Montre ki U Interese ar Bann “Orfelin”
1 Zeova Li “papa bann orfelin.” (Psom 68:5) Nu truve ki Li ti interese ar zot byinet kan Li ti donn nasyon Izrael sa komannman la: “Fode pa zot maltret okenn vev uswa enn orfelin. Si to maltret li, ek ki li kriy ver mwa pu gayn led, mo pu tande kan li kriye.” (Egz. 22:22, 23) Dan Lalwa Bondye ti ena usi enn dispozisyon pu ed sa bann dimunn la lor plan materyel. (Det. 24:19-21) Dan vre relizyon Kretyin, bann vre adorater ankuraze pu “pran swin bann orfelin ek bann vev dan zot difikilte.” (Zak 1:27) Kuma eski nu kapav imit lintere ki Zeova ena pu bann ki pe grandi dan bann fami kot ena enn sel paran uswa kot enn parmi bann paran ki pa krwayan?
2 Formasyon Spirityel: Si u enn paran ki pe elve tusel u zanfan uswa u ena enn konzwin ki pa krwayan, li kapav difisil pu kondir enn letid Labib regilye avek u bann zanfan. Me enn letid Labib regilye, ek ki adapte ar bann bezwin lafami byin inportan pu ki zot vinn bann adilt stab ek ekilibre. (Pro. 22:6) Li usi inportan pu gayn bann konversasyon spirityel tulezur avek zot. (Det. 6:6-9) Kapav arive ki defwa u santi u dekuraze, me pa abandone. Rod lafors ek direksyon ar Zeova amezir ki u “kontiyn elve zot dan disiplinn ek dan bann manyer panse Zeova.”—Efe. 6:4.
3 Si u bizin led pu pran u bann responsabilite ki Labib demann u pran, fer bann ansyin konn u bann bezwin. Kitfwa zot kapav donn u bann sigzesyon pratik, uswa zot kapav ed u pu fer enn bon program spirityel pu u fami.
4 Kuma Lezot Kapav Ede: Dan premye syek, Timote ti vinn enn serviter Zeova zele malgre ki li ti grandi dan enn fami ki ti divize lor plan relizye. Bann gro zefor ki so mama ek so granmer ti fer pu anseyn li bann lekritir sakre dan so zenes, ti zwe enn rol inportan. (Akt 16:1, 2; 2 Tim. 1:5; 3:15) Me, li ti profit usi led ki bann lezot Kretyin ti done. Parmi ti ena lapot Pol, ki ti apel Timote so “zanfan ki li kontan ek ki fidel dan Senyer.”—1 Kor. 4:17.
5 Zordi usi parey, nu tir profi kan bann frer ek ser spirityel interes zot avek bann zenn ki ena enn sel paran dan laverite! Eski u konn sakenn zot non? Eski u koz ar zot dan reynion uswa dan lezot lokazyon? Invit zot pu akonpayn u dan predikasyon. Kitfwa detanzantan u kapav invit zot kan u ena u letid familyal uswa pu enn moman detant. U kapav usi invit zot paran ki krwayan. Kan sa bann zenn la konsider u kuma zot kamarad, zot pu santi zot puse pu imit u legzanp ek zot pu aksepte u lankurazman.—Fil. 2:4.
6 Zeova ena enn profon lintere pu bann orfelin, ek li pe rekonpans nu bann zefor pu ed zot pu aksepte, pu kontan ek pu viv laverite. Buku bann ki’nn grandi dan enn fami kot finn ena enn sel paran uswa kot enn paran tusel krwayan, finn gayn sa kalite lankurazman la. Ek asterla zot pe servi fidelman antan ki pyonye, serviter ministeryel, ansyin, sirveyan itineran, misyoner, uswa dan Betel. Anu rod bann lokazyon pu “grandi” nu lafeksyon pu bann orfelin, kumsa nu pu imit nu Papa ki dan lesyel.—2 Kor. 6:11-13.