Nu Lafwa Pus Nu pu Fer Bann Bon Travay
1 Lafwa ti pus Noe, Moiz ek Raab pu azir. Noe ti ranz lars. Moiz ti abandonn bann lavantaz tanporer ki enn lavi dan lakur Faraon ti kapav ofer. Raab ti kasyet bann espyon ek apre sa li ti obeir zot bann linstriksyon, kumsa li ti sap so fami. (Ebre 11:7, 24-26, 31) Me ki bann bon travay eski nu lafwa pus nu pu fer zordi?
2 Donn Temwaynaz: Lafwa motiv nu pu koz lor nu Bondye extraordiner ek lor bann laranzman ki Li’nn fer pu nu boner eternel. (2 Kor. 4:13) Parfwa, nu kapav ezite pu donn enn temwaynaz. Me kan nu ‘kontiyn plas Zeova devan nu,’ nu gayn lafors ek nu laper kalme. (Psom 16:8) Lerla nu lafwa pus nu pu partaz labonn nuvel avek nu bann fami, vwazin, kamarad travay, kamarad lekol ek avek lezot, sak fwa ki enn lokazyon prezant devan nu.—Rom. 1:14-16.
3 Reyni Ansam: Asiste regilyerman reynion li enn lot bon travay ki nu lafwa motiv nu pu fer. Kuma? Ebyin, li montre konviksyon ki nu ena ki Zezi prezan avek nu par mwayin lespri sin Bondye kan nu rasanble dan bann reynion Kretyin. (Mat. 18:20) Sa montre ki nu anvi “tann seki lespri dir bann kongregasyon.” (Rev. 3:6) Nu ekut avek latansyon linstriksyon ki nu gayne parski nu lafwa fer nu konpran ki se nu Gran Anseynan, Zeova ki pe anseyn nu.—Izai 30:20.
4 Bann Swa Ki Nu Fer: Konviksyon profon lor bann realite ki nu pa truve pus nu pu donn priorite bann kitsoz spirityel dan nu lavi. (Ebre 11:1) Suvan sa vedir fer bann sakrifis materyel. Par egzanp, enn ansyin finn refiz enn lokazyon pu gayn promosyon dan travay parski sa ti pu fer li rat bann reynion, res lwin ar so fami ek aret so servis pyonye. Parey kuma li, nu bizin met tu nu konfyans dan lasirans ki Labib done ki Zeova pu sutenir bann ki “kontiyn . . . rod rwayom ek so lazistis avan tu.”—Mat. 6:33.
5 Lezot remark gran linflyans ki lafwa ena lor nu lavi. Vremem, partu lor later bann dimunn konn byin nu lafwa. (Rom. 1:8) Donk, nu tu, anu montre par nu bann bon travay ki nu lafwa vivan.—Zak 2:26.