Enn Let Kolez Santral

Alor ki nu pe rant dann bann premye lane 21 em syek, li enn plezir pu ekrir zot, ‘lafami antye bann frer’ atraver lemond, ek pu felisit zot pu zot dir travay. (1 Pyer 2:17) Finn gayn preske 2000 an depi ki Zezi ti demande: “Kan Garson enn zom vini, eski li pu truv vremem lafwa lor later?” (Lik 18:8) Zot laktivite byin devwe pandan lane servis ki’nn pase reponn sa kestyon Zezi la par enn wi byin for! Sertin parmi zot finn aksepte ki lezot mepriz zot ek bufonn zot akoz zot lafwa. Dan buku landrwa, zot pe andire malgre lager, katastrof, maladi, uswa lafaminn. (Lik 21:10, 11) Parski zot byin devwe pu fer bann bon travay, Zezi kapav tuzur ‘truv lafwa lor later.’ Pena dut ki ena lazwa dan lesyel akoz sa!

Nu kone ki li pa fasil pu andire. Get par egzanp bann sityasyon difisil ki nu bann frer finn kone dan enn peyi Asie de l’ouest. Dan sa peyi la, vyolans kont bann Temwin Zeova finn vinn enn kitsoz normal. Fek la, lapolis ti aret enn lasanble kot 700 dimunn ti rasanble anpe. Ti met bann baraz lor larut pu anpes 1,300 lezot dimunn vinn asiste lasanble. Enn laful bann dimunn maske, parmi ena bann polisye, finn atak sa plas kot ti pe fer lasanble la, zot finn bat bann asistan, ek zot finn met dife dan tu bann instalasyon ki ti pu servi pu lasanble. Dan bann lezot lokazyon, bann extremis relizye finn bat nu bann frer enn fason byin vyolan, avek bann dibwa kot finn anter bann gro kulu.

Sa bann atak vyolan la sok nu, me zot pa etonn nu. Avek linspirasyon Bondye lapot Pol ti ekrir: “Tu bann ki ule viv dan latasman avek Bondye ansam avek Kris Zezi, zot usi, zot pu konn persekisyon.” (2 Tim. 3:12) Dan premye syek, bann Kretyin ti bizin siport bann persekisyon verbal ek fizik, ek ti ena mem ki ti truv lamor. (Akt 5:40; 12:2; 16:22-24; 19:9) Nu finn truv sa pandan 20 em syek ek pena dut, li pu kontiyne dan 21 em syek usi. Me, Zeova dir nu: “Ninport ki zarm ki pu forme kont twa, pa pu reysi.” (Izai 54:17) Enn lasirans extraordiner, pa vre? Wi, nu ena telman valer devan lizye Zeova ki atraver so profet Zekarya, Li finn dir: “Seki pe tus zot, pe tus mo lagrin lizye.” (Zek. 2:8) Bann lennmi bann adorater Zeova pena okenn sans pu gayn laviktwar. Vre ladorasyon ki pu sorti vinker.

Par egzanp, dan sa peyi ki ti mansyone avan la, bann Temwin Zeova finn konn de nuvo maximem dan kantite proklamater pandan lane servis 2001. Wi, nu bann frer pe persevere, parey kuma zot fer dan lemond antye, malgre bann sityasyon difisil. Dan lane servis ki’nn pase, dan lemond antye tulesemenn 5,066 dimunn finn pran batem pu montre zot langazman ar Zeova. Asterla, sa bann nuvo la determine, ansam avek nu, pu “vinn konple avek enn ferm konviksyon dan tu volonte Bondye.”—Kol. 4:12.

Get usi seki finn pase fek la an Grèce. Malgre lopozisyon intans ki Legliz Ortodox Grek finn fer pandan plizir lane, asterla guvernman rekonet bann Temwin Zeova kuma enn “relizyon parey kuma lezot.” Dan sa dokiman kot ena sa rekonesans drwa la, finn usi ekrir ki batiman Betel Grèce li “enn plas sakre, dedye pu ladorasyon Bondye.” Nu kontan usi pu dir zot ki pandan lane servis ki’nn pase, bann lakur finn rann bann desizyon legal an faver nu ladorasyon dan Allemagne, Bulgarie, États-Unis, Japon, Roumanie, ek Russie. Wi, nu remersye Zeova buku parski Li finn les laport laktivite uver dan sa bann peyi la!

Kan nu reflesi lor bann fason ki Zeova pe sutenir so pep dan sa bann dernye zur la, nu truve ki Li meyer Kamarad ki nu kapav ena. Nu pran plezir dan nu relasyon avek Li pwiski nu kone ki Li kontan nu, Li anseyn nu, ek Li koriz nu. Wi, nu lafwa pu kontiyn pas dan bann leprev. Me, si nu ena enn lafwa solid an Zeova, sa pu sutenir nu. Zak finn ekrir: “Pran li kuma enn lazwa, mo bann frer, kan zot konn tu sort kalite leprev. Mazine ki kan zot pas ladan, zot lafwa, apre ki li finn teste, li gayn enn valer ki donn landirans.” (Zak 1:2, 3) Anplis, nu landirans montre nu lamur pu Zeova, ek sa donn nu buku lazwa! Zot kapav sir, nu bann frer, ki Zeova pu ed sakenn parmi nu. Si nu res fidel, abe pena dut ki Li pu ed nu pu rant dan lemond nuvo. Li anvi ki nu reysi.

Alor, nu ankuraz zot, frer ek ser, zenn ek vye, pu gard dan zot lespri bann benediksyon extraordiner ki pe atann nu devan. Anu gard mem latitid ki Pol, ki ti ekrir: “Mo krwar ki bann sufrans sa lepok la pa vedir nanyin, konpare ar laglwar ki pu revele dan nu.” (Rom. 8:18) Kont lor Zeova kan u fer fas ar ninport ki kalite lopozisyon. Andire, ek refiz bes lebra. Zame, wi zame u pa pu regrete. Parol Bondye donn nu sa lasirans la: “Me sa kikenn ki drwat la, parski li fidel, li pu kontiyn viv.”—Abakuk 2:4.

Zot bann frer,

Kolez Santral Bann Temwin Zeova