Eski ou kapav konn Bondié par so nom?

Li enn l’honneur si invite ou pou dire bonjour enn dimoune important ek appel li par so nom. Souvent nou appel bann dimoune ki bien important par bann titre couma “Monsieur president,” “ Votre Majesté ” ou-soit “ Votre Honneur. ” Alors, si enn dimoune ki ena enn grand position dire ou: “S’il vous plait, appel moi par mo nom,” pena doute ki sa pou faire ou enn grand l’honneur.

VRAI Bondié dire nou dan la Bible, so Parole, ki Li’nn faire ecrire: “Moi mo Jéhovah. Sa-mem mo nom.” (Isaïe 42:8) Mem si Li ena aussi beaucoup lezot titre, couma “Createur,” “Tout-Puissant,” ek “Souverain Seigneur,” Li finn toujours donne l’honneur so bann serviteur fidele kan Li’nn laisse zot appel Li par so nom.

Par exemple, enn fois prophete Moïse ti commence suppliyé Bondié par sa bann parole-la: “Pardon, Jéhovah.” (Exode 4:10) Pendant l’inauguration temple dan Jérusalem, le Roi Salomon ti commence so la priere par sa bann parole-la: “O Jéhovah.” (1 Rois 8:22, 23) Ek kan prophete Isaïe ti koz ar Jéhovah, en tant ki representant nation Israël, li ti dire: “Toi, O Jéhovah, to nou Papa.” (Isaïe 63:16) Li clair ki nou Papa ki dan le ciel invite nou pou appel Li par so nom.

Oui, li important ki nou appel Jéhovah par so nom, mais nou bizin faire plus ki sa pou aprann konn Li vrai-mem par so nom. Concernant enn dimoune ki content Li ek faire Li confiance, Jéhovah promette: “Mo pou protege li parski li’nn aprann konn mo nom.” (Psaume 91:14) Li clair ki fodé pa nou zis appel Li par so nom, mais nou bizin aprann tou seki nou kapav lor signification so nom. Sa li bien important pou gagne protection Bondié. Alors, ki ou bizin faire pou konn Jéhovah par so nom?