Revision Lekol Ministere Theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 25 avril 2005. Surveillant lekol pou faire enn revision pendant 30 minute. Sa revision-la basé lor bann sujet ki ti faire a partir semaine 7 mars ziska 25 avril 2005. [Note: Kan pena okenn reference apré bann question, ou pou bizin faire ou prop recherche pou trouve bann reponse.—Guette livre École du ministère, p. 36-7.]
TECHNIK ORATOIRE
1. Kan nou pé prepare enn devoir, couma nou kapav servi bien bann reference ki’nn donne nou, ek kifer sa li important? [2, beF p. 234 par. 1-3, bann l’encadré] Nou kapav servi bien bann reference ki’nn donne nou, kan nou developpe nou sujet lor theme ki nou’nn gagné, lor bann verset la Bible, ek lor bann point principal. Kan nou faire sa, nou montré reconnaissance pou disposition ki esclave fidel ek avisé finn prend pou nourri nou lor plan spirituel. (Mat. 24:45)
2. Dan bann source reference ki nou’nn gagné, ki quantité l’idée nou bizin developpé? [2, beF p. 234 par. 4–p. 235 par. 1] Nou bizin aborde seulement quantité ki nou kapav developpe bien dan lé-temps ki nou’nn gagné, ek concentré lor bann portion ki pou aide nou pou arrive l’objectif nou devoir. Fodé pa ki nou sacrifié enn bon l’enseignement ek enn bon developpement bann point important zis pou faire resumé rapide enn quantité l’idée.
3. Kan nou pé preché, couma nou kapav servi bann question pou encourage bann dimoune kozé? (Actes 8:30) [3, beF p. 236 par. 2-5] Plusieurs Témoins choisir bann topik ki interesse ek concerne bann dimoune dan zot territoire pou encourage zot exprime-zot. Ek zot demandé: “Eski ou’nn deja demann-ou . . . ?” ou-soit “Ki ou pensé . . . ?” Enn fois ki nou’nn donne zot l’occasion pou exprime-zot, bann dimoune pou pli disposé pou ecoute nou.
4. Couma nou kapav servi bann question pou aide bann etudiant la Bible, servi zot “capacité pou raisonné?” (Rom. 12:1) [5, beF p. 238 par. 1] Kan nou pé koz lor bann point important, nou kapav servi bann question secondaire pou ki bann etudiant-la pa zis donne bann reponse ki trouve dan livre. Nou kapav demandé: “Couma seki nou pé etudié asterla, li ena enn lien avek lot point principal ki nou’nn etudié avant? Kifer sa li important? Couma sa bizin influence nou la-vie?” Kan nou pose bann question au lieu ki nou zis donne nou prop l’opinion, nou pé aide etudiant-la pou servi so “capacité pou raisonné.”
5. Ki l’effet bann question ki trouve dan Romains 8:31, 32 ek Isaïe 14:27 ena? [7, beF p. 239 par. 1-2] Dan toulé-deux cas, bann ecrivain la Bible ti servi bann question pou exprime zot conviction. Bann question ki ena dan sa bann verset-la montré ki pena nanyin pli vrai ki sa bann l’idée-la. Nou kapav servi sa bann qualité question-la pou donne nou bann parole plus poids.
EXPOSÉ NO. 1
6. Couma nou kapav pose Christ couma enn base kan nou faire bann disciple? (1 Cor. 3:11) [1, beF p. 278 par. 1-2] Pou ‘pose Christ couma base,’ nou bizin aide bann dimoune pou exerce la foi dan sacrifice Jésus couma enn moyen pou gagne la vie sauve. Li important ki nou enseigne nou bann etudiant pou considere Jésus couma zot model ek pou considere bann Evangile couma enn guide ki zot bizin suive fidelement. (1 Pierre 2:21) Kan zot bizin prend bann decision, nou bizin encourage zot pou demann zot-mem: ‘Ki Jésus ti pou faire si li ti dan sa situation-la? Eski mo conduite montré l’appreciation pou seki li’nn faire pou moi?’ (Jean 14:15, 21)
7. Si Jéhovah finn donne Jésus tou l’autorité pou dirigé en 1914, ki sa signifie kan nou prié: “Ki to royaume vini”? (Mat. 6:9, 10) [2, beF p. 279 par. 4] Kan nou prié, “Ki to royaume vini,” nou’lé dire ki Royaume Bondié pou agir avek determination pou realise bann prophetie couma ena dan Daniel 2:44 ek Révélation 21:2-4. Nou ena mission pou annonce bann benediction ki Royaume Bondié pou amené bientot. (Mat. 24:14)
8. Kifer tou bann chrétien bizin interessé pou konn lire, et ki l’exemple Jésus finn laissé dan sa domaine-la? [5, wF 03 15/3 p. 10 par. 5; p. 12 par. 2] Bondié finn donne nou so Parole en forme ecrite, a cause sa Li attann ki so bann serviteur konn lire ek ecrire aussi bien ki possible. Li pli facile pou applik bann conseil ki Bondié donne nou ek ‘pou servi parole la verité couma bizin’ kan nou comprend bien seki nou lire dan la Bible ek dan bann lezot livre ki basé lor la Bible. (2 Tim. 2:15) Jésus ti konn lire parski kan li ena seulement 12 an, li ti kapav ena bann discussion profond, avek bann dimoune bien eduqué dan temple. (Luc 2:46, 47)
9. Couma l’exemple Yoshiya ek Jésus kapav aide bann jeune pou progressé spirituellement? [6, wCE 03 1/4 p. 30 par. 3-4; p. 32 par. 3] Jeune lé-roi Yoshiya ti faire lire Parole Bondié pou li. Seki li finn tendé finn touche so leker et finn pousse-li pou servi Jéhovah et pou encourage encore plus vrai l’adoration. (2 Chron. 34:14-21, 33) Pou Jésus, service pou Jéhovah pa ti zis enn l’objectif mais enn vrai mission ki li ti bizin accompli. Li ti trouve plaisir ek enn grand satisfaction pou faire volonté Bondié. (Jean 4:34) Pou ki zot kapav faire bann progré spirituel, bann jeune bizin cultive bann bon mobile ki zot pou gagné grace a connaissance lor Createur.
