Enn prophetie ki ena enn grand l’importance
“Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.”—MATTHIEU 24:14.
BANN bibliste d’accord ki sa verset-la li bien important. Li important parski sa travail ki li decrire-la pou bizin faire partout lor la terre, ek aussi parski li mette l’accent lor seki bann chretien ti supposé pé faire, setadir travail predication. Sa travail predication-la ti pou annonce enn l’evenement important ki Jésus ti appel “la fin,” ek ki ti pou touche tou dimoune lor la terre. Sa travail predication-la ti pou faire zis avant ki “la fin” vini.
Sa verset prophetik-la pé realisé dan nou lepok. Sa concerne ou, parski sa bon nouvelle-la li enn l’invitation ek enn l’avertissement toulé-deux. Li mette ou devant enn choix: soit ou accepté Royaume Bondié soit ou rejette li. Choix ki ou faire ena enn l’effet lor ou la vie.
Anou examine contexte sa verset-la. Plusieurs jour avant ki ti touye Jésus, so bann disciple ti vinn vers li ek ti pose li bann question concernant l’avenir. Zot ti envie koné kan Royaume Bondié ti pou etabli, enn kitsoz lor ki Jésus souvent ti kozé. Zot ti aussi envie gagne bann renseignement concernant “conclusion sa systeme-la,” enn l’expression ki certain la Bible traduire par “la fin sa le monde-la.”—Matthieu 24:3, Bible du Semeur; Bible en français courant.
Pou reponn zot, Jésus ti annoncé ki ti pou ena bann la guerre, la famine, l’epidemie, ek bann grand tremblement de terre, partout-partout lor la terre. Li ti dire aussi ki bann pratik ki kont la loi ti pou augmenté, ki bann enseignant dan fausse religion ti pou trompe beaucoup dimoune, ek ki bann dimoune ti pou ena la haine ek ti pou persecute bann vrai chretien. Tousala c’est bann mauvais nouvelle.—Matthieu 24:4-13; Luc 21:11.
Mais ti ena aussi enn bon nouvelle. Apré sa, Jésus ti dire bann parole ki nou trouvé la-haut, bann parole ki pendant bann siecle finn pousse bann dimoune pou envie konn plus ek ki’nn donne zot enn l’espoir. Mem si bann dimoune d’accord ki seki Jésus ti dire li bien important, zot pa d’accord ar so signification. Ki été exactement sa bon nouvelle-la? Ki été sa Royaume-la? Kan sa prophetie-la bizin realisé, ek par kisannla? Ek ki été “la fin”? Anou guette reponse sa bann question-la.
[Zimage page 2, 3]
Fac-similé du manuscrit des quatre évangiles de Washington. Matthieu 24:14 écrire en noir
[Remerciement photo page 2]
Dapré livre Facsimile of the Washington Manuscript of the Four Gospels in the Freer Collection 1912