Prepar U pu Etidye Profesi Izai!
1 “Bann adorater fidel kapav ena konfyans ki Zeova. . . pa pu permet lemond Satan egziste enn zur an plis ki seki lazistis demande.” Sa li enn deklarasyon ankurazan, pa vre? Kot sa bann parol la sorti? Dan liv La prophétie d’Isaïe, lumière pour tous les humains I. Eski profesi Izai donn nu rezon pu tir enn konklizyon ankurazan kumsa? Wi! Sa liv Labib la met buku laksan lor delivrans. (Izai 25:9) Ala kifer li pu enn gran lankurazman pu nu etidye sa porsyon Parol Bondye la dan Letid Liv Kongregasyon. Eski nu pu prezan tule semenn pu profit sa? Kifer eski nu pu bizin prezan?
2 Izai 30:20 apel Zeova nu “Gran Instrikter.” Sak Kretyin bizin ekut byin kan Zeova koz ar nu atraver bann paz So Parol ek atraver bann piblikasyon baze lor Labib ki “esklav saz ek fidel” donn nu. (Matye 24:45; Izai 48:17, 18) Pu liv Prophétie d’Isaïe I usi li parey. Kuma eski u kapav tir plis profi kan u etidye sa liv la?
3 Prepar U pu Partisipe: Rezerv ase letan sak semenn pu prepar u letid liv. Lir porsyon ki pu etidye paragraf par paragraf. Reflesi lor sak kestyon. Suliyn bann repons la dan u liv. Bann verse ki site dan Izai finn ekrir an karakter fonse. Lir zot avek buku latansyon. Rod bann lezot pasaz Labib ki finn site, ek gete ki rapor zot ena avek size ki pe etidye. Medit lor seki u pe aprann. Apre sa, partaz seki u finn prepare avek u grup letid liv.
4 Kondikter letid liv bizin ed tu bann asistan pu byin servi Labib ek pu apresye valer pratik sak porsyon ki pe etidye. Si u pe reponn premye dan enn paragraf, donn enn repons sinp ek direk. Asterla, si enn kikenn finn fini donn premye repons, u kapav donn enn repons pli detaye. Kitfwa u kapav montre kuma enn pasaz Labib inportan sutenir tem sa size ki pe egzamine la. Sey donn bann repons dan u prop mo, ek pran plezir pu partisipe.
5 Anu egzaminn avek enn gran dezir mesaz presye ki ena dan liv Izai. Sa liv la pu ankuraz nu pu atann sak zur dan lazwa, ziska delivrans Zeova vini!—Izai 30:18.