Kifer nou bizin servi nom Bondié?

Sa lartik-la examine bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Kifer Bondié finn donne-Li-mem enn nom?

Pena doute ki ou content ki lezot appel ou par ou nom plutot ki par bann titre, couma “zom,” “missié,” “madame,” ou-soit “femme.” Enn nom permette lezot identifié ou personnellement. Bondié ena bann titre couma “Souverain Seigneur,” “Bondié Tout-Puissant,” ek “Grand Createur.” (Genèse 15:2; 17:1; Ecclésiaste 12:1) Mais Li finn aussi donne-Li-mem enn nom pou aide nou ena bann relation personnel avek Li. Nom personnel Bondié c’est Jéhovah.​—Lire Isaïe 42:8.

Mem si beaucoup traducteur la Bible finn remplace nom Bondié par bann titre couma “Bondié,” “Seigneur,” ou-soit “l’Eternel,” ena apepré 7,000 fois nom Bondié dan bann ancien manuscrit la Bible en hébreu. Li clair ki Bondié envie ki bann dimoune konn so nom.​—Lire Isaïe 12:4.

2. Kifer li bien important pou konn nom Bondié?

Konn nom Bondié implik plus ki zis koné couma pou dire so nom. Konn Bondié par so nom vedir ki nou ena bann relation bien proche avek Li. Nom Jéhovah vedir “Li faire arrivé.” C’est enn garantie ki Bondié kapav vinn tou seki bizin, pou realise so projet. Alors, konn nom Bondié implik ki nou croire ki Bondié pou realise so bann promesse. (Psaume 9:10) La foi bann dimoune ki konn ek servi nom Bondié, pousse zot pou ena confiance en Li ek pou mette Li en premier dan zot la vie. Jéhovah pou protege sa bann dimoune-la.​—Lire Psaume 91:14.

3. Kifer Bondié envie ki bann dimoune konn so nom?

Bondié envie ki bann dimoune konn Li par so nom parski sa faire zot gagne bann bienfait. Sa permette zot vinn camarade Bondié, ek ena l’esperance pou vive pou touletan. Pena doute ki Jéhovah envie ki nou faire konn so nom!​—Lire Jean 17:3; Romains 10:13, 14.

Jésus ti faire bann dimoune konn nom Bondié kan li ti enseigne zot fason agir Bondié, So bann la loi, ek So bann promesse. Zordi, bann disciple Jésus contigne faire bann dimoune dan tou nation, konn nom Bondié. Zot faire sa dan l’unité en tant ki ‘enn peuple pou nom Bondié.’​—Lire Actes 15:14; Jean 17:26.

4. Couma Bondié pou glorifié so nom?

Jéhovah envie glorifié so nom parski bann dimoune inn jette deshonneur lor sa nom-la. Par exemple, certain dire ki Li pa finn crée la vie ek ki nou pa bizin obeir Li. Lezot dire ki Bondié pa interessé ar nou ek ki Li responsable bann souffrance. Sa bann dimoune-la gate reputation nom Bondié. Mais, zot pa pou faire sa pou touletan. Bondié pou detruire bann ki jette deshonneur lor so nom.​—Lire Psaume 83:17, 18.

Jéhovah pou glorifié so nom kan so Royaume pou detruire tou bann gouvernement humain ek pou retablir la paix ek securité lor la terre. (Daniel 2:44) Bientot, tou dimoune pou bizin koné ki c’est Jéhovah ki vrai Bondié.​—Lire Ézékiel 36:23; Matthieu 6:9.

Ki ou bizin faire? Etudié Parole Bondié ek frequente bann dimoune ki content Li, sa pou faire ou vinn proche ar Li. Kan Jéhovah pou glorifié so nom, Li pa pou blié so bann serviteur fidele.​—Malaki 3:16.

Pou gagne plus renseignement, guette chapitre 1 dan livre Ki la Bible enseigné vrai-mem?, publié par bann Témoins de Jéhovah.

[Zimage page 10]

Nom Bondié dan enn ancien manuscrit hébreu