Ena kikenn la-haut​—Mais Kisannla?

En Europe, enn madame agé rente dan enn l’eglise avek enn chapelet dan so la main, ek li agenou avek respé devant enn statue Marie. Dan l’Afrique, enn famille verse inpé rhum a coté tombe enn proche parent pou ki zot ena beaucoup respé. Dan enn parmi bann pays l’Amérique, enn jeune missié garde careme ek faire meditation dan l’espoir pou rente en contact avek seki li, li pensé so ange gardien. Dan l’Asie, enn pretre brule bann l’objet en papier ki bien coloré couma enn offrande pou l’esprit bann ancetre.

KI POINT commun ena entre sa bann dimoune-la? Zot tou croire ki ena bann creature intelligent la-haut avek ki nou kapav rente en contact ek ki kapav ena enn grand l’influence lor la vie bann dimoune. Bien sur, sa croyance-la li ni nouveau, ni li etonne nou. Seki etonne nou c’est ki ena enn quantité l’idée concernant kisannla ki vive la-haut, ek chaque l’idée bien different.

Bann musulman adore enn sel Bondié—Allah.a Bann dimoune dan la chretienté dire ki Bondié li enn Trinité, setadir Dieu le Père, Dieu le Fils, ek Dieu le Saint-Esprit. Bann hindou croire dan l’existence enn quantité bondié. Lezot dimoune dire ki bann l’esprit reste dan certain zanimo, pié, roche, ek la riviere. Ena lezot encore ki influencé par bann livre, bann film, ek bann programme television ki koz lor bann ange ek bann demon, bann fantome ek bann bondié.

Pareil couma ena beaucoup different l’idée lor bann bondié, ena aussi beaucoup different l’idée lor couma pou communik avek zot. Li logik pou pensé ki pa tou methode pou rente en contact avek zot, ki bon. Anou prend enn l’exemple: Avant nou faire enn call telephone, nou bizin koné kisannla nou pé telephoné ek nou bizin sur ki sa dimoune-la vrai-mem existé ek pou accepté prend nou call. Li pa vaut la peine ki nou essaye contacté enn dimoune ki pa existé. Pli pire encore, li kapav dangereux si nou rente en contact avek enn kikenn ki faire li passe pou sa dimoune ki nou pé telephoné-la.

Alors, kisannla ki vrai-mem vive la-haut? La Bible pa zis reponn sa question-la mais li expliké aussi ar kisannla nou bizin rente en contact ek ki nou kapav attann en retour. Nou encourage ou pou lire bann lartik ki suive. Kitfois ou pou etonné kan ou pou aprann ki la Bible dire lor sa sujet-la.

[Note]