10. Kifer nou kapav mette nou confiance en Bondié? (Prov. 3:5, 6) [7, wCE 03 1/11 p. 4-5 par. 6-7] Nou kapav ena confiance en Jéhovah parski Li saint et jamais Li pa pou laisse ni so bann valeur moral, ni so bann maniere ou-soit so bann action vinn mauvais ni grossier. (Is. 6:3) En plus, sa l’amour ki Bondié ena-la influence tou seki Li faire. (1 Jean 4:8) Et aussi, Li comprend nou plus ki n’importe kisannla. (Ps. 139:1, 6)
LECTURE LA-BIBLE TOULÉ-SEMAINE
11. Kifer Hanna ti prié Jéhovah pou “donne la force so lé-roi” alors ki Israël pa ti ena okenn lé-roi? (1 Sam. 2:10) La Loi Mosaïk ti predire ki enn jour bann Israélite ti pou gagne enn lé-roi humain. (Deut. 17:14-18) Dan prophetie ki li prononcé zis avant li mort, Jacob ti dire: “Sceptre [enn symbole l’autorité royal] pa pou quitte Juda.” (Gen. 49:10) En plus, Jéhovah ti dire concernant Sara, ancetre bann Israélite: ‘Lé-roi bann peuple pou vinn de li.’ (Gen. 17:16) Alors, Hanna ti pé prié concernant enn futur lé-roi. [1, wF 05 15/3 “Parole Jéhovah vivant-Point biblik interessant dan livre 1 Samuel”]
12. Israël ti gagne enn defaite malgré ki l’arche de l’alliance ti au milieu zot. Ki sa aprann nou? (1 Sam. 4:3, 4, 10) Si nou croire ki bann objet ena bann la-force surnaturel, sa kapav amenn nou vers bann consequence bien grave. Mem enn kitsoz aussi sacré ki “l’arche de l’alliance,” pa ti enn porte-bonheur ki ti donne protection. Nou bizin “reste loin avek bann idole.” (1 Jean 5:21) [1, wF 05 15/3 “Parole Jéhovah vivant-Point biblik interessant dan livre 1 Samuel;” wF 02 1/7 p. 6-8]
13. Kifer 1 Chroniques 2:13-15 dire ki David ti septieme garson Jessé, mais dan 1 Samuel 16:10, 11 dire li ti huitieme garson? La Bible dire ki Jessé ti ena “huit garson.” (1 Sam. 17:12) Apparemment enn so bann garson pa ti vive assez longtemps pou li kapav marié ek gagne zenfant. Parski li’nn mort sans okenn descendant, li pa ti kapav ena okenn part dan l’heritage so tribu ek okenn l’importance dan bann la-liste genealogie: bann descendant Jessé. [5, wF 02 15/9 p. 31]
14. Ki “mauvais l’esprit” ti faire Saül gagne bien peur? (1 Sam. 16:14) Sa mauvais l’esprit ki ti empeche l’esprit Saül pou en paix, ti tendance so l’esprit ek so leker—so tendance pou faire seki mauvais. Kan Jéhovah ti retire So l’esprit saint lor li, Saül ti perdi So protection et li ti laisse so mauvais tendance influence li. Parski Bondié finn permette ki sa mauvais l’esprit-la remplace So l’esprit saint, la-Bible appel sa l’esprit-la “enn mauvais l’esprit ki vinn de Jéhovah.” [5, wF 05 15/3 “Parole Jéhovah vivant-Point biblik interessant dan livre 1 Samuel”]
15. Prediction ki “Samuel” ti faire par moyen sorciere En-dor, eski li ti vrai? (1 Sam. 28:16-19) Non. Saül ti bien blessé dan la guerre kont bann Philistin, mais li’nn mort parski li’nn suicidé. (1 Sam. 31:1-4) Ek Ish-Bosheth, enn garson Saül ti survive contrairement ar seki ti annoncé ek ki ti faire croire ki tou bann garson Saül ti pou mort ensam ar li. [8, wF 88 15/1 p. 3 par. 3-4]