Azir Byin ek Gayn Loner!
1 “Zot ena enn lape ant zot ki zame mo pa finn truve parmi okenn pep.” “Li enn plezir pu resevwar sa grup la.” Ala detrwa parmi bann remark pozitif ki bann obzervater finn fer apre lasanble distrik lane dernyer. Sa met an valer bon repitasyon ki nu lorganizasyon ena. (Proverb 27:2; 1 Korintyin 4:9) Byinsir, sa loner la al pu Zeova. (Matye 5:16) Ena enn lot bon lokazyon devan nu sa lane la kot nu kapav donn Bondye laglwar: nu Lasanble Distrik “Bann Anseynan Parol Bondye.”
2 Tulelane nu gayn bann rapel lor manyer ki nu bizin konport nu dan lasanble. Kifer? Pwiski latitid, labiyman ek konportman lemond pe kontiyn vinn pli pabon, nu, nu pa anvi rant dan zot mul. Nu pa anvi gat nu repitasyon. (Efezyin 2:2; 4:17) Donk, anu gard sa bann pwin la dan nu lespri.
3 Azir Byin—Dan Lasanble: Finn remarke ki sertin asistan pa korper avek bann frer servis akey, ek zot mem koz brit, enn fason ki pa Kretyin. Parski sertin pa finn swiv linstriksyon bann frer, zot finn park zot loto dan lari ek sa finn deranz bann vwazin. Byinsir, si nu get zis nu prop zafer, nu pa pu byin azir, ek sa pa pu donn Bondye Zeova loner. Donk, anu plito korpere, montre lamur ek pasyans.—Galat 5:22, 23, 25.
4 Bann obzervater inpresyone kan zot truve ki bann ti zanfan ena bon manyer ek zot obeisan. (Efezyin 6: 1, 2) Paran, silvuple vey u bann zanfan pu ki zot pa deranz lezot, par egzanp kan zot fer sanblan al twalet, alor ki zot al zwe dan parking.
5 Mem ki tu dimunn kapav asiz kot zot anvi, bann ki vwayaz ansam uswa an fami sirman pu anvi asiz dan mem ranze. Me, u bizin rezonab kan u rezerv bann plas; rezerv zis pu bann ki u kone pu vini. Defwa bann ki partisip dan bann demonstrasyon perdi zot plas kan zot returne parski lezot finn buz zot bann liv uswa zot bann zafer. Donk, li bon ki nu ena konsiderasyon pu bann ki ena partisipasyon dan program lasanble.
6 Parey kuma ti dir dan bann lane avan, nu tu ankuraze pu amenn enn repa leze ek bann rafresisman. Ena buku plas kot nu kapav manze ansam. Fode pa nu aste avek bann marsan ki vinn vande dan lantre Lasal Lasanble. Dan bann lane avan, bann vwazin vinn fer konplint ki sa bann marsan la les zot dezord an plas, zot ale. Si nu pa aste avek zot, nu pu dekuraz zot pu vini, ek sa pu evit nu enn ta problem.
7 Azir Byin—Par Nu Labiyman ek Nu Laparans: Laplipar nu bann frer ek ser merit felisitasyon pu zot bon laparans Kretyin. Me, li tris pu dir ki lane dernyer, sertin finn met bann gran-gran labiyman, uswa zot finn abiye par gu ek preferans personel. Sa finn gat latmosfer spirityel nu lasanble. Fode ki zame nu labiyman reflekte lespri lemond, me li bizin sinp ek respektab. Bann ser bizin veye ki zot zip uwsa zot rob pa tro kurt, tro kole uswa tro kler. Nu bizin veye ki zame nu pa sok konsyans personn par laparans ki nu ena an piblik.—Filipyin 1:10.
8 Azir Byin—Pandan Batem: Bann kandida batem pu sirman konsider sa lokazyon la avek enn pli gran respe. Zot pu montre zot apresyasyon pu sa lokazyon sakre la si zot met enn labiyman respektab pu sa levennman la. Li ti pu bon si avan zot asiste lasanble, bann kondikter letid reget avek zot bann etidyan lartik “Questions des lecteurs” dan La Tour de Garde 1 Avril, 1995. Nu remersye bann frer ek ser ki finn ekut linstriksyon ki finn done pu pa vinn pre avek pisinn pandan batem. Tu bann asistan ankuraze pu asiste batem dan zot plas mem. Kumsa, nu tu nu kapav swiv byin sa levennman inportan ki byin sakre la.
9 Nu bon manyer ek nu latasman ar Bondye temwayn nu bann krwayans Kretyin ek fer bann ki ena enn leker onet rekonet fasilman laverite. Donk, anu “kontiyn azir byin” ek gayn loner pandan ki nu asiste Lasanble Distrik “Bann Anseynan Parol Bondye.”—Romin 13:3.