Bann Fami Ki For lor Plan Spirityel—Kuma?
1 Bann fami Kretyin merit felisitasyon parski zot ‘pratik latasman avek Bondye dan zot prop lakaz.’ (1 Tim. 5:4) Me, avek tu sa bann move linflyans otur nu ki kapav afebli nu lafwa la, li inportan ki bann fami travay dir pu res for lor plan spirityel. Kuma eski zot kapav fer sa?
2 Dirize Kuma Kris: Bann sef fami bizin imit Zezi Kris dan fason ki zot asim zot responsabilite pu rann zot fami for. Zezi pa finn manifeste so lamur pu nu zis enn fwa kumsa atraver so lamor sakrifis, me li pe kontiyne “nuri ek pran swin” kongregasyon. (Efe. 5:25-29) Bann paran ki byin kontan zot zanfan swiv sa legzanp tandres Zezi Kris la kan zot pran kont bezwin spirityel zot fami tulezur. Sa inplik usi fer enn letid Labib an fami sak semenn, diskit lor bann size spirityel profon kan li posib ek atak bann problem kuma zot leve.—Det. 6:6, 7.
3 Dan Predikasyon: Tu bann manb fami bizin konpran ki donn lezot temwaynaz lor Zeova ek lor so bann proze okip enn parti inportan dan zot ladorasyon. (Izai 43:10-12) Si u paran, u anvi ki u bann zanfan vinn bann Temwin Zeova fidel, u bizin kumans depi byin boner pu prepar zot leker pu minister. Diskit bann rezon kifer enn kikenn bizin pre pu sakrifye limem dan servis ek partisip ladan sak semenn. (Mat. 22:37-39) Lerla fer bann laranzman pu zot partisip regilyerman avek u dan predikasyon.
4 Anplis, pu ed u fami konpran linportans predikasyon, rezerv enn ti letan pandan letid familyal pu prepar ek repet enn prezantasyon efikas. Donn u bann zanfan enn formasyon personel, kumsa u pu ed zot pu progrese dapre so laz ek kapasite. Apre ki u’nn pas letan ansam avek zot dan servis, diskite kuma zot finn truv bonte Zeova par zotmem. Rakont bann lexperyans ki ranforsi lafwa. Plis bann fami “gute ki Senyer bon,” plis zot vinn pros ar Zeova ek sa pu rann zot for pu reziste kont “tu mesanste.”—1 Pyer 2:1-3.
5 Dan Reynion: Li vremem bon kan sak manb fami ed so kamarad pu asiste tu bann reynion dan kongregasyon, sirtu si enn parmi santi li fatige, dekuraze uswa deborde! Enn zenn ser finn dir, “kan mo papa sorti travay, li fatige. Me mo partaz avek li enn bon pwin ki pu koze dan reynion sa swar la ek sa ankuraz li pu ale. Kan mo fatige, lerla li, li ankuraz mwa pu ale.”—Ebre 10:24, 25.
6 Fer Bann Kitsoz Ansam: Bann fami bizin fer bann kitsoz ansam, par egzanp donn kudmin dan bann luvraz lakaz. Bizin met letan dekote pu distraksyon ki’nn byin swazire. Piknik, exkirsyon, zwe ansam ek vwayaze pu vizit bann fami uswa kamarad, zot bann moman ere ek bann suvenir ki pa pu bliye.—Ekl. 3:4.
7 Bann fami Kretyin ki solid sirmont bann obstak kont zot spirityalite ki zot zwenn tulezur. Kan zot vinn pli pros ar Zeova, zot truve par zotmem lafors ki Li done.—Efe. 6:10.