Fer Konn Non Zeova ek So Bann Manyer Azir
1 “Remersi Zeova, invok so non, fer bann pep konn so bann manyer azir. . . . Ki leker tu bann ki pe rod Zeova rezwir.” (Psom 105:1, 3) Ekrivin sa psom la ti byin kontan pu koz lor Zeova ek lor so bann “manyer azir” ar lezot. Ki bann manyer azir sa? Pena okenn dut, bann manyer azir Zeova ki ena enn rapor avek so pozisyon lerwa dan laglwar ek avek “bon nuvel so delivrans.”—Psom 96:2, 3; 145:11, 12.
2 Pwiski peryod Memoryal pu lane 2001 pe koste, nu ena buku rezon pu rezwir akoz bann manyer ki Zeova azir ar nu. Kuma? Pena dut ki pu tu bann vre Kretyin, Repa Senyer, sa mem pli gran selebrasyon dan lane. Pena okenn lot selebrasyon ki ena mem linportans, mem bi ek mem fason fer ki Repa Senyer. Sa li enn moman pu nu tu rapel seki Zeova ek Zezi finn fer pu sap nu. Pa etonan ki pandan peryod Memoryal li normal ki nu atann ki nu tu partisip plis dan predikasyon pu fer konn “bon nuvel delivrans”!
3 Eski U Kapav Fer Pyonye Asistan? Lane pase, an Avril ti ena 153,774 pyonye asistan. Sa lane la, eski nu kapav fer Mars ek Avril vinn bann mwa spesyal kot nu kapav fer plis dan predikasyon? Ena sink Samdi dan mwa Mars, ek sink Dimans dan mwa Avril. Buku proklamater ki travay finn truve ki zot kapav fer pyonye asistan kan zot pres maximem dan wikenn. Pu kapav gayn 50 ertan dan enn mwa, enn pyonye asistan bizin fer apepre 12 ertan par semenn. Get byin bann program ki finn sigzere dan lankadre paz 4. Eski ena enn dan sa bann program la ki kapav adapte ar u sityasyon? Sinon, u kapav fer u prop program pu u kapav fer pyonye asistan dan mwa Mars ek Avril.
4 Depi asterla mem, bann ansyin bizin sutenir bann proklamater ek fer zot gayn dezir pu fer plis pandan sa de mwa la. Lane pase an Avril, dan enn kongregasyon kot tu bann ansyin ek serviter ministeryel ti fer pyonye asistan, lor 121 proklamater, ti ena 64 pyonye! Pa fini, pu sa de mwa la, Mars ek Avril, kongregasyon la finn gayn usi 6 proklamater ki pa batize. Wi, sa mem pli bon lokazyon pu bann zanfan ek bann nuvo pu demann bann ansyin si zot kalifye pu kumans sorti pu prese.
5 Bann Zefor Anplis Fer Gayn Benediksyon: Bann kongregasyon ki fixe bann obzektif spesyal ek ki fer zefor anplis, gayn buku benediksyon. Sertin kongregasyon kapav fixe obzektif pu pres dan bann teritwar ki pa fer suvan, uswa zot kapav met lanfaz lor bann lezot form predikasyon, ubyin ankor lor temwaynaz par telefonn—enn bon mwayin pu zwenn bann absan, uswa bann dimunn ki difisil zwenn.
6 Eski maladi uswa vyeyes bizin anpes enn dimunn pu fer plis dan predikasyon? Pa neseserman! An tu ka, sa pa finn anpes enn ser 86 an ki ena kanser. Malgre so lipye ti anfle li ti fer pyonye asistan Avril lane dernye. Li finn kapav fer so maximem dan so servis ek donn Zeova plis laglwar grasa temwaynaz par telefonn. Sa finn motiv li mem ek usi so kongregasyon.
7 Prepar Byin pu Memoryal: Sa lane la Memoryal tom le 8 Avril. Pwiski sa pu enn zur Dimans, pli buku dimunn ankor pu kapav asiste. Nu pu kapav gayn pli gran lasistans ki zame nu finn gayne avan, si nu fer nu par, kan (1) nu mem nu prezan ek (2) kan nu invit lezot pu asiste Memoryal avek nu. Kisannla eski nu bizin invite?
