Ed Lezot pu Byin Konpran Nu!

¹ Pu nu byin swiv lord al prese ek fer bann disip, nu bizin fer bann dimunn byin konpran seki nu ena pu dir zot. (Mat. 24:14; 28:19, 20) Mem ant bann kamarad defwa li difisil pu enn konpran lot. Ki kapav ed nu pu fer bann dimunn ki nu pa kone, byin konpran labonn nuvel?

² Pa Res enn Etranze, Vinn enn Kamarad: Sey met u dan plas bann dimunn ki u zwenn dan predikasyon. Zordi kan nu get lemond, nu konpran kifer sertin dimunn mefyan, uswa zot per bann dimunn ki zot pa kone. Sa kapav dekuraz zot pu ekut nu. Kuma eski u kapav tir laper ki bann dimunn ki u zwenn, ena? Enn manyer pu fer dimunn byin konpran nu avan mem nu dir enn mo, se par nu laparans ki sinp. Si nu byin abiye ek si nu kalm, bann dimunn la pu mwin mefyan.—1 Tim. 2:9, 10.

³ Enn lot mwayin pu ed dimunn byin konpran seki nu ena pu dir, se kan nu ena enn manyer amikal ek kan nu alez. Sa kapav met zot usi alez ek fer zot interese pu ekut nu. Pu nu reysi fer sa, nu bizin byin prepare. Kan nu konn byin seki nu ena pu dir, nu mwins strese. Nu latitid kalm kapav fer lezot interese pu ekut nu mesaz. Ala seki enn madam ti dir kan enn Temwin ti vinn kot li: “Mo rapel so surir ek kuma li ti kalm. Sa ti tus mwa.” Sa latitid la finn fer madam la ekut ekut labonn nuvel.

⁴ Bann Bon Manyer Ki Atir Lezot pu Ekut Nu: Nu bizin interes nu ar lezot. (Fil. 2:4) Enn bon manyer pu fer sa, se kan nu pa koz tu numem. Apre tu, pu ki ena enn bon kominikasyon nu bizin usi ekute. Kan nu invit bann dimunn pu dir seki zot panse ek kan nu ekut zot komanter, nu montre ki nu interese ar zot. Donk, kan bann dimunn pe koze, fode pa nu prese pu kup zot konversasyon, pu revinn lor nu prezantasyon. Felisit zot si posib, ek adapte u konversasyon ar seki zot dir. Si seki zot dir montre ki kitsoz ki trakas zot, adapte u prezantasyon dapre sa.

⁵ Kan nu pa deklar tro kone ek kan nu dispoze pu abes nu, sa pu ed lezot pu pli konpran nu. (Pro. 11:2; Akt 20:19) Dimunn ti atire ar Zezi parski li ti “dus ek li ti sinp.” (Mat. 11:29) Me si nu deklar tro kone, sa pu fer dimunn pa ekut nu. Mem si nu sir ki nu ena laverite, nu bizin pa tro direk.

⁶ Ki nu pu fer si, kan dimunn la koze, nu truve ki so krwayans pa an akor avek Labib? Eski nu oblize koriz li? Wi, byinsir, me nu pa pu fer sa premye fwa ki nu koz ar li. Kitfwa si nu koz lor bann lanseynman Labib direkteman, li kapav pa aksepte. Me suvan nu gayn bann bon rezilta, si kumansman mem, nu koz lor bann kitsoz ki nu tulede dakor. Pu reysi fer sa, nu bizin ena pasyans ek fer atansyon lor seki nu dir. Pol finn les enn bon legzanp dan sa domenn la, kan li ti koz avek bann ziz dan tribinal Lareopaz.—Akt 17:18, 22-31.

⁷ Me nu bizin sirtu ena enn profon lamur, parski se sa ki pu ed nu ek, pu fer lezot byin konpran nu. Parey kuma Zezi, nu bizin ena pitye pu bann dimunn ki “fatige ek dekuraze.” (Mat. 9:36) Sa pu pus nu pu pres labonn nuvel avek zot ek pu ed zot pu mars enn fason pu gayn lavi. Pwiski nu mesaz li enn mesaz ki koz lor lamur, anu anons li avek lamur. Si nu fer sa, nu pu imit Zeova ek Zezi, ki de pli gran legzanp dan sa domenn la.