5ème Partie: Bann l’Étude Biblik Ki Faire Nou Étudiant Progressé
Ki Quantité Paragraphe Nou Bizin Faire?
1 Kan li ti enseigné, Jésus ti prend compte limite so bann disciple, li ti koz avec zot ‘dépendant lor ki quantité zot ti kapav écouté.’ (Marc 4:33; Jean 16:12) Li pareil pou bann ki enseigne Parole Bondié zordi; zot bizin calcule bien ki quantité paragraphe zot pou faire dans sa lé-temps ki zot pou faire l’étude-la. Sa pou dépann lor capacité ek situation, enseignant ek étudiant-la toulé-deux.
2 Bâtir enn la-Foi Solide: Certain étudiant kitfois prend deux ou-soit trois l’étude pou comprend séki lézot étudiant pou comprend facilement dans enn seul l’étude. Li beaucoup pli important ki nou aide étudiant-la comprend bien bann paragraphe, au lieu ki nou faire enn quantité paragraphe dans enn tigit lé-temps. Chaque étudiant bizin enn base solide pou so nouveau la-foi dans Parole Bondié.—Prov. 4:7; Rom. 12:2.
3 Kan ou conduire l’étude toulé-semaine, prend quantité lé-temps ki bizin pou aide étudiant-la comprend ek accepté séki li pé aprann dans Parole Bondié. Évite al trop vite sinon ou étudiant pa pou tire beaucoup profit ar la vérité ki pé enseigne li. Prend assez lé-temps pou attire so l’attention lor bann point important ek pou examine bann verset important ki appuye sa bann l’enseignement-la.—2 Tim. 3:16, 17.
4 Évite Al en Dehors Sujet: En mem temps ki nou pa’lé al trop vite pendant l’étude, nou pa’lé aussi sa fois-la, al en dehors sujet. Si enn étudiant éna tendance koz beaucoup lor bann zaffaire personnel, kitfois li pou nécessaire ki nou faire enn l’arrangement pou discute sa après l’étude.—Éccl. 3:1.
5 Parkont, nou kapav tellement content la vérité ek envie partage sa, ki li difficile pou nou pa koz beaucoup pendant l’étude. (Ps. 145:6, 7) Enn fois lé-temps, enn point ou-soit enn l’expérience, kapav profitable pou nou l’étude, mais si nou faire sa trop souvent ek koz lor la pendant longtemps, sa pou empêche nou étudiant gagne la connaissance exact lor bann l’enseignement de base lor la Bible.
6 Kan nou faire enn certaine quantité paragraphe ki raisonnable pendant chaque l’étude, nou aide bann étudiant pou “marche dans la lumière Jéhovah.”—Is. 2:5.