Vinn enn Kikenn Ki Ekut Byin
1 Enn kikenn bizin disiplinn li pu li ekute avek buku latansyon. Me fode usi ki enn dimunn ki pe ekute anvi aprann ek tir profi ar seki li tande. Akoz sa mem, Zezi finn met lanfaz lor linportans “vey byin fason ki zot ekute.”—Lik 8:18.
2 Sa konsey la konsern nu sirtu kan nu asiste bann reynion kongregasyon ek bann lasanble. Dan bann lokazyon kumsa, nu bizin ekut avek buku latansyon. (Ebre 2:1) Ala detrwa pwin ki pu kapav ed u pu byin ekute dan bann rasanbleman Kretyin.
◼ Apresye valer bann reynion. Bann reynion zot enn mwayin prinsipal kot nu les nu “anseyne par Zeova” atraver so “serviter fidel ki ansarz.”—Izai 54:13; Lik 12:42.
◼ Prepar an avans. Prepar parti ki pu egzamine, ek pa bliye amenn u Labib ek u kopi personel piblikasyon ki pu etidye.
◼ Pandan reynion, fer enn zefor spesyal pu konsantre. Evit koz ar bann ki pe asiz akote u, uswa get seki bann lezot asistan pe fer. Pa les u lespri promne lor bann zafer personel, uswa lor seki u pu fer apre reynion.
◼ Analiz size ki pe prezante. Demann u mem: ‘Kuma eski sa aplik ar mwa? Kan eski mo pu met sa an pratik?’
◼ Pran bann ti not lor bann pwin prinsipal ek bann verse Labib. Sa ed u pu fixe u panse lor size ki pe egzamine ek li ed u pu rapel bann pwin inportan, ki u kapav servi apre.
3 Anseyn U Bann Zanfan pu Ekute: Bann zanfan bizin linstriksyon spirityel. (Deteronom 31:12) Lontan, kan ti pe lir Lalwa, “tu bann ki ti ena lintelizans pu ekute” parmi lepep Bondye ti bizin donn zot latansyon. (Neemya 8:1-3) Si bann paran byin konsantre dan bann reynion, zot zanfan usi pu kapav fer parey. Li pa saz si enn paran distrer so zanfan avek zuzu, uswa bann liv pu kolorye. Si sak fwa u amenn u bann zanfan twalet, uswa deor, u pu anpes zot ekute. Pwiski “betiz atase avek leker enn garson,” bann paran bizin fer zefor pu veye si zot zanfan pu ki zot res asize ek ekute dan reynion.—Proverb 22:15.
4 Si nu ekut byin, nu pu pruve ki nu vremem saz ek ki nu anvi “gayn plis linstriksyon.”—Proverb 1:5.