“Zis encore enn verre”

ALLEN ti commence boire beaucoup kan li ti ena 11 an.a Li ek so bann camarade ti habitué al joué dan bois pou imite bann personnage ki zot ti trouvé dan bann film. Alors ki bann personnage ki zot ti imité pa ti vrai, bann la boisson ki Allen ek so bann camarade ti boire zot, zot ti bien réel.

Tony ti ena 40 an kan tigit-tigit li ti augmente quantité la boisson ki li ti boire. Avant, li ti pé boire enn a deux verre chaque soir, apré li’nn commence boire cinq a six verre. Ek finalement, li ti nepli koné comié li ti’nn boire par jour.

Allen ti rod l’aide pou so probleme lalkol. Parkont Tony li, li ti refuse l’aide ki so famille ek so bann camarade, ki ti tracassé pou li, ti offert li. Azordi Allen encore vivant pou raconte so zistoire; Tony li, sa faire deux-trois l’année depuis ki li’nn mort dan enn accident l’auto apré ki li ti’nn boire trop beaucoup la boisson fort.

Mem si enn dimoune li boire plus ki bizin kan li tousel, pena doute ki sa affecté la vie lezot dimoune, souvent avek bann consequence bien grave.b Souvent nou tann bann cas kot bann dimoune finn maltraite lezot en parole ou-soit lor plan physik, finn attak lezot ek faire bann crime, finn faire bann accident lor la route ou-soit dan travail, ek aussi gagne beaucoup probleme la santé. Enn parmi bann raison kifer arrive sa bann kitsoz-la, c’est a cause bann dimoune boire trop beaucoup. Chaque l’année bann dimoune depense par milliard dollar ar lalkol, sans compte bann dommage lor plan personnel ek affectif ki bann famille, bann zenfant ek dimoune la-mem gagné.

Malgré sa, l’Institut américain de la Santé dire: “Pa tou dimoune ki boire souvent ki ena enn probleme avek lalkol, ek pa tou dimoune ki ena enn probleme avek lalkol ki boire toulé-jour.” Beaucoup ki pa alkolik finn developpe l’habitude pou boire beaucoup sans ki zot finn rann-zot compte. Lezot boire de temps en temps mais zot kapav boire plus ki cinq verre dan enn l’occasion.

Si ou decide pou boire enn la boisson fort, lor ki quantité verre ou koné ou bizin arreté pou ou pa depasse limite? Couma ou pou koné kan ou bizin pa prend “zis encore enn verre”? (Proverbes 23:29, 30, Contemporary English Version) Bann prochain lartik pou examine bann renseignement utile lor sa sujet-la.

[Note]