Question bann lecteur . . .

▪ La Bible donne nou l’esperance ki nou kapav vive pou touletan dan Paradis lor la terre. (Psaume 37:29; Luc 23:43) Eski vive pou touletan dan enn l’environnement parfait pou monotone?

Li vaut la peine ki nou pose sa question-la. Bann ki faire recherche finn remarké ki enn dimoune ki touletan trouve la vie monotone kapav vinn enn dimoune ki prend beaucoup tracas, ki deprimé ek ena tendance pou prend bann risk. Bann ki pena okenn but dan la vie ou-soit ki plein ar seki zot faire toulé-jour, kapav trouve la vie monotone. Bann ki pou dan Paradis, eski zot la vie pa pou ena okenn but? Eski seki zot faire toulé-jour pou monotone?

Pou commencé, remarké ki c’est Jéhovah, sa Kikenn ki finn faire ecrire la Bible-la, ki propose nou pou vive pou touletan. (Jean 3:16; 2 Timothée 3:16) Qualité principal ki Bondié ena c’est l’amour. (1 Jean 4:8) Jéhovah bien content nou ek Li finn donne nou tou bann bon kitsoz ki nou pé profité zordi.​—Jacques 1:17.

Nou Createur koné ki pou nou kapav heureux, nou bizin faire enn travail ki ena enn but. (Psaume 139:14-16; Ecclésiaste 3:12) Dan Paradis, bann ki pou travail pa pou senti-zot coumadir enn simple l’engrenage dan enn grand machine. Travail ki zot pou faire, pou faire zot-mem ek bann ki zot content gagne bann bienfait. (Isaïe 65:22-24) Si ou ti ena enn travail ki interessant ek kot touletan ou pé aprann enn nouveau kitsoz, eski ou ti pou trouve la vie monotone?

Remark aussi ki Jéhovah pa pou laisse n’importe kisannla pou vive dan Paradis. Li donne la vie eternel, ki enn cadeau, zis bann ki imite so garson, Jésus. (Jean 17:3) Kan li ti lor la terre, Jésus ti prend plaisir pou faire volonté so Papa. Par so bann parole ek so l’exemple li ti enseigne so bann disciple ki zot kapav gagne enn bonheur ki duré, plus kan zot donné ki kan zot recevoir. (Actes 20:35) Kan Paradis pou retabli, tou dimoune pou vive en accord avek deux pli grand commandement ki ena​—content Bondié ek content nou prochain. (Matthieu 22:36-40) Maziné ki tout autour ou ena bann dimoune ki pa egoïste, ki content ou ek ki content zot travail! Eski ou pensé ou ti pou trouve la vie monotone en compagnie sa qualité dimoune-la?

La vie dan Paradis pou implik ki kitsoz encore? Chaque jour, nou pou kapav aprann bann nouveau kitsoz concernant nou Createur. Bann ki faire recherche finn deja decouvert beaucoup kitsoz extraordinaire lor creation Jéhovah. (Romains 1:20) Pourtant, ziska ler, nou finn comprend bien tigit kitsoz lor bann kitsoz ki Bondié inn crée. Plusieurs millier l’année avant, Job, enn zom fidele ti ré-pense lor seki li ti koné lor creation Bondié, ek conclusion ki li ti tiré li encore toujours vrai. Job ti dire: “Sa c’est zis bann bord . . . fason agir [Bondié], ek vrai-mem, nou’nn tann zis enn ti son lor Li! Mais concernant so gros l’orage, kisannla ki kapav montré ki li comprend sa?”​—Job 26:14.

Mem ki quantité le temps nou vive, jamais nou pou reussi decouvert tou seki ena pou koné lor Jéhovah ek so creation. La Bible dire ki Bondié finn mette dan nou leker desir pou vive pou touletan. Mais li dire aussi ki “jamais bann dimoune pa [pou] decouvert travail ki vrai Bondié finn faire depuis commencement ziska la fin.” (Ecclésiaste 3:10, 11) Eski ou pensé ki enn jour ou pou trouve sa monotone pou aprann bann nouveau kitsoz concernant ou Createur?

Mem azordi, li bien rare ki bann ki bien occupé pou faire bann travail ki aide lezot pou tire profit ek ki donne Bondié la gloire, fatigué ar sa travail-la. Nou kapav sur ki si nou reste occupé dan bann travail coumsa, jamais nou pou trouve sa monotone​—mem si nou vive pou touletan.

[Zimage page 14]

La terre: Image Science and Analysis Laboratory, NASA-Johnson Space Center; Galaxie: The Hubble Heritage Team (AURA/​STScI/​NASA)