Jour Jéhovah bien pré
1 Bann chrétien bien envie ki jour Jéhovah vini, sa jour kot Li pou detruire sa mauvais system-la ek Li pou etabli enn lé-monde kot pou ena la justice. (2 Pierre 3:12, 13, note) Nou pa koné exactement kan sa jour-la pou vini, ek a cause sa, nou bizin veillé, ek aide lezot aussi pou faire pareil. (Ézék. 33:7-9; Mat. 24:42-44) Si nou medite lor bann prophetie ki ena dan Parole Bondié, sa pou augmente nou confiance ki “grand jour Jéhovah bien pré.”—Tseph. 1:14.
2 Bann puissance mondial ki regné enn apré lot: En Révélation 17:9-11, l’apotre Jean koz lor “sept lé-roi” ki represente sept puissance mondial ki ti pou regné enn apré lot. Jean koz aussi lor “enn huitieme lé-roi” ki zordi represente l’Organisation des Nations unies. Eski ena bann lezot puissance mondial ki pou vini apré? Non. Dapré sa prophetie-la, huitieme lé-roi-la “al vers la destruction,” ek apré li, pa koz lor okenn lot lé-roi humain encore. Eski sa prophetie-la aide ou pou comprend kot nou été dan le temps?
3 Daniel 2:31-45 aide nou pou comprend ki jour Jéhovah pé vini. Dan sa prophetie-la, Neboukadnetsar ti trouve enn grand zimage dan enn rêve. Sa zimage-la represente bann puissance mondial ki ti pou regné enn apré lot. Sakenn so tour, tou sa bann puissance mondial-la finn regné lor la terre. Ki puissance pé regné zordi? Puissance ki representé par lipié sa zimage-la. Sa prophetie-la decrire clairement seki pou arrivé apré. Tou bann gouvernement humain pou detruire completement, ek lerla “enn royaume ki jamais pa pou tombé” pou prend zot place. Eski ou trouvé couma sa prophetie-la montré ki jour Jéhovah bien pré?
4 Lezot preuve: Nou trouve lezot preuve ki jour Jéhovah bien pré. L’apotre Paul ti predire couma bann dimoune pou été “dan dernier jour,” ek nou pé trouvé ki sa pé realisé. (2 Tim. 3:1-5) En plus, nou pé participe dan enn grand temoignage ki pé faire dan le monde entier—enn travail ki bizin faire avant la fin vini. (Mat. 24:14) Kan nou preché, anou aide lezot pou comprend ki reste bien tigit lé-temps, pareil couma enn ange ti dire: “Ena la crainte pou Bondié, ek donne Li la gloire, parski l’heure so jugement inn arrivé.”—Rév. 14:6, 7.