Asim Bann Responsabilite dan la Kongregasyon—Nu Tu Konserne par Sa!
1. (a) Ki Psom 116 verse 12 dir, ek ki sa ankuraz nu pu fer? (b) Ki lobzektif ki bann Kretyin kapav met devan zot, Pol mansyone dan 1 Tim. 3:1?
1 Plizir syek avan ki Bondye furni la ranson, enn ekrivin psom ti exprim so rekonesans pu mizerikord, delivrans ek led ki Bondye ti akord li. Li ti dir: “Ki mo pu rann Zeova pu tu seki Li fer pu mwa?” (Psom 116:12) Si nu’nn angaz nu ar Zeova avek tu nu leker, nu bizin pran plezir pu fixe bann lobzektif spirityel. Ena enn kantite bon lobzektif ki bann Kretyin kapav met devan zot. Lapot Pol ti mansyonn enn kan li ti ekrir: “Sa parol-la li fidel. Si enn kikenn ena dezir pu vinn enn sirveyan, li pe dezir enn bon travay.”—1 Tim. 3:1.
2. Kifer nu kapav dir ki se Bondye ki donn dezir pu vinn sirveyan?
2 Eski se Bondye ki donn dezir pu vinn sirveyan? Wi, parski par so lespri Zeova donn so bann serviter motivasyon, kuraz ek lafors ki zot bizin pu ofer li enn servis sakre. Par egzanp, kan bann disip Zezi ti persekite, zot ti priye pu gayn kuraz pu prese. Ki ti arive lerla? “Sa plas kot zot tu ti rasanble-la [ti] tranble; ek zot tu zot [ti] ranpli avek lespri sin ek zot ti pe koz parol Bondye avek kuraz.” (Akt 4:27-31) Pwiski lespri sin finn inflyans bann dimunn dan sa lokazyon-la, li kapav usi pus enn kikenn pu ena dezir pu vinn sirveyan.
3. (a) Ki kapav anpes enn Kretyin pu ena dezir pu vinn sirveyan? (b) Si Bondye donn nu enn privilez, ki Li pa pu manke pu fer usi?
3 Ki kapav anpes enn Kretyin ki mir lor plan spirityel pu ena sa dezir-la? Mem si li ena bann kalite spirityel, kitfwa li pa santi li ase kalifye. (1 Kor. 2:14, 15) Li posib ki li ezite parski li ena kit traka ki fatig li. Me, nu bizin rekonet ki si Bondye donn nu enn privilez, Li pa pu manke usi pu donn nu lafors pu fer sa travay-la.—Fil. 4:13.
4. Kifer bann frer ki nepli kapav servi la kongregasyon kuma avan, bizin pa dekuraze?
4 Akoz bann problem la sante uswa lezot problem, sertin frer nepli kapav asim bann responsabilite inportan ki zot ti ena avan dan la kongregasyon. Me fode pa ki sa dekuraz zot. Parmi bann ki nepli kapav fer buku asterla, enn gran kantite pe ankor tuzur tini ferm zot lintegrite. (Psom 25:21) Bann frer ki pe servi la kongregasyon avek limilite depi byin lontan, kapav kontiyn asim zot rol ansyin malgre zot laz uswa andikap. Sa permet lezot profit zot lexperyans.
5. Sit sertin personaz Biblik ki finn bizin atann avan zot gayn bann privilez. Ki sigzesyon kapav itil pu bann ki zordi pe atann pu gayn privilez?
5 Si u ena dezir pu vinn sirveyan, petet u bizin atann avan u gayn plis privilez. Pa prese. Moiz ti atann 40 an avan ki Bondye servi li pu liber bann Izraelit ki ti esklav dan Lezip. (Akt. 7:23-36) Zozye usi finn servi pandan lontan kuma asistan Moiz, avan ki Bondye nom li kuma so sikseser. (Egz. 33:11; Nonm 27:15-23) David ti atann inpe letan avan li mont lor tronn Izrael. (2 Sam. 2:7; 5:3) Aparaman, Pyer ek Zan-Mark usi, ti bizin pas par bann peryod formasyon avan ki zot asim zot responsabilite. (Mat. 26:69-75; Zan 21:15-19; Akt 13:13; 15:36-41; Kol. 4:10) Donk, si ansemoman u pena responsabilite dan la kongregasyon, kapav Zeova pe donn u letan pu gayn formasyon ek plis lexperyans. Alor, kontiyn rod led Bondye amezir ki u kiltiv dezir pu vinn enn sirveyan, ek ki kone, Zeova donn u lezot privilez ankor. Anatandan, fer zefor pu kalifye u pu asim bann responsabilite dan la kongregasyon.
