouve mo grand puissance.” Mais, li pa dire ki li ti faire Hizqiya vinn enn prisonnier, ni li dire ki li ti prend Jérusalem, pareil couma li’nn dire pou bann “grand la-ville” ek “bann ti village.” Sa montré, dan enn certaine fason ki seki la Bible dire, li vrai. En realité la Bible dire ki tou bann ki ti a la tête l’armée Sennakérib, ti detruire. [3, wF 88 15/2 p. 28 § 2]
14. Kisannla ti papa Shéaltiel? (1 Chron. 3:16-18) En harmonie avek Matthieu 1:12, 1 Chroniques 3:17 montré ki Yekonia (le roi Yehoïakîn) ti papa Shéaltiel. Mais dan so l’Evangile, Luc appel Shéaltiel “garson Néri.” (Luc 3:27) Apparemment Néri ti donne Shéaltiel, so tifi en mariage. Ek couma bann Hébreux ti considere zot gendre couma zot garson, surtout dan bann genealogie, Luc ti kapav qualifié Shéaltiel couma garson Néri. C’est pou mem raison ki Luc koz lor Joseph couma garson Héli, alors ki en realité Héli ti papa Marie, femme Joseph. (Luc 3:23) [5, wF 92 15/7 p. 5-6]
15. Dan lepok le roi Saül, couma bann Rubénite, bann Gadite, ek demi-tribu Manassé finn laisse enn bon l’exemple pou bann serviteur Bondié zordi? (1 Chron. 5:18-22) En harmonie avek promesse ki Jéhovah ti faire avek zot ancetre Abraham, avek courage zot finn elargi zot territoire pli loin ki Guiléad. (Gen. 15:18) Sa situation-la finn faire zot laguerre kont bann Hagrite. Zot inn laguerre mem si zot ti ena zis 44,760 soldat alors ki zot l’ennemi ti pli beaucoup ek pli fort. Par la suite, zot finn prend 100,000 prisonnier. Sans doute ti ena plus ki sa dan l’armée bann Hagrite, parski la Bible dire ki ‘ti ena beaucoup ki ti mort.’ Li clair ki bann Rubénite, bann Gadite ek demi-tribu Manassé pa ti pou kapav gagne sa victoire-la par zot prop la-force. Si zot ti’nn gagne la victoire, c’est parski zot ti tourne-zot vers Jéhovah pou demann Li so l’aide. [6]