Kestyon Ki Suleve

◼ Kuma eski nu kapav pran swin tu seki nu servi pu prese?

Kitfwa, enn proklamater konn enn bon prezantasyon baze lor Labib. Me selman, li pa finn prepar bann kitsoz ki li bizin pu prese. Kan li devan laport enn dimunn, kitfwa li pena piblikasyon ki pe ofer sa mwa la. Bann peryodik, brosir ek trak ki dan so sak kitfwa kraz-kraze uswa pliye. Kitfwa li pa truv ni enn plim uswa enn kreyon, ni enn not lakaz-lakaz kan li bizin, parski so sak an dezord. Li inportan ki avan nu sorti dan predikasyon, nu prepar byin bann kitsoz ki nu pu servi pu prese.

Ki bizin ena dan enn sak ki finn byin prepare? Enn Labib byin neseser. Bizin usi bann not lakaz-lakaz. Fer sir ki u ena piblikasyon ki pe ofer sa mwa la. U bizin ena usi bann peryodik ase resan, bann trak ek brosir. Pa bliye u liv Comment Raisonner. Si u ena enn kopi Nu Minister DiRwayom pu sa mwa la avek u, sa pu permet u zet enn kudey lor bann prezantasyon ki ena ladan avan ki u tap prosin laport. Si u pu pres dan enn teritwar kot u pu zwenn bann dimunn ki koz enn lang etranze, li pu bon ki u ena brosir Une bonne nouvelle pour toutes les nations. U pu kapav byin prepar u pu abord bann zenn si u ena enn nu bann piblikasyon ki koz lor bann zenn.

Tu seki u servi pu prese bizin byin an ord dan u sak. U pa oblize ena enn sak nef, me li bizin prop ek dan enn bon leta. U sak predikasyon fer parti dan bann kitsoz ki u servi pu pres labonn nuvel. Alor, gard li byin an ord.