1. Tremblement de terre

“Pou ena bann grand tremblement de terre.”—LUC 21:11.

● Enn l’equipe journaliste ki ti pé faire enn reportage lor catastrophe ki ti arrivé dan Haïti, ti tann enn ti la voix pé plaigné. Zot ti reussi tire Winnie, ki ti ena 16 mois, enba enn batiment ki ti’nn crasé. Li ti reussi sapé dan sa catastrophe-la, mais so bann parent non.

KI LA REALITÉ MONTRÉ NOU? En janvier 2010, ti ena enn grand tremblement de terre dan Haïti kot plus ki 300,000 dimoune ti mort ek apepré 1.3 million dimoune ti perdi zot lakaz enn sel coup. Mem si sa ti enn grand tremblement de terre, sa pa ti enn l’evenement ki ti arrivé zis enn sel fois coumsa. Entre avril 2009 ek avril 2010, ti ena au moins 18 grand tremblement de terre dan le monde entier.

KI L’OBJECTION SOUVENT NOU TENDÉ? Pena plus tremblement de terre, mais c’est zis ki zordi, grace a bann dernier technologie, nou ena plus renseignement comparé ar bann dimoune dan le passé.

ESKI SA L’OBJECTION-LA LI VALABLE? Prend en consideration sa point-la: la Bible pa mette l’accent lor quantité tremblement de terre ki pou arrivé pendant bann dernier jour. Mais, li dire ki pou ena “bann grand tremblement de terre” “dan enn l’endroit apré lot.” Sa detail-la faire ki zot enn parmi bann l’evenement ki tou dimoune remarké, ek ki pé arrivé pendant sa periode l’Histoire ki bien important-la.—Marc 13:8; Luc 21:11.

KI OU PENSÉ? Eski nou pé trouve bann grand tremblement de terre, pareil couma la Bible ti annoncé?

Li parette ki bann tremblement de terre tousel zot pa enn preuve assez solide pou convaink nou ki nou pé vive dan bann dernier jour. Pourtant, prophetie concernant bann tremblement de terre, c’est pa sel prophetie ki pé realisé. Anou guette enn deuxieme.

[L’encadré page 4]

“Nou [bann scientifik ki etudié la terre] nou appel zot bann grand tremblement de terre. Tou bann lezot dimoune dire ki c’est bann kitsoz horrible.”—KEN HUDNUT, CENTRE AMÉRICAIN D’ÉTUDES GÉOLOGIQUES.

[Remerciement photo page 4]