Organize “Byin ek dan Lord”
1 Pu ki enn lasanble reysi, tu dimunn bizin met zot zefor ansam. Komite lasanble prepar lasal lasanble. Bann frer, bann ser ek bann fami vinn donn kudmin dan sa preparasyon la. Bann kongregasyon avoy bann volonter pu ede dan diferan servis lasanble pu ki “tu kitsoz pas byin ek dan lord.”—1 Korintyin 14:40.
2 Kan u pe met u bann zefor ansam avek bann ki pe organiz sa lasanble la, mazine ki finn bizin plizir mwa—defwa plizir lane—preparasyon. Enn gran kantite frer depans buku letan dan sa preparasyon la. Bizin prepar program, tradir li, rasanble bann lekipman, ek rod bann volonter. Grasa sa preparasyon an avans la, nu tu gayn bann benediksyon spirityel. Ki nu kapav fer pu ede?
3 Li byin inportan ki nu tu korper avek bann laranzman ki finn fer pu lasanble. Ena par egzanp lorganizasyon transpor pu vinn Lasal Lasanble. Laplipar nu bann frer limite lor plan finans ek buku depann lor bis ki lwe pu sa lokazyon la. Akoz sa, bann kongregasyon fer enn zefor pu negosye enn tarif bis ki abordab. Li inportan ki nu organiz nu pu nu pa an retar lor bistop. Sakenn bizin respekte program ler ki finn etabli pu bis pase. Kan enn kikenn an retar, bis la bizin atann li ek lerla, bis la ariv lasanble tar.
4 Nu bizin fer zefor pu invit bann dimunn interese pu vwayaz avek nu tulezur pu al lasanble. Kan vwayaz ansam, bizin veye ki bann nuvo ek bann vye dimunn gayn enn plas kot zot alez. Pu bizin kitfwa usi pran kont bann paran ki ena zanfan. Ena prefer asiz devan akoz zot lasante. Bann andikape bizin gayn enn latansyon spesyal. Bann frer ki responsab transpor bizin pran kont bezwin sak pasaze. Bann responsab transpor bizin fini organiz avek sofer bis pu vinn pran bann pasaze enn tipe letan apre lafin sesyon. Kumsa, zot pa pu deranz bann asistan ek sa pu permet bann frer ek ser pas enn tipe plis letan avek zot kamarad. Avek lamur nu bizin pran kont bezwin lezot ek ‘pa gard enn lizye, par lintere personel, zis lor nu prop zafer, me . . . lor bann zafer lezot usi.’—Filipyin 2:4
5 Avan ariv Pointe aux Sables, frer responsab la bizin explik sofer ki li bizin rant dan lakur Lasal Lasanble ek swiv linstriksyon bann frer ki okip parking. Mem si bann bis la pa pu res dan lakur tutlong lazurne, bann sofer bizin debark bann pasaze lor parking. Kumsa sirkilasyon pa pu bloke dan lantre Lasal Lasanble, ek pu ena mwins tapaz dan vwazinaz. Ena enn ta plas pu bann bis vire dan parking ek zot kapav sorti par lantre mem.
6 Tu bann fami ki vwayaz par loto ankuraze pu debark zot bann pasaze deryer batiman twalet. Apre sa, zot kapav park zot loto dan enn plas kot bann frer ki okip parking pu indik zot. Pu ki nu bann ser pa abim zot zoli sulye talon dan makadam, finn ranz enn lale beton pu zot marse.
7 Pwiski nu bann serviter Bondye Zeova, nu ena lokazyon pu reflekte so personalite dan tu seki nu fer. Sa vedir usi ki nu bizin fer bann laranzman neseser pu asiste bann lasanble kot servi non Bondye. Pa bliye, Li “pa enn Bondye dezord, me enn Bondye lape.” (1 Korintyin 14:33) Donk, nu bizin fer tu pu ki bann obzervater truv sa bann kalite ki Zeova ena la dan nu kondwit letan nu pe asiste Lasanble Distrik “Bann Anseynan Parol Bondye.” Nu espere ki bann obzervater ki ena bann bon lintansyon pu realize ki bann laful ki Zeova finn rasanble, zot organize “byin ek dan lord.”—Psom 68:26.