Fer Konn Laverite lor Zezi
1 Bann Kretyin ki ena lesperans pu al dan lesyel ansam avek zot bann kamarad lezot muton, “pe rann temwaynaz lor Zezi.” (Rev. 12:17) Sa responsabilite la byin inportan, pwiski se selman grasa li, ki nu kapav gayn lavi.—Zan 17:3; Akt 4:12.
2 ‘Semin, Laverite, ek Lavi’: Zezi ti dir “Momem semin ek laverite ek lavi. Personn pa kapav vinn ver [mo] Papa san pas par mwa.” (Zan 14:6) Zezi limem “semin,” ek zis par li tusel ki nu kapav apros nu ar Bondye dan lapriyer ek gayn enn bon relasyon avek Li. (Zan 15:16) Zezi li “laverite,” savedir ki bann profesi ki dan bann Lekritir Ebre ti realize grasa li. (Zan 1:17; Kol. 2:16, 17) Avredir, rezon prinsipal bann vre profesi, se pu ekler nu plis lor rol inportan ki Zezi ena dan realizasyon proze Bondye. (Rev. 19:10) Zezi li usi “lavi.” Pu gayn lavi pu tuletan, nu tu bizin ena lafwa dan sakrifis ki li’nn done.—Zan 3:16, 36; Ebre 2:9.
3 Sef ek Lerwa Ki Pe Reyne: Bann dimunn bizin rekonet usi gran puvwar ki Zeova finn donn so Garson pu dirize. Zeova finn fer li vinn Lerwa dan so Guvernman—‘tu bann dimunn pu obeir li.’ (Zen. 49:10) Anplis, Zeova finn fer li vinn Sef kongregasyon. (Efe. 1:22, 23) Nu bizin ed nu bann etidyan pu konpran kuma Zezi diriz kongregasyon ek kuma li servi “esklav fidel ki ena bon zizman” pu donn ‘manze spirityel dan ler ki bizin.’—Mat. 24:45-47.
4 Gran Pret Ki Konpran Nu: Pwiski Zezi finn sufer ek li finn konn bann mem difikilte ki bann imin, li “kapav ed bann ki pe pas par difikilte.” (Ebre 2:17, 18) Li vremem enn konsolasyon pu bann dimunn inparfe kan zot aprann ki Zezi konpran zot febles, ek avek bonker li pled pu zot! (Rom. 8:34) Grasa sakrifis Zezi ek atraver so bann servis antan ki Gran Pret, nu kapav apros ar Zeova “avek fransiz” pu gayn “led kan bizin.”—Ebre 4:15, 16.
5 Anu fer an sort ki nu bann zefor pu fer lezot konn laverite lor Zezi pus sa bann dimunn la, pu obeir ek servi li ansam avek nu.—Zan 14:15, 21.