6, 7. (a) Bann frer ki asim bann responsabilite dan la kongregasyon, ki bann kalite zot fam bizin manifeste? (b) Ki bann sakrifis bann fam ansyin dispoze pu fer pu Zeova ek pu zot bann frer, ek kuma lezot fam kapav zot usi ed zot mari?
6 Bann Ansyin ek Asistan Ministeryel—Ki Rol Zot Madam Zwe?: Kan li ti donn lalis bann kondisyon rekiz pu bann ansyin ek asistan ministeryel, lapot Pol ti koz usi lor bann fam. Li ti ekrir: “Pareyman, fode ki bann fam serye, zot pa fer palab pu gat repitasyon lezot, zot ekilibre dan zot bann labitid, fidel dan tu kitsoz.” (1 Tim. 3:11) Li vre ki sa konsey-la aplik ar tu bann fam Kretyenn. Me, li kler ki dapre kontex sa verse-la, se sirtu bann fam bann frer ki nome dan la kongregasyon, ki bizin donn legzanp dan sa bann domenn-la.
7 Erezman ki laplipar bann fam ansyin ek asistan ministeryel pe swiv konsey Pol. Zot ekilibre dan zot bann labitid ek dan zot fason abiye, zot amenn zot lavi Kretyenn dan enn fason serye, zot fer atansyon seki zot dir, ek zot fer bann zefor sinser pu res fidel dan tu kitsoz. Anplis, zot dispoze pu fer bann sakrifis, parski zot aksepte ki zot mari sakrifye letan ki li ti kapav pas avek zot, pu okip la kongregasyon. Wi, sa bann Kretyenn fidel-la merite ki nu kontan zot ek ki nu ankuraz zot sinserman. Dan nu bann kongregasyon, buku frer ankor ti pu kapav asim sertenn fonksyon si zot fam ti aksepte, avek limilite, pu fer sa bann sakrifis-la, ki ti pu enn byin pu tut la kongregasyon.
8. Ki sutyin enn fam ansyin kapav donn so mari?
8 Bann ansyin ki ena enn fami pu okipe, kapav gayn led pu fer sa. Enn Latur Degard ti fer remarke ki zot kapav gayn sa sutyin-la avek zot fam. Li dir: “Li (so fam) pu fer ansort ki so mari truv letan pu byin prepar so bann diskur. Si li organiz byin so bann luvraz lakaz, li prepar bann repa aler, ek li pare atan pu al reynion, sa pu permet li ek so mari raste letan . . . . Avek direksyon so mari, enn Kretyenn byin plase pu anseyn so bann zanfan la verite.” (Pro. 22: 6) Wi, Zeova inn kree la fam pu ki li “enn ed” pu so mari, ek byinsir so mari pu bizin apresye sa led-la. (Zen. 2:18) Sutyin so fam pu permet enn mari okip pli byin so bann responsabilite dan lakaz ek dan kongregasyon.
9. (a) Kuma la kongregasyon kapav diminye la sarz bann ansyin? (b) Ki sakrifis bann fam ansyin fer, ek kuma nu kapav montre nu rekonesans pu sa?
9 Rol la Kongregasyon: Dan la kongregasyon, nu tu kapav fer buku pu diminye la sarz bann ansyin. Konsyan ki bann ansyin ena enn fami pu okipe, fode pa ki nu pran zot letan ek zot latansyon pu nanyin, pu ninport ki ti zafer. Fode pa usi ki nu panse ki bann fam ansyin oblize ‘partaz’ zot mari avek la kongregasyon. Get seki enn fam ansyin ki ena trwa zanfan, inn dir: “Pu permet mo mari asim so fonksyon ansyin kuma bizin, mo’nn aksepte pu asim plis responsabilite dan lakaz. Ek zame mo pa pleyne akoz sa! Mo kone ki an retur Zeova pu beni nu fami, ek donk mo pa regrete pu seki mo mari pe done. Me mo admet kanmem, ki akoz so bann responsabilite, mo bizin ramas feyaz dan zardin ek disiplinn bann zanfan, inpe pli suvan ki dabitid.” Malerezman, olye montre zot rekonesans pu seki sa ser-la fer anplis, gete ki remark sertin ti fer li: “Kifer to pa fer pyonye?” (Pro. 12:18) Vomye felisit enn kikenn pu seki li fer, ki kritik li pu seki li pa kapav fer.—Pro. 16:24; 25:11.
10. Kuma eski nu kapav partaz santiman sa ekrivin psom ki mansyone dan lintrodiksyon sa lartik-la?
10 Eski nu anvi donn Zeova nu best, parey kuma sa ekrivin psom mansyone dan lintrodiksyon-la? Alor nu tu, anu motiv numem, swa pu servi kuma ansyin uswa asistan ministeryel, swa pu ed nu mari, nu papa uswa nu frer pu asim sa bann fonksyon-la. Eski kapav ena enn pli bon lobzektif ki sa?