Eski Ou Kapav Apporte Ou l’Aide?
1 Jéhovah pé touletan rode bann l’occasions pou aide so bann fidèles serviteurs. (2 Chron. 16:9; Is. 41:10, 13) Isaïe ti compare Jéhovah ar enn berger ki prend soin so troupeau kan li ti écrire: “Li pou rassemblé so bann ti moutons avec so lé-bras; ek Li pou sarrié zot lor so l’estomac. Avec soin, Li pou guide bann ki pé donne zot tipti du lait.” (Is. 40:11) Anou guette certains façons kot nous kapav imite l’intérêt sincère ki Jéhovah éna pou so bann serviteurs.
2 Aide Bann Nouveaux: Nous kapav aide bann nouveaux kan nous invite zot pou profite enn compagnie encourageant ensemble avec nous. (Prov. 13:20) Enn frère encore rappelle couma lézot ti aide li kan li ti commence associé avec la congrégation. Li dire: “Plusieurs fois, enn famille ti invite moi pou assisté l’étude familiale avec zot. À mesure ki mo ti progressé, enn jeune couple pionnier ti invite moi pou faire bann longue journées prédication avec zot. Nous ti touletan gagne bann bon conversations spirituel.” Li ajouté: “Avant mo vinn enn Chrétien, mo ti habitué sorti toulé-Vendredi ek Samedi soir. Mais lé temps ki mo’nn passé avec bann frères ek soeurs finn rempli désir ki mo ti éna pou fréquente lézot dimoune.” L’intérêt sincère de la congrégation finn aide sa frère-la pou vinn fort ek stable dans la foi. Zordi, li pé servi en tant ki membre de la famille du Béthel.—Col. 2:6, 7.
3 Édifié Nou Camarade: Kan nou bann frères pé konn bann situations difficile, peut-être nous kapav discerné ki c’est enn l’occasion pou apporte nou l’aide. Eski ou kapav faire l’arrangement pou donne enn témoignage par téléphone ensemble avec enn proclamateur ki pa kapav sorti à cause li malade, ou-soit invite li pou accompagne ou pou faire enn l’étude Biblique? Ou kapav même invite enn étudiant pou vinn kot sa proclamateur-la pou faire l’étude. Kitfois, enn parent ki éna bann ti zenfants pou content ki nous aide li dans la prédication. Eski éna bann proclamateurs ki timide ki pou content nous aide zot pou faire bann nouvelles visite ou-soit aide zot kan zot pé participe dans lézot aspect nou ministère? Enn l’intérêt sincère pou nou bann frères pou pousse nous pou rode bann moyens pou édifié zot.—Rom. 14:19.
4 Kan nous imite l’intérêt sincère ki Jéhovah éna pou so bann serviteurs, nous pou fortifié nou camarade, nous pou aide la congrégation pou grandi dans l’amour, ek nous pou glorifié nou Papa ki dans le ciel.—Éph. 4:16.