Bann Vizit Fer Nu Gayn Bann Letid Labib
1. Kifer eski li telman inportan ki nu fer bann vizit?
1 Zezi ti donn lord so bann disip, pa zis pu prese me pu “fer bann disip . . . , ek anseyn zot.” (Mat. 28:19, 20) Enn predikater se enn kikenn ki anons enn mesaz alor ki enn anseynan li fer plis ki sa. Li anseyne, li explike ek li donn bann prev. Enn fason ki nu ena pu anseyn lezot se kan nu vizit bann dimunn ki interese avek lobzektif pu kumans bann letid Labib avek zot.
2. Kisannla nu bizin vizite?
2 Kisannla nu bizin vizite? Asir u ki u vizit tu bann dimunn ki’nn aksepte bann piblikasyon uswa bann ki’nn montre mem enn ti lintere pu bon nuvel. Si, letan u pe prese dan enn landrwa piblik, u zwenn enn kikenn ki montre lintere, sey gayn so ladres ek so nimero telefonn. Kumsa u kapav devlop lintere ki li ena. Gard enn latitid pozitif an seki konsern kumans bann letid Labib. Kontiyn rod bann ki pu aksepte etidye Labib, ek pena dut ki u pu truv sa bann dimunn la.—Mat. 10:11.
3, 4. Fer bann bon vizit, ki sa inplike?
3 Montre enn Lintere Personel: Premye fwa ki nu’nn zwenn enn dimunn, lamem preparasyon enn bon vizit kumanse. Bann predikater ki gayn buku sikse pran kont bann kitsoz ki interes dimunn ki pe ekut zot la. Ek zot servi sa kuma enn baz pu bann lezot diskisyon. Sertin truv li bon ki alafin vizit la, zot sulev enn kestyon pu kapte lintere dimunn la pu prosin vizit. Nu lintere sinser pu bann dimunn fer nu kontiyn pans zot, mem apre ki nu’nn kit zot. Ek li pus nu pu revizit zot pli vit posib. Si posib, sey vizit bann dimunn la avan ki zot lintere diminye, kitfwa enn uswa de zur apre.
4 Kan nu pe fer enn vizit, sey devlop u konversasyon dapre seki u ti diskite dernye fwa. Fixe lobzektif pu partaz omwin enn panse Labib ki ankurazan, sak fwa ki u vizit dimunn la. Ek montre u dispoze pu ekute. Aprann konn dimunn la inpe plis. Apre sa, dan bann prosin lezot vizit, partaz bann laverite ki ena dan Parol Bondye ki konsern li plis direkteman.
5. Ki metod sinp nu kapav servi pu kumans bann letid Labib?
5 Vey Tu Lokazyon pu Kumans enn Letid Labib: Fer bann vizit avek lobzektif pu kumans enn letid Labib. Kuma nu kapav fer sa? Dir dimunn la ki u ti pu kontan partaz enn panse interesan avek li. Lerla, uver u liv Konesans Ki Amenn ver Lavi pu Tuletan uswa brosir Ki Bondye Pe Demann Nu? an Franse uswa an Kreol, dapre seki dimunn la deside, ek montre li enn paragraf ki u panse pu interes li. Lir paragraf la ek poz kestyon pu paragraf la. Apre sa diskit lor enn uswa de verse ki site. U kapav fer sa dan 5-10 minit, devan laport dimunn la. Poz enn lot kestyon pu termine, ek fer bann laranzman pu kontiyn diskisyon la enn lot fwa.
6. Kuma eski nu kapav montre ki nu konpran linportans pu fer bann vizit?
6 Enn domenn byin inportan dan nu predikasyon, se devlop tu lintere ki nu truve. Alor, rezerv letan dan u program sak semenn pu fer bann vizit. Si u fer sa, u minister pu vinn pli efikas ek u pu gayn vre lazwa.