Servi Parol Bondye Kuma Bizin
1 Kan li ti pe donn temwaynaz enn ofisye, “Filip ti uver so labus ek, li finn servi [enn] pasaz Labib pu kumans anons li labonn nuvel konsernan Zezi.” (Akt 8:35) Filip ti pe “servi parol laverite kuma bizin.” (2 Tim. 2:15) Me zordi, bann sirveyan ki vizit bann kongregasyon finn remarke ki buku proklamater rarman servi Labib kan zot donn temwaynaz. Eski u servi Labib dan u minister?
2 Tu seki nu krwar ek tu seki nu anseyne sorti dan Parol Bondye. (2 Tim. 3:16, 17) Sa mem ki atir dimunn ar Zeova ek donn zot linstriksyon pu lavi. Ala kifer li inportan ki nu servi Labib dan nu minister olye ki nu zis koz lor bann size ki interes nu. (Ebre 4:12) Parski laplipar dimunn pa tro konn Labib, nu bizin lir direkteman ladan pu montre zot bann konsey pratik ki li done ek lavenir ki li rezerve pu limanite.
3 U Kapav Lir Direkteman dan Labib: U kapav sey al prese san amenn enn sak. U kapav met piblikasyon ki u pu prezante dan enn fayl uswa enn ti malet ek sarye u Labib dan u lamin uswa dan u pos. Lerla, kan u kumans koz avek enn kikenn, u kapav tir u Labib san ki u donn dimunn la linpresyon ki u pe sey fer enn sermon. Debut enn fason ki dimunn la kapav swiv ansam avek u dan Labib. Kitfwa u kapav mem invit li pu lir enn verse. Kan dimunn la truve avek so lizye seki Labib dir, olye li zis tann u dir seki ena ladan, sa pu ena plis lefe lor li. Byinsir, pu ed li konpran lide tex Labib la, atir so latansyon lor bann mo ki explik lide ki u pe fer resorti.
4 Prezantasyon Avek enn Verse Labib: Apre ki u finn prezant u, u kapav dir: “Dimunn turn zot inpe partu pu gayn konsey dan lavi. Kot sa u panse nu kapav gayn meyer konsey pratik? [Les dimunn la reponn] Ki u panse lor sa pasaz Labib la? [Lir Proverb 2:6, 7, ek les dimunn la reponn.] Malerezman sazes bann zom pa finn donn bon rezilta, li finn fer dimunn tom dan dezespwar. Par kont, sazes Bondye li tuzur profitab ek nu kapav tuletan kont lor la.” Apre sa, montre piblikasyon ki u pe prezante, ek atir latansyon lor enn legzanp sazes pratik Bondye ki ena ladan.
5 Zezi ti servi bann lekritir pu ed bann dimunn sinser. (Lik 24:32) Pol usi ti fer parey pu pruv seki li ti anseyne. (Akt 17:2, 3) Plis nu konn servi Parol Bondye kuma bizin, plis nu lasirans ek nu lazwa dan nu minister pu ogmante.