5^eme Secret

KI LA BIBLE ENSEIGNÉ? “Heureux bann ki reconette ki zot pauvre lor plan spirituel.”—Matthieu 5:3.

KIFER LI DIFFICILE? Ena plusieurs millier different religion zordi. Beaucoup parmi zot enseigne different fason pou satisfaire ou besoin spirituel. Couma ou kapav koné lekel pé enseigne la verité ek vrai-mem pé faire Bondié plaisir? Certain grand ecrivain finn dire ki li pa logik ki bann dimoune croire dan Bondié ek developpe l’attachement pou Li ek ki sa kapav mem faire zot di-tort. Magazine Maclean’s ti faire enn resumé lor seki enn dimoune ki pa croire dan Bondié ti dire: “Sa l’enseignement chretien ki dire ki ena enn kitsoz ki al pli loin ki seki la science kapav prouvé ek seki nou kapav trouvé, tendé ek ressenti . . . faire nou la vie perdi so valeur ek pousse nou pou commette violence.”

KI OU KAPAV FAIRE? Examine bann preuve ki montré ki Bondié existé. (Romains 1:20; Hébreux 3:4) Pa laisse personne decourage ou pou rod reponse bann question pli important, couma par exemple: Kifer nou la? Eski ena la vie apré la mort? Kifer ena tou sa souffrance-la? Ki Bondié demann moi faire? Li bien important ki ou gagne bann bon reponse pou sa bann question-la parski sa pou aide ou ressenti enn satisfaction ki pou duré pou touletan.

Mais selman, pa accepté automatiquement tou seki lezot dire ou. Parole Bondié encourage ou pou servi ou “capacité pou raisonné” pou verifié par ou-mem seki acceptable pou Bondié. (Romains 12:1, 2) Ou pou gagne recompense pou ou bann zeffort. Si ou prend le temps pou etudié la Bible ek pou applik so bann conseil pratik, ou pou evite beaucoup probleme, ou pou moins tracassé, ek ou pou ena plus bonheur dan la vie. Ou kapav ena confiance dan sa promesse-la. Plusieurs million dimoune ki’nn grandi dan tou sorte qualité l’environnement finn gagne bann bienfait kan zot finn aprann la verité lor Bondié ek lor so bann projet.

A mesure ki ou gagne bann bienfait kan ou applik bann conseil sage ki ena dan la Bible, ou l’attachement pou Bondié pou vinn pli profond. Alors, nou invite ou pou etudié la Bible avek bann Témoins de Jéhovah! Si ou faire sa, pena doute ki ou aussi ou pou d’accord avek l’apotre Paul, ki ti ecrire: “Nou pou kapav tire enn grand profit si nou ena sa l’attachement-la pou Bondié ek si nou contente-nou avek seki nou ena.”—1 Timothée 6:6.

[Zimage page 8]

Verifié par ou-mem seki acceptable pou Bondié