Zot pé rod bann reponse

“Apepré tou dimoune ena enn l’idée lor kisannla [Jésus] été. N’importe ki grandeur nou la foi été ou-soit ki quantité doute nou ena, nou tou nou demann-nou-mem: ‘Kisannla sa zom-la?’”​—ECRIVAIN, STAN GUTHRIE.

BANN dimoune bien envie koné kisannla Jésus été. Bann livre ki koz lor li finn vinn bann best seller, setadir bann livre ki’nn plus vendé. Bann film ki finn faire lor li, finn classé parmi bann film ki finn gagne pli grand succès. Pourtant, bann dimoune contigne demann bann question lor li. Zot ena different l’opinion lor kisannla li ti été vrai-mem.

Finn gagne deux-trois l’année, deux journaliste ti invite bann dimoune pou reponn sa question-la: “Kisannla Jésus ti été vrai-mem?” Parmi bann reponse ki zot ti gagné, ti ena:

● “Kitfois li ti enn rabbin (enn enseignant) ki finn laisse enn l’exemple compassion par so la vie.”

● “Li ti enn zom ordinaire ki ti ena enn la vie extraordinaire.”

● “Pena okenn preuve ki Jésus ti existé.”

● “Jésus, c’est Garson Bondié ki finn né, mort, ek ressuscité pou sauve nou dan nou bann peché. Li encore pé vive zordi ek li pou ré-vinn lor la terre.”

● “Mo croire ki Jésus Christ c’est sel Garson Bondié; li en mem temps enn humain ek enn bondié toulé-deux.”

● “Jésus c’est enn zistoire pou bann grand zenfant.”

Li clair ki parmi sa quantité different l’idée-la, tou pa kapav bon. Eski ena enn livre ki nou kapav faire confiance ek ki kapav reponn nou bann question concernant Jésus? Bann ki publié sa magazine-la croire ki la Bible c’est Parole Bondié ek ki c’est sel livre ki dire nou tou la verité lor Jésus.a​—2 Timothée 3:16.

Dan bann lartik ki pou suive, nou pou examine bann reponse ki la Bible donné lor certain question ki souvent bann dimoune posé concernant Jésus. Li-mem li ti dire ki “tou seki ena la foi en li” kapav gagne la vie sauve. (Jean 3:16) Nou invite ou pou examine sa bann reponse-la ek pou decidé par ou-mem si ou pou bizin aprann plus lor Jésus ek couma pou ena la foi en li.

[Note]