Kuma Ed Nu Bann Zenn pu Prese
1 Nu kontan pu ena parmi nu buku zanfan ek adolesan ki pe fer zefor pu ‘rapel zot Gran Kreater dan bann zur zot ladolesans.’ (Ekl. 12:1) Me, ki led nu kapav donn zot?
2 Bann Paran Ki Form Zot Zanfan pu Predikasyon: Dan enn lokazyon, Zezi ti dir: “Dan labus bann tibaba ek bann ki’nn fek ne, to finn met luanz.” (Mat. 21:15, 16) Alor, sa montre ki bann ansyin, ek bann kondikter Letid Liv, bizin ankuraz bann paran amenn zot zanfan ar zot dan predikasyon.
3 Kan bann zanfan akonpayn zot paran dan predikasyon, dusma-dusma zot gayn enn formasyon. Avek letan, zot usi zot pu aprann partisipe. Si apre ki li finn gayn enn formasyon, enn adolesan ki ena bann paran Temwin, ule partisip dan predikasyon, li kapav akonpayn enn adilt.
4 Formasyon ki bann paran done ed zot bann zanfan usi pu pres avek kuraz. Zot pa gayn per, ni zot onte kan zot zwenn zot bann kamarad lekol dan predikasyon. Ek zot mem pre pu donn temwaynaz dan lekol. Wi, Zeova donn bann paran ek bann zanfan kuraz pu pres labonn nuvel ar tu dimunn.—Psom 29:11a.
5 Bann paran kapav usi form zot bann zanfan pu pa partisip dan nasyonalis uswa patryotis. Depi ki finn ena bann atanta le 11 Septam, nasyonalis finn kumans pran lanpler. Malgre ki nu pa konserne direkteman par sa sityasyon la, fode pa nu bliye ki sa li enn size byin sansib. Alor, li inportan ki nu gard mem latitid bann premye Kretyin ki ‘pa ti fer parti dan lemond.’—Zan 17:16.
6 Sutenir Bann Paran Ki Bizin Led pu Diriz Zot Zanfan lor Plan Spirityel: Mem si li responsabilite enn papa pu anseyn so bann zanfan, nu kapav propoz nu led. Par egzanp, nu kapav propoz enn fami pu etidye uswa pu partisip dan predikasyon ansam avek nu fami. Bann ansyin usi kapav pran bann dispozisyon pu ede. Zot kapav demann enn proklamater ki ena lexperyans pu fer letid enn uswa plizir zanfan enn fami. Si zanfan la (batize uswa pa batize) finn fini liv Konesans, kapav fer enn lot liv avek li. Byinsir, anseynan la pu kont so lertan ek so bann vizit.
7 Me dan ka bann zanfan miner, li preferab ki enn paran asiste letid so zanfan. Si zanfan la enn proklamater ki pa batize, proklamater ki pe fer so letid la kapav form li dan predikasyon. Buku zenn finn tir profi ar sa dispozisyon la. Zot finn profit lankurazman ek legzanp bann proklamater ki ena plis lexperyans ki zot.
8 Wi, anu interes ar bann zanfan ek bann adolesan, parey kuma Zeova. Si nu donn zot nu led, nu sir ki zot pu parmi bann ki pe sant bann luanz pu nu “Bondye, ki finn asiz lor tronn.”—Rev. 7:10.