8 Rod dan u bann not predikasyon bann dimunn ki finn montre lintere pu laverite, mem si u pa pe vizit zot regilyerman. De uswa trwa semenn avan Memoryal, fer u enn devwar pu kit enn fey invitasyon Memoryal ar tu sa bann dimunn la. Si u sityasyon permet, u kapav mem propoz enn mwayin transpor pu permet bann ki ti pu anvi asiste, vini.
9 Sertin kongregasyon pa reysi servi tu zot bann fey invitasyon Memoryal. Donk, bann sekreter kongregasyon bizin veye ki zot kongregasyon gayn bann fey invitasyon ase an avans, pu ki kapav distribiye tu bann fey la. Si u anvi, u kapav ekrir uswa inprim avek swin lor fey la, ladres kot pu fer Memoryal ek ler ki pu kumanse. Uswa, si pe fer Memoryal dan Lasal Rwayom mem, u kapav nek kit enn fey invitasyon reynion kot ena ladres Lasal Rwayom ansam avek fey invitasyon Memoryal. Zis pu rapel u, otan ki posib, bizin kit bann fey invitasyon Memoryal personelman avek sak dimunn.
10 Mazinn Bann Ki Pa Aktif: Li enn lazwa pu truv enn etidyan Labib angaz li avek Zeova ek montre sa par so batem. Me purtan, tulelane, sertin aret frekant nu, ek zot aret koz lor non Zeova ek so bann manyer azir ar lezot. Nu ena bann bon rezon pu interes nu ar sa bann dimunn la. Mem ki laplipar bann ki pa aktif pa finn abandonn laverite, kitfwa zot finn aret prese parski zot finn dekuraze, zot ena bann problem personel, uswa bann lezot traka lavi. (Matye 13:20-22) Bann ki finn afebli lor plan spirityel bizin led pu zot return dan kongregasyon avan ki sistem Satan devor zot. (1 Pyer 5:8) Pu sa peryod Memoryal la, nu anvi fer enn zefor spesyal pu ed tu bann ki pa aktif, me ki kalifye pu rekumans pres bon nuvel.
11 Sekreter kongregasyon bizin fer bann kondikter letid liv kone si ena bann manb ki pa aktif dan zot grup. Komite Servis Kongregasyon pu pran latet pu fer bann laranzman pu ki bann ansyin vizit bann ki pa aktif. Si dimunn la bizin enn letid Labib, komite servis bizin deside kisannla byin plase pu fer sa letid la. Mem ki letid la pa neseser dire pandan enn long peryod letan, kondikter letid la kapav kont li kuma enn letid Labib ek li kapav usi kont so ler ek so bann vizit.
12 Avril lane pase, enn ser ki ti pe pres lakaz-lakaz finn prezant enn misye ki ti lor simin, bann magazinn. Misye la finn fer ser la kone ki so madam usi Temwin, me selman li pa aktif. Li finn demann ladres Lasal Rwayom, ek li finn invit ser la pu vizit li ek so madam. Ebyin, kup la finn asiste prosin reynion ek zot finn aksepte enn letid Labib.
13 Prepar U pu Fer Plis dan Predikasyon! Ekrivin psom ki finn dir ki nu bizin fer konn non Zeova ek so bann manyer azir finn usi azute: “Sant pu Li, fer bann melodi pu Li, pran kont so bann travay extraordiner. Gayn laglwar dan so non sakre.” (Psom 105:2, 3) Anu montre ki nu pran kont gran non Zeova ek so bann “travay extraordiner.” Pu sa, anu ogmant nu bann zefor dan minister, ek anu fer sa lepok Memoryal la, enn lepok pli extra ki avan!
[Lankadre paz 4]
Plizir Fason pu Gayn 12 ertan par Semenn pu Fer Pyonye Asistan
Zur Lertan
Lindi 1 2 − −
Mardi 1 − 3 −
Merkredi 1 2 − 5
Zedi 1 − 3 −
Vandredi 1 2 − −
Samdi 5 4 3 5
Dimans 2 2 3 2
Total: 12 12 12 12
Eski enn sa bann program la kapav ed u? Sinon, kifer eski u pa fer u prop program?